Maṯṯa 12 - ÐƎRREIÐIA EŊEN ÐƎMAIJƎN IÐI RƎMWA RIÐU 1993 New Testament (NMNT93)

Ŋen ŋəd̶ərəmoṯwa d̶əŋen gə-Loman ləd̶əmiñəniano

1 Iliga lakəl Yesu nəŋəməñe inii e-Loman ləd̶əmiñəniano. Na ṯaləmis ilëɽəŋu niyecoiñəṯe, nəməndiñe ŋwala ṯailəmuraicu elo ṯailəso. 2 Orn ndə Alfarisiyin yiseicu ŋen iŋi niyeiṯi Yesu ṯa, “Seicu, ṯaləmis elaɽəŋa yëbəd̶ia ŋen iŋi ŋəd̶əñinu e-Loman ləd̶əmiñəniano.” 3 Yesu nəŋəleiṯi ṯa, “Ñagero ñagəbëgəria ŋen iŋi Ḏawuḏ gid̶u, ndə gënəŋu gəcoiña, na led̶a ildi ləfəlda com? 4 Gënəŋu gënṯu egeɽa gə-Rəmwa nəŋəme aicəba igi gëɽənu Rəmwa nëiñua nəŋəse, na ŋen ŋëd̶əñinu ṯa gënəŋu walla led̶a ləfəlda aləse, illi alkana. 5 Walla ñagero ñagəbëgəria ig-Alganun ṯa e-Loman ləd̶əmiñəniano alkana yagera ŋen ŋə-Loman ləd̶əmiñəniano, ndə yibəd̶ia ŋəmëɽria ŋ-Alekəl, orn yënəŋulu yero mənna? 6 Igandəlwaɽəṯia ṯa, waŋge gëni gəməñaṯo Alekəl. 7 Gəbanṯa ñagaləŋeṯo ŋen iŋi Rəmwa rəlwaɽo ṯa, ‘Egwonaṯa ŋəbaiyaŋəno eled̶a lwomən, na gerṯe ŋen ṯa ñañiṯi d̶əɽəd̶ənia’. Ṯa ñagero ñagəsəkia led̶a ildi lero mənna. 8 Ŋen ŋanṯa Id̶ia gə-Led̶a gaɽo Eləŋ gə-Loman ləd̶əmiñəniano.”

Ŋen maje geid̶inu igi d̶əŋ d̶aiyo aŋəno

(Margus 3:1-6Luka 6:6-11)

9 Na Yesu nəŋəməñe alo yakəl nəŋënṯi emajma esen. 10 Na maje gafo gənəŋ d̶əŋ d̶əlëɽəŋu d̶aiyaŋəno. Na led̶a ldeɽəd̶e Yesu ldaṯa, “Ŋen ŋaŋəra ṯa ed̶a gəbakeid̶ia e-Loman ləd̶əmiñəniano? Led̶a leɽəd̶əma ṯia ṯa aləɽwad̶aṯe ləmasəkia.” 11 Yesu nəŋəleiṯi ṯa, “Ǝsëgi eñaŋ ndə gerṯo d̶aŋala id̶i d̶iɽiṯu iləbu e-Loman ləd̶əmiñəniano, nəŋerṯe gəbəla aŋëndia ṯa aŋabəce? 12 Maje gerṯo ŋen ŋoɽra gəməñaṯo d̶aŋala! Nṯia, ŋen ŋaŋəra ig-Alganun ndə ed̶a gəbəd̶ia ŋen ŋəŋəra e-Loman ləd̶əmiñəniano.” 13 Orn Yesu nəŋeiṯi maje ṯa, “Alwe d̶əŋ.” Gënəŋu nəŋwale d̶əŋ, na d̶əŋ nḏəməṯe, d̶arno orəba d̶womən. 14 Orn Alfarisiyin niyeməñe niyəɽwataid̶e ṯa yaɽiña Yesu ṯau.

Ŋen ŋed̶a igi Rəmwa rwoṯəma

15 Yesu nəŋələŋeṯe ŋen iŋi, nəŋgaṯe alo yakəl. Na led̶a lwaiña ṯalmaiyeteṯo alo, na gënəŋu nəŋəleid̶i pred̶ ildi lwuma. 16 Yesu nəŋəlwaɽəṯi ṯa alerṯe ləmid̶ia gələŋinu, 17 ṯa ŋen iŋi ŋəlwaɽənu nabiya Isaiya aŋəɽiñəd̶eini. Gënəŋu gaṯa,

18 “Seicr ed̶a gaiñəd̶uɽəd̶ənṯia igi egwoṯəma,

fəŋu igi gəlëɽəñi gəbwaniya igi igəŋërṯəma nano.

Igid̶i imauwëɽi Usila gəlëɽəñi,

na gënəŋu gid̶i aŋəlwaɽəṯi led̶a lalo pred̶ eŋen

ŋəd̶akəmia d̶əlëɽəñi.

19 Gënəŋu gaber gid̶i alukuɽəbijəd̶əṯi led̶ala eŋen,

na gaber gid̶i aŋərəjaice olia,

na ed̶a gero gənəŋ gid̶i aŋəne olia gəlëɽəŋu erad̶.

20 Gënəŋu gaber gid̶i aŋgere pəɽwapəɽwa id̶i d̶ëndijəd̶ənu,

na gaber gid̶i aŋəɽiñe ëbəd̶ia igi gabwoṯwa d̶ubwano

liga ŋen ŋəd̶urwaṯo ŋəmulu ŋəd̶ama ŋen ŋəɽiano.

21 Na led̶a pred̶ lalo lid̶i alṯurṯi ŋen ŋəlëɽəŋu.”

Ŋen ŋə-Yesu na Balsabul

(Margus 3:20-30Luka 11:14-23)

22 Orn led̶a ldəməṯia Yesu maje igi gerṯo usila nano geicia, gəŋəlisi na gaijəba gəɽwata na Yesu nəŋəmeid̶i, nṯia maje nəŋəɽwad̶aṯe ṯaŋəɽwato na ṯaŋəseid̶u. 23 Na led̶a pred̶ ldirəwano eŋen iŋi Yesu gid̶u ldaṯa, “Ed̶a igi gaɽo Id̶ia gə-Ḏawuḏ?” 24 Orn ndə Alfarisiyin yeno ŋen iŋi niyaṯa, “Ed̶a igi gaber gəmiñia nusila led̶a nano, illi ŋabəɽaŋa ŋə-Balsabul igi gəɽo eləŋ gənusila neicia.” 25 Yesu nəŋələŋeṯe ŋen eŋəṯəɽa eŋen nəŋəleiṯi ṯa, “Ŋələŋe pred̶ iŋi led̶a ləŋələŋe lageiyəd̶aid̶au ŋid̶i aŋəməmdëd̶əni, na ndə led̶a lirnuŋ goɽra walla legeɽa igi ləgeiyəd̶aid̶o eŋen, irnuŋ goɽra walla eɽa gaber gəd̶urwa. 26 Na ndə Seṯan yimiña Seṯan, yënəŋu egeiyad̶aid̶o eŋen, ŋələŋe ŋəlëɽəŋu ŋaber ŋəd̶urwa ŋwonḏəṯo.

27 “Ndə igəmiñia nusila neicia led̶a nano ŋabəɽaŋa ŋə-Balsabul, ñere eñalo ñamiñia nusila neicia ŋabəɽaŋa ŋəsëgi? Ŋen ŋafəṯia ñënəŋulu ñid̶i aiñəndakəme. 28 Orn ndə igəmiñia nusila neicia led̶a nano Usilaga gə-Rəmwa, d̶eṯəm ŋələŋe ŋə-Rəmwa ŋeṯənde nano d̶əge.

29 “Walla fəṯau ed̶a gəɽwad̶aṯa gəbënṯia egeɽa gəmaje gwonḏəṯo aŋalaldəbəje laŋge əllëɽəŋu, illi ndə gakaso maje gwonḏəṯo ananoŋ? Oro gid̶i aŋalaldəbəje laŋge legeɽa gəlëɽəŋu. 30 Ed̶a gənəŋ igi gəber ñagəldəgəfia eŋen, gënəŋu gagiyeiñe, orn ed̶a igi gəber ñagərarreid̶ia ldəga laŋge gënəŋu galəldəd̶ia laŋge alo. 31 Ŋen ŋafəṯia igandəlwaɽəṯia ṯa, ŋen pred̶ ŋeicia na ŋen pred̶ ŋəlwaɽənu ŋəgeiya Rəmwa ŋid̶i aŋgəd̶eini led̶a ildi lid̶u, orn led̶a ildi ləbaṯa ŋen ŋ-Usila Gətəɽe ŋeicia, lënəŋulu laber lid̶i aləŋgəd̶eini ŋen iŋi kwai kwai. 32 Na led̶a pred̶ ildi ləɽwata ŋen ŋəgeiyo Id̶ia gə-Led̶a lid̶i aləŋgəd̶eini ŋen iŋi ŋeicia, orn led̶a ildi ləɽwata ŋen ŋəgeiyo Usila Gətəɽe, lënəŋulu laber lid̶i aləŋgəd̶eini ŋen iŋi kwai kwai, iliga ildi walla iliga ildi lid̶i alela.

Ŋen ŋuɽi na ləd̶ia əllëɽəŋu

(Luka 6:43-45)

33 “Ŋgiṯr uɽi gəŋəra aŋələŋe ləd̶ia ləŋəra walla ŋgiṯr uɽi geicia aŋələŋe ləd̶ia leicia. Ŋen ŋanṯa uɽi galəŋinu iləd̶ia əllëɽəŋu. 34 Ya ñere ñimwa yeicia! Ñaŋ ñəŋgi ñageicia, ñagaɽwad̶aṯa ñagəlwaɽa ŋen ŋəŋəra ṯau? Ŋen ŋanṯa ëiñua yaɽwata ŋen iŋi ŋəməña egare. 35 Ed̶a gəŋəra, gamiñia ŋen ŋəŋəra eŋen ŋəlëɽəŋu ŋəŋəra, na ed̶a geicia gamiñia ŋen ŋeicia, eŋen ŋəlëɽəŋu ŋeicia.

36 “Igandəlwaɽəṯia ṯa, Eloman ildi Rəmwa rid̶i arwakəme alo, led̶a pred̶ lid̶i alokoɽəbaice ŋen pred̶ ŋəpiano iŋi lënəŋulu ləɽwato. 37 Ŋen ŋanṯa ñagid̶i ñëbərni ŋenŋa iŋi ñagəɽwato na ñagid̶i ñakəməni ŋenŋa iŋi ñagəɽwato.”

Ŋen ŋəled̶a lwonaṯa ŋaməla

(Margus 8:11-12Luka 11:29-32)

38 Nṯia led̶a ləmaṯan ləled̶a ildi ləbërrəŋaid̶ia ŋen ŋ-Alganun na 1-Alfarisiyin ldeɽəd̶e Yesu ldaṯa, “Ya Ed̶a gəbërrəŋaid̶ia ŋen, ñagwonaṯa ñagəseicia agəbəd̶ia ŋaməla.” 39 Orn Yesu nəŋəluɽəbiṯi eŋen ṯa, “Led̶a ləliga ildi leicia na ləɽiano eŋen, lënəŋulu lapwaiña ŋaməla, orn laber lid̶i alneini ŋaməla, illi ŋaməla ŋanəbi Yunan. 40 Ŋen ŋarno Yunan gəfo ome egare goɽra ñoman ñiɽijin, ëd̶əñin na uləŋgi, nṯia com Id̶ia gə-Led̶a gid̶i aŋəfeṯe id̶ud̶a ñoman ñiɽijin ëd̶əñin na uləŋgi. 41 Led̶a lalo yi-Ninawa lid̶i altwod̶e iliga ildi Rəmwa rid̶i arwakəme alo led̶ala ləliga ildi na lid̶i aldakəme, ŋen ŋanṯa lënəŋulu lano ŋen ŋə-Yunan ldəŋgiṯi ŋen eŋen ŋeicia ldoɽəbaṯe Rəmwa nano. Na seicr ed̶a gëni gənəŋ gəməñaṯo Yunan. 42 Eləŋ gəɽəbwa galo yenəŋ ed̶əɽəd̶alo gid̶i aŋətwod̶e iliga ildi Rəmwa rid̶i arwakəme alo led̶ala liliga ildi, na gid̶i aŋəlakəme ŋen ŋanṯa gënəŋu geṯo ltuŋga d̶ərṯi ṯa aŋəne d̶ələŋeṯa ŋen nəsi d̶ə-Suliman. Na seicr, ed̶a gëni gənəŋ gəməñaṯo Suliman.

Ŋen ŋəd̶oɽəbaṯa usila geicia ed̶a nano

(Luka 11:24-26)

43 “Ndə usila geicia gəməño ed̶a nano, ṯaŋakaldaico alo yero ŋawano ṯaŋəbapwaiño d̶əmiñəniano, oro nəŋerṯe gəfid̶ia. 44 Orn nəŋaṯa, ‘Igid̶i yoɽəbaṯe egeɽa gəlëɽəñi igi egəməñau’. Oro nəŋela nəŋəfid̶i eɽa gəməndëd̶əniau, na gəṯuɽeinu ŋopia, na ed̶a gero gəfau. 45 Oro nəgabəla nəŋəma nusila nwomən neicia d̶enəŋ nəməñe nəɽijan ini neicia kaiñ nəməñaṯəma, na nënṯi pred̶ ṯanoɽaŋo, na iliga lənḏurṯu maje nəŋəciṯi kaiñ gəməñaṯo liga lananoŋ. Ŋen ŋid̶i aŋəfeṯe ṯia com eled̶a leicia ləliga ildi.”

Ŋen ŋələŋgen Yesu na lorəba əllëɽəŋu

(Margus 3:31-35Luka 8:19-21)

46 Ŋen Yesu gəɽwatiṯia led̶a lərraid̶o məldin, ləŋgen na lorəba ldela ṯaləṯuru ndëuwər, lwonaṯa ləmalwaɽəṯia. 47 Ed̶a gənəŋ nəŋəmalwaɽəṯi ṯa, “Seicu ləŋgalo na lorldalo ləṯurwa ndëuwər lwonaṯa ləŋəlwaɽəṯia.” 48 Orn Yesu nəŋəmuɽəbiṯi eŋen nəŋaṯa, “Ǝsëgi gəɽo ənna na əsëndəldi ləɽo lorldaiñanda.” 49 Nəŋwale d̶əŋ nəŋwurəjaici ṯaləmis ilëɽəŋu nəŋaṯa, “Fənna igi na lorldaiñ. 50 Ŋen ŋanṯa led̶a ildi ləbəd̶ia ŋen ŋə-Bapa gəlëɽəñi igi gəfo elo, fəŋu ənna na lorldaiñanda.”