Driovi 'Dise Rriti ya ro
1 Nya'do ko titiro, Äye Lu se mabe räṛuna ono!
2 Lidri taenji'bai ndi kowe'bai be gotayi ma te.
Ànya kayi koweoga malomvo;
3 ago ànya kayi taundiro ata ma lomvo,
ago gotayi ma te teinye taako.
4 Mulu ànya gica,
ago mämätu gica ànya ta, ànya kayi ma kicu.
5 Ànya logoyi ṛo takozi ayani märi vo takado roya,
ago yaoso ayani vo ŋgalu maro roya.
6 Minji vureope'ba kozi aza kojo robe vure kyila'baazi maro ro opene,
ago mi'ba alo aza kyila'baazi modo ndaro ro kikicu nda.
7 Ondro ape vure ndaro te oko, mi'ba usu nda taenji be;
mi'ba mätu ndaro ati takozi ro!
8 Mi'ba ori ndaro kokye ndriro;
ago 'diaza kuru losi ndaro.
9 Mi'ba ŋgwai ndaro ka'do kyemvo ro,
ago toko ndaro ka'do ävuzi ro!
10 Mi'ba ŋgwai ndaro ka'do 'ba ako drilämi'bai ro;
minja ànya ni tandroi se ànya koribe kigye yasi!
11 Mi'ba yuŋgu'bai ndaro kuruyi lakazà cini se nda ka'dobe sina,
ago atrai kuruyi ŋgacini se nda koye losi be tana ro.
12 Mi'ba 'diaza ka'do ko yauni be ndäri
ago koti ta kyemvoi se nda kabe e'bena ro ko.
13 Mi'ba zelevoi cini ndaro kotodra,
ago ävuru ndaro kuje ni kovole'bai se kabe eso nda vo yasi.
14 OPI koyi ta taundiro zutui ndaro ro,
ago ke'be takozii endre ndaro ro ko alona.
15 OPI koyi ta takozii ànyaro ro ondoalo;
ago ko'ba ta 'ba ànyaro ro ujene kpeye ni 'bädri yasi.
16 Mano ana usu ta a'doro yauni be tana kote.
Nda eza ati'bai, lemeri'bai
ndi 'dise tusu ro be te madale odra ànyaro ya.
17 Nda lu 'diotri te, mi'ba nda ka'do otriotri ro!
nda le äṛu ozo ko, mi'ba 'diaza käṛu nda ko.
18 Nda ka 'diazi otri zwi oso nda kabe boŋgo oso ronye;
mi'ba latri ndaro kudu lomvo ndaro oso gyi ronye
ago koci kowà ndaro ya oso ido ronye.
19 Mi'ba katako nda oso boŋgo ronye
ago ka'do ondoalo nda lomvosi oso kyinikunduro ronye.
20 OPI, nyologovotaro kyila'baazii maro ri liti inye 'do yasi,
ànya se kayibe taundi ata ma lomvo kwoi.
21 Oko OPI, Lu maro, mipa ma oso mi'batabe ronye,
ago mipa ma tana ta takado ŋgalu miro rota.
22 Ma orivoya ati'ba yi ago lemeri'ba yi;
ya maro twi tusu be.
23 Manarute oso lindri tandrole ro ronye;
ali ma te lozo oso cici ronye!
24 Kaya maro orivoya mbaraako ta ŋgaonya ako rota;
ago lomvo maro te orweorwe ro ni ŋgaonya kado ako ri.
25 Kyila'baazii maro guyi ma te;
ago ànya ŋgiṛiyidri te ondro ànya kondreyi ma te owo.
26 Mipa ma, Äye OPI Lu maro;
ta ŋgalu 'duro miro rota, mipa ma.
27 Mi'ba kyila'baazii maro kuniyi anjioko mipa ma ni
mi Äye OPI mipa ma ni.
28 Ànya otrinayi ma ndi, oko nyäṛuna ma 'da
mi'ba ma eza'bai ka'do opeopero ṛe,
ago mi'ba ma, ruindu'ba miro ma'do yai'dwesi.
29 Mi'ba driupi kuru kyila'baazii maro;
mi'ba ànya kosoyi driupi ànyaro oso boŋgo runduṛuro ronye.
30 Mozona aro'boya otre amba si 'da OPI ri;
märäṛuna nda 'da kalaombi lowa roya,
31 tana nda kani lemeri'ba gaga
ago opana ni ànya se kabe vure ndaro opena odrane iyi rigyesi.