Margus 6 - ÐƎRREIÐIA EŊEN ÐƎMAIJƎN IÐI RƎMWA RIÐU 1993 New Testament (NMNT93)

Ŋen Yesu gənid̶ənu alo yi-Nasəraṯ

1 Yesu nəŋəməñe alo yakəl na nəŋoɽəbaṯe irnuŋ gəlëɽəŋu na ṯaləmis nemateṯe. 2 Na e-Loman ləd̶əmiñəniano Yesu nəŋërrəŋaici led̶a ŋen emajma. Led̶a lwaiña ildi lənaṯəma ldirəwano kaiñ ldaṯa, “Gënəŋu gamoŋga ŋen iŋi pred̶? Ŋen ŋanṯau gënəŋu gerṯo d̶ələŋeṯa ŋen nəsi d̶waiña ṯia? Na gënəŋu com ṯaŋid̶u aŋwara rəŋəra rəlëɽəŋu. 3 Gerṯe fəŋu igi gəɽo ed̶a geicəd̶a, id̶ia gə-Mariam na orəba gə-Yagub na gə-Yusif na gə-Yaud̶a na gə-Siman na gerṯe lorəba əɽəlda ildi ləgəfərlda?” Na lënəŋulu ldəmaned̶e. 4 Yesu nəŋəleiṯi ṯa, “Anabi gananeinia d̶amia alo pred̶, illi irnuŋ gəlëɽəŋu na elorəba əllëɽəŋu na eled̶a legeɽa gəlëɽəŋu.” 5 Na Yesu nəŋerṯe gəɽwad̶aṯia gəbəd̶ia aŋwara yenəŋ alo yakəl, illi nəŋëɽi led̶a rəŋ nano ləmaṯan ildi lwuma nəŋəleid̶i. 6 Na gënəŋu nəŋirəwano ŋen ŋanṯa lënəŋulu lero ləbëndia ŋen ŋəlëɽəŋu na nəŋəməñe irnuŋ nəŋakaldaice alo pred̶ nəŋërrəŋaici led̶a ŋen ŋə-Rəmwa.

Ŋen Yesu gəd̶waṯo ṯaləmis red̶ neməñe eɽijan

(Maṯṯa 10:5-15Luka 9:1-6)

7 Orn Yesu nəŋundəd̶i ṯaləmis red̶ neməñe eɽijan nəŋələd̶waṯe eɽijan eɽijan, gënəŋu nəŋəlnaice ŋələŋe ṯa aiyəmamiñi nusila neicia led̶a nano. 8 Na gënəŋu nəŋəlwaɽəṯi ṯa, “Aiyerṯe yarrəpa laŋge lənəŋ ŋen ŋanṯa ed̶ad̶, walla aicəba walla ërrua walla gərus igalceb, illi ləfra. 9 Orn nəŋəleiṯi ṯa, alëɽəni nḏəbina erəmanəŋ na ṯa alëɽəni erenia nano gonto ikərəŋ, gerṯe nəɽijan.” 10 Na nəŋəleiṯi ṯa, “Ndə ñəgəbënṯia egeɽa gənəŋ ɽaŋəd̶aṯrau ṯia, oro ñauməñe, ndə ñagəŋgaṯia alo yakəl. 11 Na alo yenəŋ ndə led̶a lero ləndəŋënṯia na lderṯe ləndənaṯa, məñr alo yakəl esen ñapweini abəɽətua erəmanəña eralo ṯa, ŋen iŋi aŋəɽeṯe d̶aməd̶aṯa d̶əgeiyo led̶a ildei.” 12 Nṯia ṯaləmis neməñe nəyërrəŋaici led̶a ŋen ṯa aləŋgiṯi ŋen eŋen ŋeicia aloɽəbaṯe Rəmwa nano. 13 Na yënəŋulu nimanuñi nusila neicia led̶a nano lwaiña na necwad̶aṯe led̶a ŋela nano ildi lwuma niyəleid̶i.

Ŋen nəŋəraiñ ne-Yuanna igi gənanaid̶ia mamuḏiya

(Maṯṯa 14:1-12Luka 9:7-9)

14 Orn eloŋ Iruḏus nəŋəne ŋen iŋi, ŋen ŋanṯa irəŋ gə-Yesu galəŋinu alo pred̶ Led̶a ləmaṯan laṯa, “Fəŋu Yuanna igi gənanaid̶ia mamuḏiya, gatud̶inu eŋəɽaiñ, nṯia ŋabəɽa ŋwaiña ŋabəd̶ia ŋəmëɽria ŋuga.” 15 Led̶a ləmaṯan ldaṯa, “Fəŋu Iliya,” na ləmaṯan ldaṯa, “Gënəŋu gaɽo nabi yarno anəbiya yepənde.” 16 Orn ndə Iruḏus gəno ŋen iŋi, nəŋaṯa, “Fəŋu Yuanna igi egəṯəbaṯəma nda alo, gënəŋu gatud̶inu eŋəɽaiñ.” 17 Ŋen ŋanṯa Iruḏus gafo gad̶waṯo askari ṯa aiyëndi Yuanna aiyəmëɽi isijən, Iruḏus gid̶u ŋen iŋi, ŋen ŋanṯa Yuanna gafo gad̶ərnəma eŋen ŋ-Iruḏiya igi gəɽo wasen Filibus orəba g-Iruḏus. Ŋen ŋanṯa gafo garno Iruḏiya. 18 Na Yuanna gafo gaɽwatiṯəma ṯa, “Ŋen ŋëd̶əñinu ṯa agama wuji goralo.”

19 Na Iruḏiya nəŋəciṯi Yuanna ano kaiñ, na ṯaŋwonaṯo gəmaɽiña, orn gënəŋu gero gəɽwad̶aṯa. 20 Ŋen ŋanṯa Iruḏus gad̶əñia Yuanna ŋen ŋanṯa galəŋeṯo ṯa, Yuanna gaɽo ed̶a gəd̶urwaṯo eŋen, na gatəɽe, nṯia gënəŋu ṯaŋəmarəmoṯo. Ndə Iruḏus gəno ŋen ŋe-Yuanna, ŋen nəŋəmawad̶e egare, orn gënəŋu nəŋəmanaṯe ŋen ŋwaiña d̶əŋərad̶a nano. 21 Orn ndə liga leṯo ləd̶ələŋənia d̶-Iruḏus, gënəŋu nəŋid̶i ëməd̶ia nəŋundəd̶i nələŋ na nələŋ naskari na led̶a loɽra eŋen lalo yi-Jalil. 22 Na ŋere ŋ-Iruḏiya nəŋënṯi egeɽa ṯaŋərṯo, Iruḏus na led̶a ildi ləfəlda ldəŋërṯi nano kaiñ, na eləŋ Iruḏus nəŋeiṯi ŋere ṯa, “Eɽəd̶iñe waŋge gənəŋ agwonaṯa, na igid̶i eŋanaice.” 23 Nəŋəlwaɽəṯi ŋere d̶aləfiad̶a ṯa, “Waŋge agaiñeɽəd̶ia igid̶i eŋanaice, na ndə agwonaṯa ŋələŋe igid̶i eŋanaice ŋələŋe eŋələŋ ŋəmaṯan ŋəlëɽəñi.” 24 Nṯia ŋere nəŋəməñe nəŋəɽe nəŋeɽəd̶e ləŋgen na nəŋəmeiṯi ṯa, “Igid̶i yeɽəd̶e eləŋ wande?” Na ləŋgen nəŋuɽəbiṯi eŋen nəŋeiṯi ṯa, “Eɽəd̶əma nda le-Yuanna igi gənanaid̶ia mamuḏiya.” 25 Na ŋere nəŋoɽəbaṯe eləŋ Iruḏus nano taltal nəŋəmeɽəd̶e ṯa, “Egwonaṯa ṯa ŋaiñənaice nda le-Yuanna igi gənanaid̶ia mamuḏiya igasaniya.”

26 Na eləŋ Iruḏus nəŋirəwano kaiñ, ŋen ŋanṯa gafo galəfe led̶a nëiñua lwaiña ildi ləfəlda, orn gënəŋu gero gəɽwad̶aṯa gəned̶a d̶əɽəd̶ia d̶əŋere. 27 Na taltal eləŋ Iruḏus nəŋəd̶waṯe askari nəŋəlwaɽəṯi ṯa, aiyəɽe isijən aiyəṯəbaṯa Yuanna nda alo na aiyapa, orn askari niyabəṯa isijən neṯəbaṯa Yuanna nda alo. 28 Na yënəŋulu niyapa nda le-Yuanna igasaniya niyenaice ŋere, na ŋere nəŋape nəŋənaice ləŋgen. 29 Na ndə ṯaləmis yeno ŋen iŋi, niyela niyape aŋəno ye-Yuanna niyuri ed̶el.

Ŋen Yesu gəsi led̶a ŋəsa aləf d̶enəŋ

(Maṯṯa 14:13-21Luka 9:10-17Yuanna 6:1-14)

30 Orn led̶a ildi Yesu gəd̶waṯəlo ṯa, alërrəŋaid̶i ŋen ldəmoɽəbaṯe nano ldəmalwaɽəṯi ŋen pred̶ iŋi lid̶u na lërrəŋaid̶u. 31 Na gënəŋu nəŋəlwaɽəṯi ṯa, “Aɽr alo yenəŋ aləsoŋ ñamiñəniano aten.” Ŋen ŋanṯa led̶a lwaiña kaiñ ləlderldeṯa nano, na ṯaləməlad̶o nano.

Yesu na ṯaləmis lderṯe ləfid̶a liga ṯa aləwase. 32 Nṯia lënəŋulu ldënṯi id̶əpundr d̶eŋau ldabəṯa aləsoŋ ed̶əñwa. 33 Orn led̶a lwaiña ldələseici ləbəṯa alo yakəl ldələləŋeṯe, nṯia lënəŋulu ldəməñe irnuŋ pred̶ ldəlaldəñəṯe tu rəmanəñara alo, ldələbward̶aṯe nëiñua. 34 Ndə Yesu gəməño id̶əpundr nəŋəseici led̶a lwaiña kaiñ nəŋəlgiyace ŋəbaiya nano, ŋen ŋanṯa larno yaŋala isi ed̶a gerlo nano gələsia. Na gënəŋu nəŋəlërrəŋaici ŋen ŋwaiña.

35 Na erregano ṯaləmis nemeṯa nano nimeiṯi ṯa, “Uləŋgi gaɽo, na ləgafr ed̶əñwa. 36 Đwaṯo led̶a alɽe irnuŋ na eneɽa ini nəfo ṯwaiñ ṯa, alilid̶i laŋge ləsənia.” 37 Yesu nəŋəluɽəbiṯi eŋen nəŋəleiṯi ṯa, “Naicərldo laŋge ñaganəñaŋ ṯa aldəse?” Na yënəŋulu nimeiṯi ṯa, “Ñagabəla ñilid̶i ragif irri rerṯo gərus yarno jənei ered̶ia gəɽijan ṯa, ñalnaice led̶a ṯa aldəse?” 38 Na gënəŋu nəŋəleiṯi ṯa, “Ñagerṯo ragif mənau? Mbər ñalnwane.” Na ṯaləmis niyabəla niyəlpwaiñe niləfid̶i, niyela nimeiṯi ṯa, “Ñagerṯo ragif d̶enəŋ na ləmme ləɽijan.” Ragif na ləmme 39 Orn Yesu nəŋəlwaɽəṯi ṯa, ailwaɽəṯi led̶a ṯa alɽaŋe alo eŋəɽo eŋəɽo nəŋaiña ŋed̶e. 40 Nṯia led̶a pred̶ ldəɽaŋalo eŋəɽo, alo yemaṯan ered̶ia red̶, na ləmaṯan ered̶ia d̶enəŋ. 41 Na Yesu nəŋəme ragif d̶enəŋ na ləmme ləɽijan nəŋənwanəd̶e elo nəŋələbuŋṯi, nəŋəlgere ano nəŋəlnaice ṯaləmis ilëɽəŋu ṯa, aiyəlnanaice led̶a, na ṯaləmis niləkarnəd̶əṯi led̶a. Na com niyəme ləmme niləkarnəd̶əṯi led̶a pred̶. 42 Led̶a pred̶ ldəse ldəbeṯe. 43 Na ṯaləmis niyərreid̶i ŋəsa ŋəṯënu ŋəteta na laŋge ildi lələmme ləteṯa com, niyornḏejaice ilkufa red̶ neməñe eɽijan. 44 Led̶a ildi ləso ragif na ləmme laɽo aləf d̶enəŋ lərrwa.

Ŋen Yesu gerldo nəŋau

(Maṯṯa 14:22-33Yuanna 6:15-21)

45 Taltal Yesu nəŋəlwaɽəṯi ṯaləmis ilëɽəŋu ṯa aiyënṯi d̶əpundr d̶eŋau ṯa aiyuɽəd̶i ed̶əbarlda d̶oɽra ŋu nëiñua aiyəɽe alo yi-Beṯsaiḏa, na ṯa aŋəd̶waṯe led̶a pred̶ com. 46 Ndə gəd̶waṯo led̶a nəgabəṯa najyən ṯa aŋəṯurṯi Rəmwa. 47 Ndə erregano gəɽo na d̶əpundria d̶afo ed̶əbarlda iligano. 48 Na Yesu gafo aləsoŋ nëṯəndia, Na gënəŋu nəŋələseici ṯa yaicwaro kaiñ ŋen ŋanṯa d̶əbera d̶ura d̶wonaṯa d̶okoɽəbaica d̶əpundria nḏurṯu. Orn ulaldiṯano bərni bərnia gënəŋu ṯaŋerldo nəŋau nəŋəleṯa nano, na gafo gwonaṯa gələməñaṯa. 49 Na ṯaləmis nimaseici gəbərlda nəŋau myaṯa enare, usila gi! Niyerəjaice olia. 50 Ŋen ŋanṯa yënəŋulu pred̶ yaseicəma nid̶əñiṯalo kaiñ. Orn gënəŋu nəŋəlwaɽəṯi ṯa, “Ëɽənr d̶əñano fiñi, ñeiṯe ñagəd̶əñialo.” 51 Na Yesu nəŋəleṯa nano nəŋënṯi d̶əpundr d̶eŋau na d̶ebera nḏəd̶un. Na yënəŋulu nəŋen nəŋəlajəbinṯi kaiñ. 52 Ŋen ŋanṯa lafo laijəba ŋen ŋopia ŋəragif irri rəneinu led̶a aləf d̶enəŋ, na ṯia nara enen nabɽwaŋəno.

Ŋen Yesu geid̶u led̶a alo yi-Jannisaraṯ

(Maṯṯa 14:34-36)

53 Ndə luɽəd̶u ed̶əbarlda d̶oɽra ldərəmaṯe alo yi-Jannisaraṯ ëṯəndia nano alo yakəl ldakase d̶əpundria ed̶en. 54 Ndə ləməño id̶əpundr d̶eŋau taltal led̶a ldələŋeṯe Yesu. 55 Na lënəŋulu ldobəd̶e alo pred̶ ldəmaməṯia led̶a pred̶ lwuma aləŋgəremya alo pred̶ isi ləno ṯa gënəŋu gafau. 56 Na ndə gënəŋu gënṯu irnuŋ gəta walla goɽra, walla eneɽa ini ed̶əñwa ldarəpaṯa led̶a lwuma alo led̶a lauwəlid̶iṯa ldəmeɽəd̶e ṯa alpərre erenia gəlëɽəŋu gəɽo d̶urṯu. Na led̶a pred̶ ildi ləpərrəma ldeid̶ini.