Koronyai se Onyane
(Otadele 14:3-21)1 OPI atate Musa ndi Arona be ri ekye: 2 Nyata lidri Yisaraele ro ri mikye: Kwoi ni ŋgase lidriidriro onyane ämiri ni koronyai se kabe aba gyini drisi lakosi owo. 3 Mìnyana koronya se pa konyi na kufudri be ufu kara'da ro ago kabe ŋgaonya i'dwe i'dwe ni ya yasi ogo onyane 'do ndi. 4 Oko ko ämiri koronyai azaka se ka ŋgaonya i'dwe i'dwe ni ya yasi kode pa konyi na fudri kara'da ro 'do onyane. 5 Ko ämiri kyira onyane, ka gi ŋgaonya i'dwe i'dwe ni ya yasi ogo onyane oko, pa konyi ànyaro kara'da ako, ago orivoya undiro. 6 Ko ämiri kyito onyane, tana anya ka gi ŋgaonya i'dwe i'dwe ni ya yasi ogo onyane, oko pa konyi na kara'da ako, orivoya undiro. 7 Mìnya kizwe ko, tana pa konyi na fudri ndi kara'da ro, oko i'dwe ŋgaonya ko ni ya yasi ogo onyane ago orivoya undiro. 8 Mìnya iza koronyai kwoi ro ko, ca mido avo ànyaro ko; tana ànya orivoya undiro.
9 Minyana ŋgase cini kaori gyiya ndi, ŋgase orivoya kufu elero be ago kyiri kä'bägäro be se cini gyi'desii ya kode goloŋwai yasi. 10 Oko ŋgase cini azaka kabe ori gyi ya oko kufu elero ndi kyiri kä'bägäro ako cici ndi ŋgase cini gyiya iyibe, orivoya undiro. 11 Beṛo ämiri ŋgase cini inye iyi ondrene undiro. Beṛo ko ämiri iza ànyaro onyane kode avo ànyaro odone. 12 Ŋgase cini kaori gyi ya kufu elero ndi kyiri kä'bägäro ako 'do orivoya undiro.
13-19 Beṛo ko ämiri ari kwoi onyane tana ànya orivoya undiro: ägyiribi ndi bivu be, kuri ndi äri kajobe be, koyi walambe ndi koyi uni be, korowa ndi aricoro be, kuṛu ndi wala be, ariini ndi cucuṛu be, kaaonyama, jore ndi 'bi'bi be.
20 Kaa ciciŋwà se cini kufu be iyi orivoya undiro, 21 Mìnyana kaa ciciŋwa se kufube ago ka loŋga pa si iyi ndi. 22 Se onyane ämiri ni: tombi cini ŋgishe, täuŋgurä kode kofotiti cini. 23 Oko ciciŋwà se cini orivoya kufu be ago kabe aba pa su si iyi orivoya undiro.
24 'Dise kabe avo ŋga kwoi ro odona a'dona ndi undiro madale tandrolero, 25 'Dise kabe avo ànyaro uŋgyina, be ndäri boŋgo ndaro ojane ago a'dona ndi undiro madale tandrolero. 26 Koronyai se cini potoko na fudri ndi fere oko potoko na kara'da ako, ago i'dwe ŋgaonya koni ya yasi ogo onyane iyi orivoya undiro ämiri; 'dise cini kabe avo ànyaro odo a'dona ndi undiro. 27 Ago koronyai se cini pa na su ago kayibe aba pakonyi ànyaro si iyi, orivoya undiro ämiri; nda se kabe avo na odona a'dona ndi undiro madale tandrolero. 28 'Dise kabe avo ànyaro uŋgyina, be ndäri boŋgo ndaro ojane ago a'dona ndi undiro madale tandrolero. Tana ànya orivoya undiro ämiri.
29 Kwoi ni ŋgaŋwà se giṛiŋwà ro kabe lämu gyini drisi se orivoya undiro ämiri owo: tigye, nyädu, lice, 30 torioriŋwa, käbi, mändruku, känjäṛi ndi lindrondro be. 31 Ŋga cini iyi orivoya undiro ämiri, 'dise cini kabe ànya odo kode kabe avo ànyaro odona a'dona ndi undiro madale tandrolero. 32 Ago ondro ka'do avo ànyaro ke'dete ŋga aza dri ŋga na 'do a'dona ndi undiro. Kode ŋga na 'do orivoya ce yi, kode boŋgo yi, kode kyini yi, kode guniya yi, ŋgase aza abe losi aza oye sina 'do. Beṛo ànya ovone gyi ya, oko a'dona undiro madale tandrolero ndi ogo a'dona ndi wäṛi. 33 Ago ondro ka'do avo ànyaro ke'dete lakaza ludri roya, 'dooko ŋgase cini orivoya lakaza ya 'do a'dona ndi undiro, ago be ämiri lakaza na 'do ufune. 34 Ca ŋgaonya se onyaro 'do, gyi ni lakaza inye 'do yasi kotite driigye, a'dona ndi undiro; ago ŋga cini se umvuro ni lakaza na 'do yasi 'do a'dona ndi cini undiro. 35 Ŋgase cini avo ànyaro kabe e'de driigye 'do a'dona ndi undiro, kode vo ŋga la'di ro kode ambata o'bero beṛo tufune riyariya ŋga iyite orivoya undiro ago a'dona te undiro ämiri. 36 Caoko koro kode karaṛi se gyibe be a'dona ndi wäṛiro, oko ŋga aza se kabe avo ànya ya odona a'dona ndi undiro. 37 Ondro ka'do alo aza avo ànyaro ro ke'dete kwari se abe oye orine 'do dri, kwari 'do a'dona iro gi wäṛiro. 38 Oko ondro ka'do alo aza avo ànyaro ro ke'dete kwari se aso gyi te drigyi 'do dri, kwari 'do te orivoya undiro.
39 Ondro ka'do koronya se onyaro ämiri 'do azana kodrate odra, 'dise kabe avo na odo 'do a'dona ndi undiro madale tandrolero. 40 Ago ondro ka'do 'diaza konya iza koronya na 'do rote, beṛo ndäri boŋgo ndaro ojane, ago nda a'dona ndi undiro madale tandrolero; 'dise kabe avo na uŋgyina 'do kpa ndäri boŋgo ndaro ojane, ago a'dona ndi undiro madale tandrolero.
41 Ŋgaŋwà se cini giṛiŋwà ro kabe lämu gyini drisi iyi orivoya undiro, beṛo ko ämiri onyane. 42 Ŋgase cini kabe udi kätäti si ago se kabe aba pa su si kode se orivoya pa be amba, ŋgaŋwà se cini giṛiŋwà kabe lämu gyini drisi iyi ko ämiri onyane. Ànya orivoya undiro. 43 Mì'ba andivo amiro ko undiro ŋga kwoi onyana si. 44 Nyà'do ko undiro ànya si tana ma ni OPI Lu amiro owo, ago beṛo andivo amiro o'bane wäṛi a'done alokado, tana ma orivoya alokado. Mì'ba andivo amiro ko a'done undiro ŋgaŋwà giṛiŋwà ro kabe lämu gyini drisi iyi onyana si. 45 Tana ma ni OPI se kolofo ami be ni Ezipeto yasi owo, tana ma'do robe Lu amiro. Beṛo ämiri a'done alokado, tana ma orivoya alokado.
46 Ono ni ota se ta koronyai rota, ari rota ndi ŋgaŋwà se cini kabe aba gyi yasi rota ago ŋgagwà se giṛiŋwà ro kabe udi gyini drisi rota owo. 47 Beṛo ämiri a'do toto ŋgase undiro ndi ŋgase wäṛiro robe, ŋga lidriidri ro se onyaro ndi se ko onyaro iyi robe unine kadoro.