Ŋen ŋəled̶a ildi ləbërrəŋaid̶ia ŋen ŋəŋəɽəwen
1 Usila Gətəɽe gaṯa d̶urri ṯa iliga lənḏurṯu led̶a ləmaṯan lid̶i aləŋgiṯi ŋen ŋəd̶wonaṯa i-Yesu, ŋen ŋanṯa lënəŋulu lanna ŋen ŋənusila ini nələmamata eŋen ŋeicia, na lanna d̶ërrəŋaid̶ia ŋen id̶i nusila neicia nəɽwata, 2 led̶ala ildi lerṯo ŋen ŋəɽijan na ildi ləɽwata ŋəɽəwen, ildi nare enen nid̶ənu nəɽo təgətəg. 3 Lënəŋulu laɽətriṯia led̶a ṯa aləmaməd̶e na lero ləŋgiṯia led̶a aləse ŋəsa ŋəmaṯan iŋi Rəmwa riṯu led̶a ildi lëndu ŋen ŋəlëɽəŋu ṯa aləse na aləŋërṯi nano. 4 Laŋge pred̶ laŋəra ildi Rəmwa rid̶əlo wagero gənəŋ gid̶ənu ṯa aŋənid̶əni ndə led̶a ləmo leɽəd̶o Rəmwa ldəŋërṯi nano, 5 ŋen ŋanṯa laŋge lid̶ənu ltəɽe ŋenŋa ŋə-Rəmwa na d̶əṯurṯiad̶a Rəmwa.
Ŋen ŋebai gəŋəra gə-Yesu Almasiya
6 Ndə agəɽwatiṯia lorldalo ŋen iŋi, agəd̶uɽəd̶ənṯia Almasiya Yesu ŋopia, ŋəŋgi agəmicinia ŋenŋa ŋəd̶wonaṯa na ŋenŋa ŋəd̶ërrəŋaid̶ia ŋen ŋəd̶eṯəm id̶i agərəmoṯwa ṯəŋid̶u. 7 Orn ned̶o kaiñ ŋen pred̶ ŋəpiano iŋi gerṯe ŋə-Rəmwa na ŋəɽo ŋiɽəṯiano. Irnḏeinu məldin eŋen ŋə-Rəmwa. 8 Đirnḏeicia d̶aŋəno d̶aməd̶aṯa led̶a aten, orn d̶id̶ia d̶əŋen ŋə-Rəmwa d̶id̶i ad̶aməd̶aṯe led̶a eŋen pred̶, ŋen ŋanṯa d̶erṯo ŋen ŋëɽənu ŋen ŋanṯa d̶əməṯia id̶i ed̶alo na ŋen ŋanṯa d̶əməṯia id̶i d̶id̶i ad̶ela. 9 Ŋen iŋi ŋaɽo d̶eṯəm na ŋarəjad̶aṯo ṯa led̶a pred̶ alëndi. 10 Ŋen ŋafəṯia ləgëbəd̶ia ŋəmëɽria kaiñ na ləgabirndeicia ŋen, ŋen ŋanṯa ləgaṯurṯia ŋen i-Rəmwa irri rəməṯia, rënəŋu irri rəɽo Đëbəria d̶əled̶a pred̶, orn d̶aled̶a ildi lëndu ŋen ŋəlëɽəŋu d̶urri. 11 Ɽwato na ŋërrəŋaici led̶a ŋen iŋi. 12 Ŋerṯe agəŋgiṯia ed̶a gənəŋ aŋad̶aməce eŋen ŋen ŋanṯa agaɽo ëd̶əm, orn id̶u ŋen ŋopia jaica jaica ṯa led̶a ildi lëndu ŋen ṯaləŋirnḏeicu eŋen agəɽwata na eŋen pred̶ agəbəd̶ia, na id̶əbwa, na ed̶wonaṯa, na ed̶ətəɽia d̶egare. 13 Liga igəmulu egeṯo ɽaŋo eŋen iŋi agabëgərṯia led̶a ad̶am gə-Rəmwa na agaɽwata na agəbërrəŋaid̶ia ŋen ŋə-Rəmwa. 14 Ŋerṯe agəŋgiṯia d̶ənaica id̶i agerṯo id̶i Usila Gətəɽe gənaicaŋa eŋen iŋi ŋəlwaɽənu anəbiyaya ananoŋ na liga nələŋ nəkanisa nëɽiaŋa rəŋ nano. 15 Id̶u ŋen iŋi jaica jaica, ɽaŋo eŋen iŋi araga gonto, ṯa led̶a pred̶ alseici ŋen ŋəlaɽəŋa. 16 Rəmoṯo etam gəlaɽəŋa na d̶ërrəŋaid̶ia ŋen d̶əlaɽəŋa. Endəcu ŋen iŋi, ŋen ŋanṯa ndə agəbəd̶ia ṯia agid̶i ŋëbəri etam gəlaɽəŋa na led̶a ildi lənaṯaŋa com.
© New Testament in Nuba Moro © Bible Society in Sudan, 1993.