Lu Ezana Kusa 'da
1 Wari aza orivoya goloŋwai Kusa ro kundusi se eri kporo kufui rote kigye. 2 Lazo'bai kayi ikyi ni nasi Naile yasi, toŋboi se edebe dradra si iyi si. Mìgo kovole ami lazo'bai se paosiekye ono! Mìgo kovole lidri amiro se dämbäṛäṛä lomvo biliro kai re, se uturi tawi 'bädri cini yasi ono mìgo lazo be tu'de se mbäräkä ago mbaraekye ana re, se wari na goloi kolonyi yana be ana ya.
3 Nyèri dri, ami 'dicini se nyàbe ori 'bädri ya ono! Mìndrevo bere se taka'daro ro oyebe eŋgane driku'du'du 'bereŋwai ro yasi ono te! Mìga bi ovo cekuṛe ro tana erine! 4 OPI atate märi ekye: “Mandrena vo 'da ni vo'buyakuru yasi liaro pere oso ŋgaeyi kitu ro kitu eme si 'do ronye oso nduruṛi kabe oso ŋgäkyi si eme jee tu jalia ro si 'do ronye. 5 Teinye dri doŋgo topiako, ondro fo na kalayite kpeye ago doŋgo kate oka oko, kyila'baazi tufuna lidri Kusa ro 'da kpeye rritiako oso iṛi kabe gwoṛii kono ro olona 'do ronye. 6 E'bena avo ànyaro ro 'da bädru vurusi arii ri ndi koronyai vocowa robe ri, duru si arii onyana avo ànyaro ayani, ago meṛi si oko koronyai vocowa ro onyana avoi ànyaro teni.”
7 Tu ana si OPI Mbaraekye usuna ŋgapäṛi 'da ni lidri se dämbäṛäṛä lomvo biliro, se uturi tawi 'bädri cini yasi ono resi ni tu'de se mbäräkä ago mbaraekye, wari na goloi kolonyi yana be ono yasi Ànya ikyinayi 'da 'Bereŋwa Zaiona ya, vose abe OPI mätu kigye ono ya.