Lapidriopi Timele se Kujebe ro
(Matayo 18:12-14)1 Tu alo aza si, ondro parata koto'bai ndi otapere'bai be kotoyi kala te Yesu lomvo ta ndaro erine oko, 2 Parusii ndi miemba'bai Ota robe etoyi driovi te ekye: “Mano ono ka otapere'bai uru ago ka ŋgaonya onya ànya yibe.” 3 Ago Yesu iti lapidriopi ono te ànyari ekye:
4 “Aba alo amiro aza ka'dogwo timele be kama alo, ndi alona aza kuje gwo, inye'do nda oyena e'di ya? Nda e'bena azaka se 'butenjidriesu fonjidriesu kabe ŋgaonya lowo ya ana gwo ago oyina gwo se kujebe ana uṛine madale nda usuna gwo. 5 Ago ondro nda kusu anya te oko, nda a'dote yai'dwesi nda ŋgyi anya te kufudri ndaro ya, 6 ago oyigwo 'bäru. Ago nda zi bereazii ago oriazii ndaro gwo voaloya ago atagwo ànyari ekye: ‘Miye riyä mabe, tana musu timele se maro kujebe ana te.’ 7 Kpa oso inye, mata ämiri ono, riyä a'dona amba vo'buyakuru ya takozi'ba alodi se ketadri te ta ndrani taŋgye'bai se 'butenjidriesu fonjidriesu si ko drietane ono drisi.
Lapidriopi Parata Kaciro se Jebe ro
8 “Kode aba ondro ka'do toko aza ka'dogwo parata mo'di ro kaciro be 'butealo, ago alona aza kuje gwo, inye'do nda oyena e'di ya? Nda eyine lamba gwo ago oyona ya zo ro gwo ago ugu vo uṛite liyaro vo cini yasi madale nda usu anya lutu. 9 Ago ondro anya kusu anya te oko, anya zi bereazii ndi oriazii anyaro be te voaloya ago atate ekye: ‘Ma te yai'dwesi, tana musu parata kaciro maro se 'debe di ono te, mì'de màye riyä.’ 10 Kpa oso inye, mata ämiri ono, malaikai Lu ro kai riyä oye takozi'ba alodi se ketadrite ta.”
Ŋgwa se Jebe ana
11 Ago Yesu ugu atate ekye: “Mano aza orivoya ŋgwà àgoro be ritu. 12 Ŋgwa se täduŋwa ro ana atate täpi ri ekye: ‘Täpi, nyozo lakaza se ka oyebe a'done märi drimbi ro teri.’ Ta'dota, mano ana lewe lakaza ndaro gwo ŋgwà àgoro ritu ndaro ri. 13 Ago u'du fere vosi oko, ŋgwa täduŋwa ana otokala ŋgase cini nda be sina ana rote voaloya, ago oyite 'bädri lozo ya, ago lau nda enji ŋgase cini nda be sina te ori kozi si. 14 Ago ondro nda kenji ŋga ndaro te cini oko, mä'bu 'desi 'dete 'bädri ana ya, ago nda te teinye ŋga aza ako. 15 Ta'dota, nda oyite losi oyene alo aza lidri 'bädri ana ro ri se zo nda te ämvu ndaro ya vo kizwe ndaro ro ondrene. 16 Aba nda le gi koso kyiri se kizwe kabe onyana ana onyane, oko cu 'diaza ozo ŋga aza kote ndäri onyane. 17 Äduro oko, nda usutate ŋgye ago atate ekye: ‘Ruindu'bai se ka losi oye täpi maro ri päläti dri orivoya ŋgaonya be amba, oko ma begi odra noŋwa ni täbiri risi ono. 18 Maŋgana ago moyina täpi maro re, ago matana ndäri makye: “Täpi, maye takozi te Lu lomvo ago kpa milomvo. 19 Mojo kote tona ma uzine ŋgwa miro, mi'ba ma a'done oso ruindu'ba alo miro se kabe losi oye päläti dri 'do ronye.” ’ 20 Ta'dota, nda ŋgate ago egote täpi ndaro re.
“Ago ondro nda drigba lozo ni 'ba lomvosi oko, täpi ndaro ndre nda te ago yana a'dogwo twi tusu be ndi nda mute ago ovo ŋgwa ndaro te ago njunju nda te. 21 Ndi ŋgwa atate täpi ri ekye: ‘Täpi, maye takozi te Lu lomvo ago kpa milomvo, mojo kote tona ma uzine ŋgwa miro.’ 22 Oko täpi atate ruindu'bai ndaro ri ekye: ‘Nyèzi boŋgo se kadopara 'do ndri ndri ago miso nda lomvo, mìso mäŋgusi dri ŋgwa ndaro ya, ago mìso mvoka pa ndaro ya. 23 'Dooko nyòyi nyèzi ti joroŋwa oshweekye ago mìfu ago mì'de màye riyä karama oyesi. 24 Tana ŋgwa maro ono drate, oko yauono adrite, nda jete oko yauono usu ndana te.’ Ndi ànya eto karama oyete.
25 “Ŋgwa kayoŋwa iro lowo ya, ondro nda kikyite ti zo lomvo oko, nda eri kporo loŋgo oŋgoro ndi läri otobe rote. 26 Ta'dota, nda zi alo aza ruindu'bai rote, ago eji anya te ekye: ‘Ta e'di ro kani a'do ya?’ 27 Ago ruindu'ba zatadrite ekye: ‘Ädrupi miro egote, ago täpi miro fu ti joroŋwa oshweekye te, tana nda egote kovole londroro ago kadoro.’
28 “Ädrupi kayoŋwa a'dote kyilaro ago gatezo ocine zo ya. Ago täpi ndaro itwete tesi ago lo'barute ndäri ecine. 29 Oko nda zatadri täpi ndaro rote ekye: ‘Mindre, ndroa gi cini kwoi si maye losi te miri oso iyeäṛi ronye ago ondoalo maro ota miro te. Caoko, nyozo indriŋwa aza kote märi karama oyeza bereazii maro be. 30 Ondro ŋgwa miro se kenji ŋga miro be kpeye ronyi'bai dri ono kesate 'bäru oko, mifu ti joroŋwa oshweekye te ndäri.’ 31 Ago täpi atate ndäri ekye: ‘Ŋgwa maro, ondoalo mi orivoya mabe noŋwa, ago ŋga cini gi ma sina ono orivoya miro. 32 Oko mà karama oye ago mà a'do yai'dwesi si ono, tana ädrupi miro ono drate oko yauono nda adrite, nda jete, oko yauono usu nda te.’ ”