1 OPI ezo lazo ono te Osea ŋgwa Beri ro ri, tuse Uzia, Yotama, Aza ndi Ezekia be ka'doyibe 'bädri'bai Yuda ro ana si, ago tuse Yeroboama ŋgwa Yoasa ro be 'bädri'ba Yisaraele ro ana si.
Toko Osea ro ndi Ŋgwai be
2 Tuse käti OPI keto ata be Yisaraele ri Osea si, nda atate Osea ri ekye: “Nyoyi migye toko miri; toko se ronyi'ba ro 'do, ago mìti ŋgwai ronyibai ro anya be. Tana lidri maro a'dote ta'diriako ma OPI e'be si.”
3 Ndi Osea oyi gye toko se äzibe Gomera ŋguti Dibelaima ro ana te. Gomera kwo ŋgwa te ago ti ŋgwaagoro te ndäri. 4 OPI atate Osea ri ekye: “Mizi ävuru ŋgwa 'do ro Jezerela, tana tuna a'dona ko madaro, mezana 'bakala Jehu ro 'da ta ufu se zutu ndaro Jehu kufu 'di be Jezerela ya ana rota. Ma oye miri 'bädri'ba Yisaraele ro o'bane okyene. 5 Ago tu gi ana si motoŋgona mbara kyila'bai Yisaraele ro ro 'da Vodelero Jezerela roya.”
6 Gomera go kwo ŋgwa ṛiri kpate ago tite ŋgwa toko ro, ago OPI atate Osea ri ekye: “Mizi ävuru anyaro ‘Uluko,’ tana maka'dana ŋgalu ko tona lidri Yisaraele ro ri, kode märi ànya e'bene ta takozi rota te i'do alona. 7 Oko maka'dana yauni ndi lidri Yuda ro ri, ma, OPI Lu ànyaro mapana ànya 'da, ko kyila oye si, bandoi kode kusui ndi ätu be si, kode farasii ndi farasi'bai be si.”
8 Ondro Uluko ke'be ba ondro te oko, Gomera go kwo ŋgwa kpate ago ti ŋgwaagoro aza te. 9 Ago OPI atate Osea ri ekye: “Mizi ävuru ndaro ‘Ko Lidri Maro,’ tana lidri maro Yisaraele ro ko lidri maro ago ma ko Lu ànyaro.”
Ago Ologona Yisaraele 'da
10 Lidri Yisaraele ro a'dona 'da oso siŋgwa gyi'desi ro ronye, se äni kote otine kode ojone. Käti Lu atate ànyari ekye: “Ami kote orivoya lidri maro,” oko tu kate oye esane se nda atana 'da ànyari ekye: “Ami ni orivoya ŋgwai Lu lidriidriro ro.” 11 Lidri Yuda ro ndi lidri Yisaraele robe ogo dro'beruna 'da troalo, ànya onjinayi dri'ba alodi 'da andivo ànyaro ri. Ànya litinayi ago a'donayi 'da ŋgaamba be wari ànyaro ya, tana tu Jezerela ro a'dona 'da 'desi!