1 'Bädri'ba Dawidi täpi Solomo ro ka'da vo Yekalu ro ṛote nja. Orivoya Yerusalema ya, 'Bereŋwa Moriya dri, vose kaladri Arauna Jebusa'ba ro ana ya. 'Bädri'ba Solomo eto obena te 2 imba ṛiri ndroa lisu ori ndaro 'bädri'ba ro rosi. 3 Yekalu se 'Bädri'ba Solomo kobebe ana ocana orivoya kadrakadra na 'buteritu fonjidrieri, ago käkpuna orivoya kadrakadra na njidriasu. 4 Ndiṛi na orivoya oso käkpu Yekalu ro ronye, kadrakadra na njidriasu, ago ogwana orivoya kadrakadra na 'butenji fosu. Ändru yana te logo läguläguru wäṛiro si. 5 Ara ya zoya 'desi rote ice wiri rosi ago ändrute logo läguläguro liŋgyiekye si, ago uwuräte beti ice ndiro ro ndi beti nyori robe si. 6 'Bädri'ba tira Yekalu te kuni si liŋgyiekye ago logo läguläguro se agyebe ni 'bädri Parevaima roya ana si. 7 Nda ndru tiṛi Yekalu ro, paraga na, käläsikala na ndi käläsi na be te kpeye logo läguläguro si. Losioye'bai egyiyi beti malaikai kufu be rote tiṛi lomvosi. 8 Ya yasi zo ro se le kitoriya na ya se äzibe Vo Alokado Parandra ana, ocana orivoya kadrakadra na njidriesu ago käkpuna kadrakadra na orivoya njidriesu, se orivoya cu oso käkpu Yekalu ro ronye. Nda ndru tiṛi Vo Alokado Parandra rote talentaro kama njidrialo logo läguläguro liŋgyiekye rosi. 9 Ojo läŋgyi losomari ro orivoya sekele 'butenji logo läguläguro ro. Ago ändru tiṛi zo ya kurusi ro kpate logo läguläguro si.
10 'Bädri'ba ozotate losioye'bai ndaro ri beti malaikai ritu kufube ro edene ni logo yasi, lomvona undrune logo läguläguro si, ago ànya o'bane Vo Alokado Parandra ya, 11 se edreyite mi ojoojoro zayimite ecivo driro. 12 Alona kufube ritu, kufu telesi alo ocana orivoya kpikpina njidrieri kpäkyi, se lararute ago do azi te kitoriya zo ya roya ago telesina sate ändu tiṛi zo ro lomvo ago kpa telesina lomvo, 13 kozorube a'dwi ana ocana cini orivoya kadrakadra na njidriasu ronye. 14 Ede boŋgo toyiro Vo Alokado Parandra rote 'bilindriro, lu'buliro, lärimiro, ago okaro uwurä beti malaikai kufube rote kigyesi.
Läŋgyiri Ritu Atala ro
(1 'Bädri'bai 7:15-22)15 'Bädri'ba ede läŋgyiri te ritu, alona ogwana orivoya kadrakadra na 'butealo fonji ago edrete mile Yekalu roya. Alona orivoya dridonjo be ogwana orivoya kpikpina njidrieri kpäkyi. 16 Itira beti iŋgyinyori rote dri läŋgyirii ro yasi ndi beti gäṛä'bu ro kama alo be. 17 Nda edre läŋgyiri te lamadri ecivo yekalu ro ro yasi, alodi ŋgäṛiŋwadrisi aza mä'dudrisi; se ŋgäṛiŋwadrisi äzite Jakina , ago se mä'dudrisi äzite Boaza .