Maṯṯa 15 - ÐƎRREIÐIA EŊEN ÐƎMAIJƎN IÐI RƎMWA RIÐU 1993 New Testament (NMNT93)

Ŋen ŋəd̶ërrəŋaid̶ia d̶əbapanda ləpənde

1 Alfarisiyin na led̶a ləmaṯan ildi ləbërrəŋaid̶ia ŋen ŋ-Alganun ldəməñe alo yi-Ursalim ldeṯa Yesu nano, ldəmeɽəd̶e ldaṯa, 2 “Ŋen ŋanṯau ṯaləmis elaɽəŋa yegera ŋen ŋəled̶a loɽra? Yënəŋulu yaber ywasənia rəŋ ndə yesa.” 3 Gënəŋu nəŋəluɽəbiṯi eŋen nəŋaṯa, “Ŋen ŋanṯau ñagəgera Alganun yi-Rəmwa ṯa ñid̶i ŋen ŋeṯalanda? 4 Ŋen ŋanṯa Rəmwa ralwaɽo ṯa, ‘Đəñiṯr eṯalo na ləŋgalo’, na, ‘Ed̶a igi gəɽwata ŋen ŋeicia ŋəgeiya eṯen walla ləŋgen com, ŋgiṯəmar aŋəɽiñəni’. 5 Orn ñagaɽwata ṯa, ‘Ndə ed̶a gənəŋ gəlwaɽəṯu eṯen na ləŋgen ṯa, egafo egaɽwad̶aṯa egəndaməd̶aṯa orn eganaico Rəmwa laŋge əllëɽəñi’, 6 gerṯe gënəŋu aŋəd̶əñiṯi eṯen na ləŋgen. Nṯia ñagagero ŋen ŋə-Rəmwa ṯa ñid̶i ŋen ŋeṯalanda. 7 Ya led̶a ñəŋgi ñagerṯo ŋen ŋəɽijan, Isaiya galwaɽo ŋen ŋə-Rəmwa d̶eṯəm eŋen eŋalo ndə gaṯa,

8 ‘Led̶a ildi laiñənanaica d̶amia ëiñuaya,

orn nare enen nafo nwaldaŋ ñi nano.

9 Lënəŋulu laiñəbuŋṯia məɽəməɽeñ,

ldërrəŋaid̶i ŋen ŋəled̶a orn ldaṯa ṯa ŋen iŋi ŋə-Rəmwa’.”

Ŋen ŋəlaŋge ildi ləbəd̶ia ed̶a gətaŋa

(Margus 7:14-23)

10 Na Yesu nəŋundəd̶i led̶a lwaiña ṯa almarraid̶e nano, nəŋəleiṯi ṯa, “Nər na ñaləŋeṯe ŋen iŋi! 11 Gerṯe laŋge ildi ləbënṯia igëiñua yed̶a lamid̶ia gətaŋa, orn laŋge ildi ləməña igëiñua, fəŋulu ləmid̶ia gətaŋa.” 12 Ṯaləmis nemeṯa nano nimalwaɽəṯi ṯa, “Agaləŋeṯo ṯa Alfarisiyin yeiciano kaiñ, ŋen yeno ŋen iŋi ŋəlaɽəŋa?” 13 Gënəŋu nəŋəluɽəbiṯi eŋen nəŋaṯa, “Nuɽi pred̶ ini Bapa gəlëɽəñi igi gəfo elo gero gəlwad̶a, nënəŋulu nid̶i anəbəɽaini alo. 14 Ŋgiṯərldo yënəŋulu yaɽo led̶a ləŋəlisi ildi ləbërrəŋaicia led̶a rad̶ ildi ləŋəlisi com. Ndə ed̶a gənəŋ gəŋəlisi gəbərldia ed̶a gwomən ed̶ad̶ igi gəŋəlisi com, lënəŋulu lid̶i aliɽəṯi egaba ndəm.” 15 Orn Buṯrus nəŋəmuɽəbiṯi eŋen ṯa, “Aŋaicənde ŋen iŋi ŋəwujənu.” 16 Na Yesu nəŋaṯa, “Ñaŋ com ñagaijəba d̶ələŋeṯa məldin? 17 Ñagaijəba ṯa laŋge ildi ləbënṯia igëiñua yed̶a labəṯa egare ldəməñe id̶urṯu? 18 Orn ŋen iŋi ŋəməña igëiñua yed̶a ŋeṯo egare, na fəŋen iŋi ŋəbəd̶ia ed̶a gətaŋa. 19 Ŋen ŋeicia, na d̶əɽiñəd̶ia, na d̶əɽaŋa lijila ɽrəto ləmameinu eneɽa, na d̶əɽaŋa ñereña ñəmulu ñəmameinia eneɽa, na ŋoɽoma, na ŋəɽəwen, na d̶əbwaid̶ia ŋenia, laŋge ildi leṯo egare. 20 Fəlaŋge ildi ləbəd̶ia ed̶a gətaŋa, orn ŋen ṯa ed̶a gəsa rəŋəra rero rwasənia raber rəmid̶ia gətaŋa.”

Ŋen ŋəd̶wonaṯa d̶wuji gəɽo Gananiya

(Margus 7:24-30)

21 Na Yesu nəŋəməñe alo yakəl nəgabəṯa alo yi-Sur na alo yi-Siḏa. 22 Na wuji gənəŋ igi gəɽo Gananiya geṯo alo yakəl nəŋəraice olia nəŋaṯa, “Ya Eləŋ, Id̶ia gə-Ḏawuḏ, giyacəñe ŋəbaiya nano. Ŋere ŋəlëɽəñi ŋəɽəbwa ŋerṯo usila nano geicia gëbənḏeicia kaiñ.” 23 Orn Yesu nəŋerṯe gəmuɽəbiṯia eŋen ŋənəŋ. Na ṯaləmis ilëɽəŋu nemeṯa nano nimeiṯi ṯa, “Đwaṯəma, ŋen ŋanṯa gënəŋu garəjaica olia məldin nëndr nḏurṯu.” 24 Yesu nəŋəluɽəbiṯi eŋen nəŋaṯa, “Igad̶weinṯu yaŋala isi yeṯwo eled̶a l-Israyil ikərəŋ.” 25 Wuji nəŋela nəŋəmud̶əñiṯi alo nəŋaṯa, “Ya Eləŋ aməd̶aṯəñe.” 26 Na Yesu nəŋəmuɽəbiṯi eŋen nəŋaṯa, “Gerṯe ŋen ŋaŋəra ndə ed̶a gəma ŋəsa ŋəñere oro aŋëuwujəṯi ñina.” 27 Wuji nəŋəmeiṯi ṯa, “Đeṯəm, ya Eləŋ. Orn com ñina ñasa aicəba igi gəbərtəṯia alo gəled̶a lerṯəlo.” 28 Orn Yesu nəŋəmuɽəbiṯi eŋen nəŋaṯa, “Ya wuji, d̶wonaṯa d̶əlaɽəŋa d̶oɽra! Ŋen ŋid̶i aŋəfeṯe ŋarno agwonaṯa.” Na ŋere ŋəlëɽəŋu nəŋeid̶ini iliga lakəl d̶urri.

Ŋen led̶a lwaiña leid̶inu

29 Yesu nəŋəməñe alo yakəl nəŋerlde d̶əbarlda nano d̶oɽra d̶əbërnia d̶əbarlda d̶ə-Jalil. Orn nəgabəṯa naiyən nəŋəɽaŋe alo tu. 30 Na led̶a lwaiña leṯəma nano, ldəmama led̶a ləɽo ləbəco, na ildi laijəba aŋənoyia, ildi ləŋəlisi, na ildi laijəba ləɽwata, na lwaiña təŋ ldələkëɽi Yesu nëiñua. Na Yesu nəŋəleid̶i pred̶. 31 Nṯia led̶a ldirəwano ndə ləseicu led̶a laijəba ləɽwata ṯaləɽwato, na led̶a laijəba aŋənoyia ldëbərd̶i egaŋəno, na led̶a ləɽo ləbəco ṯalerldo, na led̶a ləŋəlisi ṯaləseid̶u, ldənanaice Rəmwa ŋaɽrwa r-Israyil.

Ŋen Yesu gənaico led̶a ŋəsa ildi ləɽo aləf marldwan

(Margus 8:1-10)

32 Yesu nəŋundəd̶i ṯaləmis ilëɽəŋu nəŋəleiṯi ṯa, “Egageiyaca led̶a ŋəbaiya nano ŋen ŋanṯa lënəŋulu ləgafərlda d̶əñid̶i ñoman ñiɽijin, na lënəŋulu lero lələsənia, egaber egwonaṯa egələd̶waṯa ləcoiña, ŋen ŋanṯa aŋgaica lid̶i aɽred̶e eŋəɽwa na alirətəṯi ed̶ad̶.” 33 Na ṯaləmis ilëɽəŋu nimeiṯi ṯa, “Ləgafr ed̶əñwa na ñagamaŋga ragif irri rwaiña ṯa led̶a ildi lwaiña aləbeṯe?” 34 Na Yesu nəŋəleiṯi ṯa, “Ñagerṯo ragif mənau?” Yënəŋulu niyaṯa, “Ñagerṯo ragif d̶enəŋ ndrəməñe rəɽijan na ləmme ləmaṯan.” 35 Na Yesu nəŋəlwaɽəṯi led̶a ṯa alɽaŋe alo, 36 gënəŋu nəŋəme ragif d̶enəŋ ndrəməñe rəɽijan, nəŋələbuŋṯi nəŋəlgere ano nəŋəlnaice ṯaləmis na ṯaləmis nəlnanaice led̶a. 37 Na led̶a pred̶ ldəse ldəbeṯe, na ṯaləmis nirarreid̶i ŋəsa ŋəṯënu ŋəteta, nəŋonḏəjaice none d̶enəŋ nəməñe nəɽijan. 38 Na led̶a ildi ləso laɽo aləf marldwan lərrwa, na liji əlɽəlda na ñere com. 39 Na gënəŋu nəŋəd̶waṯe led̶a, nəŋënṯi id̶əpundr d̶eŋau, nəŋəɽe alo yi-Majḏal.