Ŋen ŋəd̶ənna ëiñua
1 Fiñi Bulus ñiŋgi egəɽo d̶əd̶weinia d̶-Almasiya Yesu eŋen Rəmwa rwonaṯa. Egano led̶a ëiñua ɽ-Rəmwa ildi ləfo alo y-Afəsus, ildi lëndu ŋen ŋ-Almasiya Yesu ŋopia.
2 Egabeɽəd̶ia ṯa Rəmwa, Bapa igëndr, na Eləŋ Yesu Almasiya arəndənaice d̶ənaica məɽəməɽeñ na d̶ëuṯaralo.
Ŋen ŋəd̶əbuŋṯia d̶usila i-Yesu Almasiya
3 Egabeɽəd̶ia ṯa, Rəmwa na Đaṯa, g-Eləŋ igëndr Yesu Almasiya arəbuŋənṯi. Rënəŋu rəbuŋṯəndr d̶əbuŋṯiad̶a pred̶ d̶usila elo na ig-Almasiya, 4 ŋen ŋarno rënəŋu rwoṯənde ig-Almasiya ŋen alo yimulu yibəd̶ənia, rënəŋu rwoṯəndr ṯa altəɽeṯr na ṯa alerṯr ləgəberṯiar d̶əskiniano ŋu nëiñua. 5 Rënəŋu rəbwandriya ndrëɽi ŋen ananoŋ ṯa alɽeṯr ləd̶ia əllëɽəŋu Yesu Almasiyaga, ŋen ŋanṯa ŋen iŋi ŋəlëɽəŋu. 6 Rënəŋu rid̶u ŋen iŋi ṯa led̶a alnananaice d̶amia ŋen ŋanṯa d̶ənaica məɽəməɽeñ d̶əlëɽəŋu id̶i d̶erṯo ŋaɽrwa id̶i rënəŋu rəndənanaicar məɽəməɽeñ Id̶iaga igi rəbwamaiya. 7 Ig-Almasiya ləgapəɽənr ŋəfəniŋa ŋəlëɽəŋu. Nṯia ŋen iŋëndr ŋeicia ŋaŋgeinu eŋen ŋəd̶ənaica məɽəməɽeñ d̶əlëɽəŋu, id̶i rënəŋu rənanaid̶ia d̶ələŋeṯad̶a d̶əño d̶oɽra kaiñ. 8 Rënəŋu rarəjaicəndr d̶ənaica məɽəməɽeñ nano d̶əlëɽəŋu d̶waiña. 9 Rënəŋu rid̶əndr ləgələŋeṯr naməɽa ŋəŋen rënəŋu rwonaṯa d̶ələŋeṯad̶a ŋen nəsi na d̶ələŋeṯad̶a pred̶ garno rënəŋu rëɽu ŋen ig-Almasiya, 10 ṯa ndə liga ləɽiñəd̶einu ararreid̶i laŋge pred̶ ldəɽo ig-Almasiya, laŋge lelo na laŋge lalo.
11 Rəmwa rëɽu ŋen iŋi ananoŋ garno rwonaṯa, rënəŋu rëbəd̶ia ŋen jaica jaica garno rwonaṯa, 12 rënəŋu rid̶u ṯia ṯa nëndr aləfeṯr ŋopia ṯa led̶a alnanaice ŋaɽrwa ŋəlëɽəŋu d̶amia, nëndr ləgəṯurṯr ŋen ananoŋ ig-Almasiya. 13 Iŋu ñaŋ com ñagano ŋen ŋəd̶eṯəm iŋi ŋəɽo ŋen ŋəŋəra ṯa ñagëbərnu na ñagëndu ŋen ŋəlëɽəŋu com, nṯia ñagëɽənu ŋwëɽiña nano Usilaga Gətəɽe igi Rəmwa rëɽu ṯa arəndənaice. 14 Usila Gətəɽe gaɽo waŋge gananoŋ elaŋge ləgid̶r aldəneinr ŋen ləgəmulur ləgəlneiniar d̶əge. Ŋen ŋafo ṯia ṯa led̶a alnanaice ŋaɽrwa ŋəlëɽəŋu d̶amia.
Đəɽəd̶ia Rəmwa d̶ə-Bulus
15 Egano ŋen ŋəd̶wonaṯa ed̶alo eg-Eləŋ Yesu na ṯa ñagəbwa led̶ala pred̶ ɽ-Rəmwa ltəɽe, 16 na ŋen ŋafəṯia, igaŋërṯu Rəmwa nano ŋen ŋanṯa ñaŋ jaica ndə igəṯurṯia Rəmwa, 17 egabeɽəd̶ia ṯa Rəmwa r-Eləŋ igëndr Yesu Almasiya, irri rəɽo Đaṯa irri rerṯo ŋaɽrwa, arəndənaice usila igi gəd̶ələŋeṯa ŋen nəsi na igi gəndërrəŋaicia ŋen ṯa ñamaləŋeṯe gopia, 18 na ṯa arid̶i nare enalo nələŋeṯo ŋen, ṯa ñaləŋeṯe ñagəṯurṯia d̶undəd̶ia d̶əlëɽəŋu ṯau, na ṯa ñaləŋeṯe ŋələŋe ŋəd̶ərraṯa eŋen id̶i d̶erṯo ŋaɽrwa id̶i rënəŋu rerṯo cled̶a əllëɽəŋu ltəɽe, 19 na ṯa ñaləŋeṯe ṯa ŋabəɽa ŋəlëɽəŋu ŋoɽra kaiñ ŋen ŋanṯa nëndr ləŋgr ləgëndr ŋen ŋəlëɽəŋu. Rəmwa rid̶u ṯia ŋabəɽaŋa ŋwaiña kaiñ. 20 Rënəŋu rërrəŋaid̶u ŋabəɽa ŋəlëɽəŋu ig-Almasiya ndə rətud̶ima eŋəɽaiñ ndrəmid̶i gəɽaŋalo nḏəŋ d̶əlëɽəŋu d̶əŋaicəba elo, 21 ndrəmid̶i goɽra kaiñ gəməñaṯo ŋələŋe pred̶ ɽetəɽeteo na ndrəŋ pred̶ ini nuɽwatənia gerṯe alo isi ikərəŋ com alo isi yid̶i aiyela, 22 na rënəŋu rëɽu laŋge pred̶ erəmanəŋ rəlëɽəŋu ndrəmanaice ŋələŋe elaŋge ildi, ndrəmid̶i gəɽənda eŋen pred̶ ikanisa, 23 id̶i d̶əɽo aŋəno ilëɽəŋu, id̶i d̶unḏəjeinu iŋu igi gonḏəjaica laŋge pred̶.
© New Testament in Nuba Moro © Bible Society in Sudan, 1993.