Taoye Kozi Yerusalema ro
1 OPI atate märi ekye: 2 “Ŋgwa lidri ro, inye'do mipena vure 'bakici se orivoya twi 'ditufube ono ro ndi ya? Dia nyaka'da tase cini koziro ànya koyebe iyi ànyari. 3 Nyiti tase ma, OPI Mbarapara mabe atana ono se makye: Mi 'bakici, tu miro kate esa, tana nyutufu lidri modo miro te amba ago nyenji andivo miro te undiro lui edeedero mätu si. 4 Mi orivoya taenji be ta 'dise nyutufube kwoi rota ago nya'dote undiro lui edeedero se nyedebe iyi si. Ta'doro tu miro kate esa, tu miro kyete! Ta'dota ma'ba tu'dei te mi ugune ago 'bädri cini ri mi lukune. 5 'Bädri se cini orivoya lototi ndi 'bädri se cini orivoya lozo iyi ugunayi mi 'da a'do takado ako ago a'do wiriwiri miro be 'doro. 6 Dri'bai cini Yisaraele ro yiyitate mbara modo ànyaro ya ago tufuyi 'di te. 7 'Diaza i'do 'bakici ana ya se ka täpi ndi endre ndaro be orona. Nyà ŋga atrai ro uruna mbarasi ago nyà ävuzii ndi kyemvoi yibe oyena koziro. 8 Mìro vose alokado maro iyi kote, ago nyä̀ti Sabata maro kote. 9 Yerusalema ya lidri ka koweoga azi lomvo tana äfu ànya robe. Rukäna kayi tori se alobe lui edeedero ri onyana. Rukäna kayi tase undiro loyena. 10 Azaka ànyaro kayi u'du 'ditoko täpii ànyaro robe. Rukä ànyaro kayi taoye mbarasi 'ditoko be tu la'bi ànyaro rosi. 11 Rukäna kayi ronyi oye toko kode ago drisi, ago rukäna kayi driuru 'ditoko ŋgwai ànyaro robe ago endreŋwai se endreazi kutibe iyibe be. 12 Rukä lidri amiro ro kayi 'ditufu ta parata rota. Azaka kayi drinju'du o'ba yuŋgu se ànya kozoyibe Yisaraele'ba azi ànyaro ri iyi dri a'dozana ŋgaamba be kandrakado ànyaro si. Ànya ijeyi ta maro te.” OPI Mbarapara atani inye.
13 “Modoŋgoṛona drì maro 'da 'dioco'bai ndi 'ditufu'bai se ami lako iyi udizana. 14 Inye'do nyà'dona gindi agoago aza be kode mbara be drì amiro eŋgazana tuse mate ami eza siya? Ma, OPI, matani, ago mayena ndi. 15 Meperena lidri amiro 'da 'bädri cini ndi tu'de cini be lakosi ago ma'bana taoye undiro amiro ono 'da okyene. 16 Ago ta'doro tu'dei azi orinayi 'da ami oroako, 'dooko mìnina 'da anjioko ma ni OPI owo.”
Asinyende Lu ro Ŋgawäṛi ro
17 OPI atate märi ekye: 18 “Ŋgwa lidri ro, Yisaraele'bai orivoya losiako märi. Ànya orivoya oso ondro äwäṛi mo'di te asinyendero ya oko ŋbiṛi, atala, kofo, ndi logo be, kabe e'be äṛize ro 'do ronye. 19 Ta'dota ma, OPI Mbarapara, ma taiti ànyari anjioko ànya orivoya losiako oso äṛize ronye. Mezina ànya cini 'da Yerusalema ya. 20 Oso lidri kabe mo'di, atala, ŋbiṛi, kofo ndi logo be wäṛina asinyendero ya 'do ronye, motona ànya 'da kyila maro ndi ozi maro be si ago malana ànya 'da kpa oso asi kabe logo ala 'do ronye. 21 Motona kala ànyaro 'da Yerusalema ya ago matona asi 'da ànya zele kyila maro si, ago ànya alana 'da kigye. 22 Ànya alana 'da Yerusalema ya kpa oso mo'di kabe ala asinyendero ya 'do ronye, 'dooko ànya uninayi 'da anjioko ma OPI meda kyila maro ni ànya dri.”
Takozi Dri'bai Yisaraele ro ro
23 OPI go ata kpate to'dina märi ekye: 24 “Ŋgwa lidri ro, nyitita Yisaraele'bai ri mikye wari ànyaro orivoya awi ro ago 'bu ako tu kyila maro ro si. 25 Dri'bai ànyaro orivoya oso ibii se kayibe totre koronya se ànya kosiyibe 'do dri ronye. Ànya fuyi lidri gwo, ruyi parata ndi lakazà se kadopara iyi gwo, ago ŋgatufu ànyaro 'ba ävuzii te a'done amba. 26 Kohanii fuyi ota maro te ago royi ŋgase alokado ono kote. Ànya niyi a'dototo ŋgase alokado ndi ŋgase ko alokado 'do ro kote. Ànya embayi a'dototo ŋgase wäṛiro ago ŋgase ko wäṛi 'do ro kote. Ànya tiyi ta Sabata ro kote, 'bani lidri Yisaraele ro royi ma kote. 27 Dri'bai losi ro miri ro laba oso ihwii se kayibe koronya se ànya kosiyibe 'do towana iṛeiṛe 'do ronye. Ànya kayi 'ditufu a'dozana ŋgaamba se ko liti ŋgye yasi 'do be. 28 Nebii da'doyi takozi se cini kwoi te oso lidri kabe tiṛi undru piri onje si 'do ronye. Ànya kayi rulofo se kowero 'do ondrena ago kayi taäŋgu kowe si. Ànya kayi ata ekye yà ta ma OPI Mbarapara ro itina ayani, oko se ma, OPI mata koni ànyari. 29 Lidri ka kpa 'dioco ago ka ŋgatopa. Ànya kayi 'dise lemeri ro ago ati'ba ro oyena koziro ago kayi ŋga atrai ro uruna mbarasi. 30 Ma voondre 'diaza ta ni ànya lakosi se unina ndi tiṛi obene, se edrena gwo vose tiṛi kotogabe kigye 'do ya ago ondro kyila maro kate wari ono perena oko kagaga robe, caoko musu 'diaza kote. 31 Ta'dota maza kyila maro kalana te ànya dri, ago mutufuna ànya 'da asi kyila maro rosi ta tase cini ànya koyeyibe koziro 'do rota.” OPI Mbarapara atani inye.