Tavoora Yoaba ro Egoro Abisolomo ri
1 Yoaba ŋgwa Zeruya ro nite anjioko ya 'Bädri'ba Dawidi ro gi 'du Abisolomo ta. 2 Ndi Yoaba zo lazo te Tekoa ya, ago ezi toko tavouni be aza te, ago Yoaba atate anyari ekye: “Mi'ba mi a'done oso 'dise lu'be be ronye, ago miso boŋgo lu'be ro milomvo; mipi ido ko milomvo oko nya'do oso toko se a'dote liyivoya u'duna amba avo dri ronye. 3 Ago Nyoyi 'bädri'ba re ago nyedele tase mabe atana miri ono ndäri.” 'Dooko Yoaba iti tase gya oyine anyari atane 'do te anyari.
4 Ondro toko se Tekoa ro ana kesate 'bädri'ba re oko, anya 'dete militi si vuru gyini dri, ye taoro te, ago atate ekye: “Äye 'bädri'ba mipa ma.”
5 Ago 'bädri'ba eji tate ekye: “Rriti miro e'diyi ya?”
Anya zatadrite ekye: “Ma orivoya ävuzi yi; ago maro drate. 6 Ma ruindu'ba miro orivoya ŋgwàagoro be ritu, ago tu aza alo si ànya peyi kala te iyivoya lowo ya, se 'diaza i'do lau ocine lata ya, ago alo aza ga azi te ago fu nda te. 7 Ago yauono 'didiri maro cini ŋgate ma ruindu'ba miro dri, ago ànya atayite ekye: ‘Nyozo nda se kufu ädrupi ndaro be 'do ämärigye, tana mä̀fu nda robe ta adri ädrupi ndaro se nda kufube 'do rota.’ Mä̀funa nda se koyebe a'done drimbi'ba ro ono ndi. Ondro ànya koyete inye, 'dooko e'bena ma gindi ŋgwaagoro ako, ànya ufuna mio'ba ädu maro ndi, ago e'bena ago maro ndi ŋgwaagoro ako ago ävuru ako 'bädri ya.”
8 Ndi 'bädri'ba atate toko se ana ri ekye: “Nyoyi 'bäru medrena ta miro vona 'da.” 9 Ago toko se Tekoa ro ana atate 'bädri'ba ri ekye: “'Desi 'bädri'ba maro, takozi ono ka'do ndi mädri ndi katidri maro be; 'bädri'ba ndi giti ndaro be orivoya taenjiako.”
10 'Bädri'ba atate ekye: “Ondro 'diaza alo kata ta aza te miri, nyezi nda mare, ago nda ogona oyena mi ko koziro alona.”
11 'Dooko toko ana atate ekye: “Molo'baru miri mi'ba 'bädri'ba kuzi ävuru OPI Lu ndaro ro, tana tavologo'ba kari vo ufuro kufu 'di ko tona, ukyi äfu ŋgwa maro 'da.” 'Bädri'ba Dawidi äṛurute ekye: “Ma ruäṛu Lu lidriidriro si, drikyiri alodi ŋgwa miro ro e'dene gyini dri i'do.”
12 'Dooko toko se ana atate ekye: “Molo'baru miri mi'ba ruindu'ba miro kata ata alo aza 'bädri'ba ri.”
Nda atate ekye: “Dia nyata.”
13 'Dooko toko se ana atate Dawidi ri ekye: “Tana e'di mira ta oso ono ronye te lidri Lu ro lomvo niya? Tase kefobe tesi ni kala modo miro roya ono si, mipe vure andivo miro rote, tana mi 'bädri'ba migo nyologo nda se aza minjabe tesi ni 'bäru ono kote. 14 Beṛo ama cini ri odrane; ama orivoya oso gyi se kalada te gyini dri ronye, se äni kote ogone kalana kotone to'di; oko 'bädri'ba unina ndi liti usune mano se vo to ya logone. 15 Mikyite tase ono opene mi 'bädri'ba 'desi maro ri; tana lidri nyaozi te malomvo, ago musutavote makye: ‘Mitina tana ndi 'bädri'ba ri; kode azaya 'bädri'ba oyena taeji ruindu'ba ndaro ro ndi. 16 Tana nda erina ta maro ndi, ago nda opana ma ruindu'ba ndaro ndi ni drì mano se kolebe ma ufune ndi ŋgwa maro be ni wari se Lu kozo be drimbi ro lidri ndaro ri ono yasi.’ 17 Ago ma ruindu'ba miro musu tavote makye: Ata 'desi 'bädri'ba maro ro i'dwena ma 'da; tana 'desi maro laba orivoya oso malaika Lu ro ronye ago ni ndi takado ndi takozi be lewene. OPI Lu maro ka'do tro mibe!”
18 'Dooko 'bädri'ba atate toko se ana ri ekye: “Yauono male taejine ni misi si ago nyada'do ta aza koni märi” Ndi toko se ana atate ekye: “Nyeji ri, 'desi 'bädri'ba maro.”
19 'Bädri'ba eji tate ekye: “Inye'do Yoaba orivoya mikundu tase cini ono ya ya?”
Toko se ana zatadrite ago atate ekye: “Endaro oso mibe orivoya lidriidri ro ono ronye, 'desi 'bädri'ba maro, mänina ko rulodine ni ta miro tadrina ozavoya si. Owo, ruindu'ba miro Yoaba eji ma ni tase ono oyene; nda ozo ata se cini kwoi ni ma ruindu'ba miro ri atane. 20 Ruindu'ba miro Yoaba ye tase ono te ta tozazana. Oko 'desi maro orivoya tavouni be oso tavouni malaika Lu ro ronye tase cini 'bädri ya kwoi unizana.”
21 'Dovosi 'bädri'ba atate Yoaba ri ekye: “Yauono maye na tase ono ndi; Nyoyi, ago nyologo mano ombato'di Abisolomo noŋwa.” 22 Ago Yoaba 'dete militi si gyini dri, ago ye taoro te, ago räṛu 'bädri'ba te ekye: “Ondro ono ma ruindu'ba miro mänite anjioko musu takado te mimile, 'desi 'bädri'ba maro, tana mile taeji ma ruindu'ba miro ro drîna te.” 23 'Dooko Yoaba ŋgate, oyite Gesura ya, ago logo Abisolomo te kovole Yerusalema ya. 24 Oko 'Bädri'ba atate ekye: “Mi'ba Abisolomo koyi kori iro dori zo modo ndaro roya ayani, ago nda kikyi ko makandra.” Ago Abisolomo oyite dori zo modo ndaro roya ayani ago ikyi kote 'bädri'ba kandra.
Abisolomo Go Letadri te Dawidi be
25 Yisaraele cini yasi äräṛu 'diaza alodi kote ta liŋgyi ndaro rota oso Abisolomo ronye; etoro ni pa ndaro ya le drî ndaro ya mämbi aza i'do nda lomvo. 26 Ondro nda kolo drikyiri ndaro te (nda ka olona perena alodi ndroa cini ya, tana ka a'do läŋgyiläŋgyiro nda dri), ago nda ojo läŋgyi na be orivoya sekele kama ritu (200) ŋga ŋgaläŋgyi ojoro 'bädri'ba rosi owo. 27 Abisolomo orivoya ŋgwàagoro be nätu, ago ŋgwa ŋguti ro be alodi se äzi ävuruna te Tamara; anya liŋgyi tawi.
28 Ago Abisolomo rite cu ndroa ritu Yerusalema ya, teinye ikyi ako 'Bädri'ba Dawidi kandra. 29 'Dooko Abisolomo zo lazo te Yoaba vo, nda ozone 'bädri'ba re; oko Yoaba gazo ikyine ndare. Ago nda zo lazo te pere ṛirina si, oko Yoaba gatezo ikyine. 30 Ndi Abisolomo atate ruindu'bai ndaro ri ekye: “Mìndre Yoaba orivoya ämvu be ämvu maro lomvo, ago inya orivoya ombavoya kigye; nyòyi mìso asi kigye.” Ago ruindu'bai Abisolomo ro oyiyite ago soyi asi te ämvu ya.
31 'Dooko Yoaba ŋgate ago oyite Abisolomo re 'ba ndaro ya ago atate ndäri ekye: “Ruindu'bai miro so asi te ämvu maro ya etaya?”
32 Abisolomo zatadri Yoaba rote ekye: “Mazo lazo te miri, ikyine noŋwa tana mazo mi robe oyine 'bädri'ba re, nda ejine vo maro ya ekye: ‘Ma'debe Gesura e'bene ago eṛine noŋwa tana e'diya? Aba ni kado märi orine lau.’ ” Ago Abisolomo ugu ata te ekye: “Yauono mi'ba märi oyine 'bädri'ba kandra, ago ondro ka'do maye ŋga kozi aza te, nda kufu ma robe.”
33 'Dooko Yoaba oyite 'Bädri'ba Dawidi re ago iti tase Abisolomo kata be ana te ndäri. Ago 'Bädri'ba zo lazo te Abisolomo vo. Ndi nda ikyite 'bädri'ba re, ago nda 'dete militi si gyini dri 'bädri'ba kandra. Ago 'bädri'ba njunju Abisolomo te.