Ŋen ŋəd̶əṯurṯia Rəmwa d̶ə-Yesu eŋen ŋəṯaləmis ilëɽəŋu
1 Ndə Yesu gəlwaɽo ŋen iŋi nəŋəd̶aŋaid̶e elo nəŋaṯa, “Bapa, liga leṯo d̶əge. Naico Id̶ia gəlaɽəŋa ŋaɽrwa, nṯia com Id̶ia gəlaɽəŋa aŋanaice ŋaɽrwa, 2 ŋen ŋarno agənaicəma ŋələŋe pred̶, ṯa gënəŋu aŋəlnaice d̶əməṯia d̶əbəɽəbəte ildi agənaicəmalo. 3 Na fəd̶əməṯia id̶i d̶əbəɽəbəte ṯa lënəŋulu aləŋaləŋeṯe ŋəŋgi agəɽo Rəmwa ronto rəd̶eṯəm, na Yesu Almasiya igi agəd̶waṯəma. 4 Eganaicaŋa ŋaɽrwa alo, na egabəɽenḏeṯo ŋəmëɽria iŋi agənaicəñe ṯa yid̶i. 5 Na d̶əñid̶i Bapa naicəñe ŋaɽrwa ŋa nëiñua, ŋaɽrwa iŋi ləgerṯo ndəm ŋen alo yimulu yibəd̶ənia.
6 “Igid̶u irəŋ gəlaɽəŋa gələŋinu eled̶a ildi agənaicəñəlo alo. Lënəŋulu lalaɽəŋa na aganaicəñəlo na lënəŋulu larəmoṯo ŋen ŋəlaɽəŋa. 7 Đəñid̶i lënəŋulu laləŋeṯo ṯa ŋen pred̶ agənaicəñe ŋeṯo eŋa. 8 Ŋen ŋanṯa ŋen agənaicəñe eganaicəlo na lënəŋulu ldəŋënṯi ldələŋeṯe ṯa d̶eṯəm egeṯo eŋa, ldëndi ŋen ṯa agad̶waṯəñe.
9 “Egaŋekeɽəd̶ia ŋen ŋanṯa ŋulu. Egaber egəŋekeɽəd̶ia ŋen ŋanṯa alo, orn ŋen ŋanṯa ŋulu ildi agənaicəñəlo ŋen ŋanṯa lënəŋulu lalaɽəŋa. 10 Na laŋge pred̶ əllëɽəñi lënəŋulu lalaɽəŋa na laŋge pred̶ ləlaɽəŋa lënəŋu lalëɽəñi. Na ŋaɽrwa ŋəlëɽəñi ŋërrəŋeid̶ənu iŋulu. 11 Na egero egəfia alo təŋ orn lënəŋulu lafo alo məldin na egaŋeṯa nano. Bapa agatəɽe, rəmoṯəlo igirəŋ gəlaɽəŋa ildi agənaicəñəlo, nṯia lënəŋulu alɽeṯe lonto ŋen ŋarno lëləŋ. 12 Ŋen ñagəfəlda alo egarəmoṯəlo igirəŋ gəlaɽəŋa Egarəmoṯəlo ildi agənaicəñəlo na ed̶a gero gənəŋ iŋulu gəməndëd̶ənu illi Id̶ia gəd̶amənded̶ənia ṯa ŋen ŋəwërd̶ənu egad̶am gə-Rəmwa aŋəɽiñəd̶eini. 13 Na d̶əñid̶i egaŋeṯa nano, na egaɽwata ŋen iŋi liga egəfo alo məldin, ṯa lënəŋulu alerṯe d̶əŋəra nano d̶əlëɽəñi d̶əɽiñəd̶einu iŋulu. 14 Eganaicəlo ŋen ŋəlaɽəŋa na led̶a lalo laned̶əlo ŋen ŋanṯa lënəŋulu gerṯe lalo, ŋen ŋarno igënəñi gerṯe egalo. 15 Egaber egəŋeɽəd̶ia ṯa ŋaləme alo orn ṯa ŋaɽrəmoṯe eged̶a geicia. 16 Lënəŋulu gerṯe lalo ŋen ŋarno igënəñi gerṯe egalo. 17 Təɽelo ŋenŋa ŋəlaɽəŋa ŋəd̶eṯəm. Ŋen ŋanṯa olia gəlaɽəŋa gaɽo d̶eṯəm. 18 Ŋen ŋarno agəd̶waṯəñe alo, nṯia com egad̶waṯəlo alo. 19 Na igatəɽinu ŋen ŋanṯa ŋulu ṯa lënəŋulu altəɽəni ŋenŋa ŋəd̶eṯəm.
20 “Egabekeɽəd̶ia gerṯe ŋen ŋanṯa ŋulu rətod̶ orn com ŋen ŋanṯa led̶a pred̶ ildi lid̶i alëndi ŋen ŋəlëɽəñi ŋenŋa eŋen, 21 ṯa alɽeṯe lonto ŋen ŋarno Bapa agəfəñau na egəfaŋau, ṯa lënəŋulu aləndofeṯe ṯa led̶a lalo alëndi ŋen ṯa agad̶waṯəñe. 22 Eganaicəlo ŋaɽrwa iŋi agənaicəñe, ṯa alɽeṯe lonto ŋen ŋarno lëləŋ, 23 ṯa igënəñi elofeṯe, na ŋaiñofeṯe, ṯa alid̶əni ləɽiñəd̶einu, na alɽeṯe lonto d̶eṯəm, na ṯa led̶a lalo aləŋeṯe ṯa agad̶waṯəñe, na agabwaliya ŋen ŋarno agəbwaiñiya.
24 “Bapa, egwonaṯa ṯa alo egəfau led̶a ildi agənaicəñəlo ñafeṯəlda d̶urri, ṯa aləseici ŋaɽrwa ŋəlëɽəñi iŋi agənaicəñe. Ŋen ŋanṯa agabwaiñiya ŋen alo yimulu yibəd̶ənia. 25 Bapa ŋəŋgi agəd̶urwaṯo eŋen, led̶a lalo laijəbaŋa orn egaləŋeṯaŋa na led̶a ildi agənaicəñəlo laləŋeṯo ṯa agad̶waṯəñe. 26 Igid̶u irəŋ gəlaɽəŋa gələŋinu iŋulu, na igëbəd̶ia məldin gələŋinia ṯa d̶əbwa id̶i agəbwaiñiya ad̶əfeṯe iŋulu na ṯa igënəñi elofeṯe.”
© New Testament in Nuba Moro © Bible Society in Sudan, 1993.