Ŋen ləfo alo yi-Kərund̶us
1 Ndə Bulus gətwod̶o alo y-Ad̶ina nəgabəṯa alo yi-Kərund̶us, 2 nəŋəfid̶i maje gənəŋ gəɽo Yawuḏ gəbërnia Akila galo yi-Bunṯis, geṯo alo y-Iṯalia wasenga gəbërnia Briskila, ŋen ŋanṯa eləŋ Kuluḏius gëɽu ŋen ṯa Alyawuḏ pred̶ aiyətwod̶e alo yi-Rumiya. Na Bulus nəgabəla nəŋəlnwane, 3 na ldəɽaŋəlda ṯalid̶əlda ŋəmëɽria ŋonto, ŋen ŋanṯa ŋəmëɽria eŋen ŋadwad̶a ñəkema. 4 Na lukuɽəbijəd̶əṯu eŋen emajma ñoman pred̶ e-Loman ləd̶əmiñəniano Alyawuḏya na Alyunaniyinya gwonaṯa gələbeica ŋen ŋə-Rəmwa ŋopia.
5 Ndə Sila na Ṯiməd̶awus leṯo alo yi-Makəḏuniya d̶əge ldəfid̶i Bulus gəbërrəŋaicia led̶a ŋen kaiñ ṯaŋəɽwatiṯu Alyawuḏ ŋen ṯa Yesu fəŋu gəɽo Almasiya d̶eṯəm. 6 Na ndə ləmwara na ldəned̶e d̶ërrəŋaid̶ia id̶i orn nəŋape ndrenia nəlëɽəŋu nəŋəlupwi abəɽətua nəŋəleiṯi ṯa, “Ŋəfəni eŋalo ŋarəmad̶aṯənde ṯia nəŋəɽwa eŋalo, igënəñi igëpi. Đəñid̶i egabəla ṯa yërrəŋaici led̶a ŋen ildi gerṯe laɽo Alyawuḏ.” 7 Na nəŋətwod̶e nəgabəṯa eɽa gəmaje gəbërnia Ṯiṯus Yusṯus, igi gabuŋṯia Rəmwa na eɽa gəlëɽəŋu gandraid̶o almajmaya. 8 Krisbus, eləŋ gəmajma gëndu ŋen ŋ-Eləŋ Yesu na led̶a pred̶ legeɽa gəlëɽəŋu, na led̶a lwaiña lalo yi-Kərund̶us ndə ləno ŋen ŋə-Bulus ldëndi na ldəneini mamuḏiya. 9 Na uləŋgi gənəŋ ŋen ŋamiñiṯu Bulus na Eləŋ Yesu nəŋəmeiṯi ṯa, “Ŋerṯe agəd̶əñialo! Ɽwato, ŋerṯe agəbwaiña ŋəma, 10 ləgafo, na ed̶a gero gənəŋ gid̶i aŋəɽwad̶aṯe aŋëndi walla aŋanaice ŋen ŋeicia ŋənəŋ ŋen ŋanṯa egerṯo led̶a lwaiña alo isi.” 11 Nṯia Bulus nəŋəɽiñad̶aṯe iṯəlia na nubwa d̶enəŋ nəŋəməñe gonto gəbërrəŋaicia led̶a ŋen ŋə-Rəmwa alo isei.
Ŋen ŋə-Kalyun na ŋə-Bulus
12 Orn ndə Kalyun gəɽo eləŋ galo y-Akaiya, Alyawuḏ nirreid̶i ŋen ldəɽo niyëndi Bulus nemaiyeɽe nəsəria, 13 niyaṯa, “Maje igi gërəkeid̶ia led̶a ṯa aləbuŋṯi Rəmwa ŋen iŋi Alganun esaiñ yened̶o!” 14 Orn ndə Bulus gwonaṯa gəlwaɽa, Kalyun nəŋeiṯi Alyawuḏ ṯa, “Ndə ŋen ŋoɽra ŋeicia na ŋəfo mənna ŋid̶ənu, egaɽwad̶aṯa egənna ŋen eŋalo ya Alyawuḏ, 15 orn ŋen ŋanṯa ŋen iŋi ŋəd̶ukuɽəbijəd̶əṯia egole, na ŋəndrəŋ na ŋalganun esalo, mbər ñanwane ŋen ñaganəñaŋ. Eganed̶o egakəmia ŋen iŋi igënəñi.” 16 Na gënəŋu nəŋələmiñi igasəria. 17 Na led̶a pred̶ ldëndi Sosṯanis, igi gəɽo eləŋ galmajma, ldəmëpwaṯe eɽa nëiñua gasəria, orn eləŋ Kalyun ŋen nəŋerṯe ŋəmuɽia ŋənəŋ.
Ŋen Bulus goɽəbaṯo alo y-Anṯakiya
18 Orn Bulus nəŋəɽaŋe alo isei ñoman ñwaiña təŋ, orn nəŋəṯad̶e lorəba nəgabəṯa alo yi-Suriya id̶əpundr d̶eŋau, na Briskila na Akila ldabəlalda. Na alo yi-Kangiriya Bulus nəŋəbəd̶əni nda ŋen ŋanṯa ŋen iŋi gəfo gëɽu. 19 Orn ndə lərəmaṯo alo y-Afəsus nəŋəlṯad̶e nəŋënṯi emajma ldukuɽəbijəd̶əṯi Alyawuḏya eŋen. 20 Ndə leɽəd̶əma ṯa aŋəɽaŋe alo esen Bulus nəŋəned̶e. 21 Orn ndə gwonaṯa gabəla d̶əge nəŋəleiṯi ṯa, “Igid̶i yoɽəbəd̶ia ndə Rəmwa rəŋgiṯiñi.” Orn nəŋënṯi id̶əpundr d̶eŋau nəŋətwod̶e alo y-Afəsus.
22 Na ndə gərəmaṯo alo yi-Gaisariya nəŋəɽe alo yi-Ursalim nəŋəne led̶a ëiñua ikanisa, na nəgabəṯa Anṯakiya. 23 Na ndə gəɽaŋo alo isei ñoman ñamaṯan nəŋakaldaice alo ikanisa pred̶, alo yi-Galəṯiya na yi-Frijiya, nəŋonḏəce ṯaləmis pred̶.
Ŋen Abullos gəfo alo y-Afəsus na y-Akaiya
24 Maje gənəŋ g-Alyawuḏ gəbërnia Abullos galo yi-Skandriya geṯo alo y-Afəsus. Gënəŋu galəŋeṯo gəɽwata na galəŋeṯo ad̶am gə-Rəmwa ŋopia. 25 Gënəŋu gafo gërrəŋeinu ŋen ŋ-Eləŋ Yesu, gerṯo ŋabəɽa ŋə-Rəmwa kaiñ, gabërrəŋaicia led̶a ŋen kaiñ d̶urri iŋi ŋə-Yesu na gënəŋu galəŋeṯo mamuḏiya d̶e-Yuanna d̶onto. 26 Na gënəŋu gërrəŋaicu led̶a ŋen emajma ŋabəɽaŋa ŋəd̶aiña ŋero, orn ndə Briskila na Akila lənaṯəma ldəmame ldəmaiyeɽe egeɽa taltal ldəmërrəŋaici ŋen ŋəd̶ad̶ d̶ə-Rəmwa ŋopia. 27 Na ndə Abullos gwonaṯa gabəṯa alo y-Akaiya lorəba ləkanisa ldəmaməd̶aṯe ldəwërd̶əṯi ṯaləmis tu ad̶am ṯa, “Aŋënṯr maje igi araga gonto.” Ndə gərəmaṯo tu d̶əge nəŋaməd̶aṯe led̶a kaiñ ildi lëndu ŋen ŋə-Rəmwa ŋen ŋanṯa d̶ənaica məɽəməɽeñ d̶ə-Rəmwa, 28 ŋen ŋanṯa gënəŋu gad̶ad̶amo Alyawuḏ ŋabəɽaŋa ŋə-Rəmwa led̶a nëiñua, na gaŋaicəlo ŋen ad̶amga ṯa Yesu gaɽo Almasiya d̶eṯəm.
© New Testament in Nuba Moro © Bible Society in Sudan, 1993.