Luka 17 - ÐƎRREIÐIA EŊEN ÐƎMAIJƎN IÐI RƎMWA RIÐU 1993 New Testament (NMNT93)

Ŋen ŋeicia

1 Yesu nəŋəlwaɽəṯi ṯaləmis ilëɽəŋu ṯa, “Đeṯəm ŋen ŋid̶i aŋela iŋi ŋid̶i aŋəɽwad̶aṯe ŋəbəd̶ia led̶a aləŋgiṯi ŋen ŋəlëɽəñi. Orn ed̶a igi gəmama ŋen iŋi ŋeicia gid̶i aŋəneini ŋen ŋubwa. 2 Gəbanṯa ed̶a gakəl aŋakaseini lwandra egətam loɽra kaiñ larno ala aŋəwujəni egalbar ŋen iŋi ŋaŋəra kaiñ ŋaməñaṯo ŋen ṯa gënəŋu gəbəd̶ia ed̶a gənəŋ gətəd̶ənia eñere iñi ṯa aŋid̶i ŋen ŋeicia. 3 Rəmojəd̶r eŋen iŋi eñaŋ. Ndə oralo gəŋiṯia ŋen ŋeicia gariñaṯəma na ndə gəŋgiṯu ŋen ŋəlëɽəŋu ŋeicia ŋgəd̶eicəma ŋen iŋi. 4 Ndə gəŋiṯia ŋen ŋeicia ñoman d̶enəŋ nəñəməñe ñəɽijan eloman lonto, orn nəŋela ñoman d̶enəŋ nəñəməñe ñəɽijan, nəŋaṯa, ‘Egoɽəbəd̶aṯo eŋen’, ŋen d̶eṯəm agid̶i ŋaməŋgəd̶eici ŋen ŋəlëɽəŋu ŋeicia.”

Ŋen ŋəd̶eɽəd̶ia ed̶wonaṯa

5 Led̶a ləd̶weinu ldeiṯi Eləŋ Yesu ṯa, “Aɽaiciṯənde d̶wonaṯa.” 6 Eləŋ Yesu nəŋaṯa, “Gəbanṯa ñagerṯo d̶wonaṯa d̶ətëfr d̶arno ŋolwa ŋərresi ŋalkarḏal ṯa ñaɽwad̶aṯe ñagəlwaɽəṯia uɽi igi ṯa, ‘Uɽəd̶ənu ŋad̶uri egalbar!’ Na uɽi gid̶i aŋəndənaṯe.

Ŋen ŋebai igi gəta egare iŋəmëɽria

7 “Ǝsëgi eñaŋ igi gerṯo ebai gəlaɽa walla gəsia yaŋala ndə geṯo igii gid̶i aŋəmalwaɽəti ṯa, ‘Elaŋ taltal ŋaɽaŋalo ŋase’? 8 Gënəŋu gaber gəlwaɽəṯia ebai ṯa, ‘Aɽəṯiñi ŋəsa alo ŋoɽəmaice erenia ŋaiñəduɽəd̶ənṯi liga egəsa na igəṯia, orn aganəŋa agid̶i ŋase na agid̶i ŋëti’? 9 Na gënəŋu gid̶i aŋërṯi ebai nano ŋen ŋanṯa ebai gid̶u ŋen gəlwaɽənṯu? Egaṯa ndo! 10 Nṯia com ndə ñaganəñaŋ ñagid̶u ŋen pred̶ ñagəlwaɽənṯu aṯr ṯa, ‘Ñagaɽo ləbai lero ŋeniano. Ñagid̶u ŋen ŋəɽo d̶eṯəm ŋərəjad̶aṯo enanda ṯa ñid̶i’.”

Ŋen Yesu geid̶u led̶a red̶ ildi ləgəro

11 Iliga Yesu gəfo ed̶ad̶ id̶i d̶əbəṯa alo yi-Ursalim, gënəŋu gabəɽo iligano alo yi-Saməra na alo yi-Jalil. 12 Na ŋen gəbënṯia irnuŋ gənəŋ led̶a red̶ ildi ləgəro ldopəd̶aid̶əlda. Lënəŋulu ldəd̶uri nwaldaŋ aten, 13 ṯalmurəndəd̶u ldaṯa, “Ya Eləŋ Yesu giyacənde ŋəbaiya nano!” 14 Ndə Yesu gəseicəlo nəŋəlwaɽəṯi ṯa, “Mbər ñërrəŋaici kana aŋəno esalo.” Ŋen ləfo ed̶ad̶ ləbəla ldid̶əni ltəɽe. 15 Na ed̶a gənəŋ iŋulu ndə gəseicu ṯa aŋəno ilëɽəŋu yeid̶inu nəŋoɽəbəd̶e nəŋənaice Rəmwa ŋaɽrwa oliaga pəlelo. 16 Na gënəŋu nəŋwod̶əñiṯe Yesu erəmanəŋ nəŋəmaŋërṯi nano. Na gënəŋu gaɽo ed̶a galo yi-Saməra. 17 Yesu nəŋaṯa, “Gerṯe led̶a laɽo red̶ leid̶inu? Led̶a luŋga ildi ləṯënu ləɽo d̶enəŋ ldəməñe marldwan? 18 Led̶a ildi lero loɽəbəd̶o ṯa alnaice Rəmwa ŋaɽrwa, illi maje igi gəɽo ilia?” 19 Na Yesu nəŋəmeiṯi ṯa, “Twod̶o ŋaɽe, d̶wonaṯa d̶əlaɽəŋa d̶eid̶iaŋa.”

Ŋələŋe ŋə-Rəmwa ŋid̶i aŋela

(Maṯṯa 24:23-28, Maṯṯa 37-41)

20 Alfarisiyin niyeɽəd̶e Yesu ṯa, “Ŋələŋe ŋə-Rəmwa ŋid̶i aŋela ndaŋəɽwa? Na gënəŋu nəŋəluɽəbiṯi eŋen ṯa, ‘Ŋələŋe ŋə-Rəmwa ŋaber ŋid̶i aŋela ŋaməlaŋa ṯa ñaseici’. 21 Ed̶a aŋerṯe gənəŋ gid̶i aŋəlwaɽe ṯa, ‘Seid̶r fəŋu iŋi, walla seid̶r fəŋu ŋakəl!’ Đeṯəm ŋələŋe ŋə-Rəmwa ŋafo eñaŋ.”

22 Yesu nəŋeiṯi ṯaləmis ṯa. “Liga lid̶i alela ildi ñagid̶i ñwonaṯe ñagəseicia loman lənəŋ eñoman ñ-Id̶ia gə-Led̶a orn ñagaber ñagid̶i ñəseici. 23 Led̶a lid̶i aləndəlwaɽəṯi ṯa, ‘Seid̶r fəŋu igi! Walla seid̶r fəŋu gwëtu tu!’ Ñerṯe ñagabəla. Ñerṯe ñalëldəñaicia elo. 24 Ŋen ŋarno rəmwa rəsa ndelia narəwad̶ialo pred̶ ndaləŋgwa Id̶ia gə-Led̶a gid̶i aŋid̶i ṯia com eloman əllëɽəŋu. 25 Orn ananoŋ ŋen d̶eṯəm ṯa gënəŋu aŋənaneini ŋen ŋubwa ŋwaiña ŋeicia na aŋəmd̶əni eled̶a ləliga ildi. 26 Ŋen ŋəliga ildi Id̶ia gə-Led̶a gid̶i aŋəwela ŋid̶i aŋarneṯe ŋen ŋəliga lə-Nua. 27 Led̶a lafo lasa na lëṯia na lamaməd̶ia na liji əɽəlda ṯalmamənu ŋen Nua gəmulu gəbënṯia egeɽa igi gəlad̶a nəŋau, na ŋawa nəŋela ŋwaiña nəŋələməndad̶e pred̶. 28 Nṯia com ŋen ŋid̶i aŋarneṯe ŋen ŋəliga lə-Loṯ. Led̶a lafo lasa na lëṯia na ləbrldid̶a na laṯwia laŋge, na lawad̶a, na lwad̶a. 29 Orn eloman ildei Loṯ gəməñənau alo yi-Səḏum isia na alkəbriṯ ldirəwa elo ldəməndad̶e led̶a pred̶. 30 Ŋen ŋid̶i aŋəfeṯe ṯia eloman ildi Id̶ia gə-Led̶a gid̶i aŋoməñaṯe.

31 “Eloman lakəl ndə ed̶a gənəŋ gəfo eɽa ed̶əpe na laŋge əllëɽəŋu lafo egeɽa aŋerṯe girəwa ṯa gəbënṯia eɽa aŋələmame, nṯia com ŋgiṯr ed̶a igi gəfo ed̶əñwa aŋerṯe gəd̶aŋa ṯa gabəṯa eɽa. 32 Lëldəŋəd̶einr eŋen ŋəwasen Loṯ! 33 Ed̶a igi gərəmoṯwa d̶əməṯia d̶əlëɽəŋu gënəŋu gid̶i aŋəṯwe laŋge pred̶ na d̶əməṯia com, orn ed̶a igi gəbaiya ŋen ŋanṯa ñi gënəŋu gid̶i aŋəməṯe d̶eṯəm. 34 Igandəlwaɽəṯia ṯa, uləŋgi gakəl led̶a ləɽijan ndə ləndro naləŋgərem yento, na ed̶a gənəŋ gid̶i aŋəməni orn ed̶a gwomən aŋəṯëni. 35 Ndə liji ləɽijan əɽəlda ləfo lwad̶a wuji gənəŋ gid̶i aŋəməni oro wuji gwomən gid̶i aŋəṯëni. [ 36 Ndə led̶a ləɽijan ləfo igii, ed̶a gənəŋ gid̶i aŋəməni oro ed̶a gənəŋ gid̶i aŋəṯëni.”] 37 Na ṯaləmis niyeɽəd̶e Yesu ṯa, “Ya Eləŋ, fəŋga?” Yesu nəŋəleiṯi ṯa, “Alo isi aŋəno yewaŋge gaiyo yefau, atwar yid̶i aiyorarraid̶e com.”