Ŋen ŋəd̶ənna ëiñua
1 Fiñi Bulus ñiŋgi egəɽo d̶əd̶weinia d̶-Almasiya Yesu eŋen iŋi Rəmwa rwonaṯa, na oraiñ igëndr Ṯiməd̶awus, 2 ñagano led̶a ëiñua ɽ-Rəmwa lalo yi-Kolosi, lorldaiñ ig-Almasiya ñəŋgi ñagəbëndeicia ŋen ŋopia.
Ñagabeɽəd̶ia ṯa Rəmwa, Bapa igëndr aŋəndənaice d̶ənaica məɽəməɽeñ na d̶ëuṯaralo.
Ŋen ŋəd̶əŋërṯia Rəmwa nano na ŋəd̶eɽəd̶ia Rəmwa
3 Ñoman pred̶ ñagaŋəŋërṯia Rəmwa nano ndə ñagəbekeɽəd̶ia eŋen eŋalo, irri rəɽo Bapa na Eləŋ igëndr Yesu Almasiya, 4 ŋen ŋanṯa nanda ñagano ŋen ŋəd̶wonaṯa ed̶alo ig-Almasiya Yesu, na ñagano ṯa ñaŋ ñagəbwa led̶ala pred̶ ɽ-Rəmwa, 5 ŋen ŋanṯa ñaŋ ñagaṯurṯia ŋen iŋi ŋəṯuɽeintənde elo pənde, ñaŋ ñagano ŋen iŋi ñagaṯurṯiau eŋen ŋəŋəra ŋə-Rəmwa iŋi ŋəɽo ŋen ŋəd̶eṯəm, 6 iŋi ŋeṯənde nano garno ŋeṯo alo pred̶. Na ŋen iŋi ŋəŋəra ŋə-Rəmwa ŋaləŋa ləd̶ia na ŋatwod̶a eñaŋ eloman lananoŋ na məldin d̶əñid̶i ildi ñagənau ŋen ŋəd̶ənaica məɽəməɽeñ d̶ə-Rəmwa na ñagələŋeṯau d̶eṯəm, 7 ŋen ŋarno Abafras gërrəŋaicənde, gënəŋu igi nanda ñagəbwamaiya na igi ñagəbəṯialda Rəmwa ŋəmëɽria. Gënəŋu gad̶uɽəd̶ənṯia Almasiya gəd̶urwaṯo eŋen eñaŋ. 8 Na gënəŋu galwaɽəṯənde eŋen ŋəd̶əbwa ed̶alo ig-Usila Gətəɽe.
9 Nṯia ñagabekeɽəd̶ia Rəmwa ñoman pred̶ eŋen eŋalo ndə ñagəno ŋen iŋi. Nanda ñagabekeɽəd̶ia Rəmwa ṯa arəndonḏəjaice d̶ələŋeṯad̶a d̶əŋen rënəŋu rwonaṯa ed̶ələŋeṯa ŋen nəsi pred̶ na ed̶ələŋeṯa pred̶ d̶-Usila Gətəɽe, 10 ṯa ñafeṯe ñagərəjad̶aṯo eŋen ŋəŋəbŋe ŋ-Eləŋ Yesu, na ṯa ñamid̶i gəŋəra nano kaiñ ŋenŋa eŋalo. Na ṯa ñerṯe led̶a iŋəmëɽria pred̶ ŋəŋəra, na ṯa ñakaɽəjeini ed̶ələŋeṯa d̶ə-Rəmwa. 11 Nanda ñakabekeɽəd̶ia ṯa ñaŋ ñonḏəcini ŋabəɽaŋa pred̶ eŋen ŋəŋabəɽa ŋəlëɽəŋu iŋi ŋerṯo ŋaɽrwa, ṯa ñaɽiñaṯe ŋen pred̶ na ṯa ñwale narano pred̶ d̶əŋərad̶a nano, 12 na ṯa ñaŋërṯi Đaṯa nano jaica jaica igi gid̶əndr ləgarəjad̶atr eŋen ŋəd̶ərraid̶ia egarrerre led̶ala əllëɽəŋu. 13 Fəŋu gëbərəndr eŋələŋ ŋəŋərəm, na nəŋəndəmaṯr eŋəbŋ ŋ-Id̶ia gəlëɽəŋu igi gəbwamaiya kaiñ, 14 fəŋu igi gəpəɽandr na gërrəŋgeicia ŋen iŋëndr ŋeicia.
Ŋen ŋ-Almasiya na ŋəŋəmëɽria ŋəlëɽəŋu
15 Almasiya gaɽo sura yi-Rəmwa irri ləgəber ləgaɽwad̶aṯiar ləgəsciciar. Gënəŋu galəŋənu gəɽənda, na gafo ŋen laŋge pred̶ ləmulu ləbəd̶ənia. 16 Rəmwa rid̶u laŋge pred̶ ŋuga, laŋge lelo na laŋge lalo, na laŋge led̶a ləɽwad̶aṯa ldəseicia, na laŋge led̶a ləber ləɽwad̶aṯia ldəseicia, gënəŋu gid̶u ŋələŋe pred̶ iŋi ɽetəɽeteo. Laŋge pred̶ lid̶ənu ŋuga na ŋen ŋanṯa ŋu. 17 Ŋen ŋafəṯia Almasiya gafo ŋen laŋge pred̶ ləmulu ləbəd̶ənia, na gënəŋu gəbëndeicia laŋge pred̶ ldəɽo. 18 Gënəŋu gaɽənda ləkanisa id̶i d̶əɽo aŋəno ilëɽəŋu. Ŋen ŋanṯa gaɽənda eŋen pred̶, na gënəŋu galəŋənu ananoŋ, na gatwod̶o eŋəɽaiñ ananoŋ, ṯa gënəŋu aŋəɽeṯe nda eŋen pred̶. 19 Fəṯia ŋen ŋanṯa Rəmwa rëɽu ŋen ṯa ŋen pred̶ ṯəɽom ŋəd̶əɽiñad̶aid̶ia d̶ə-Rəmwa aŋəfeṯe iŋu. 20 Na Rəmwa rëɽu ŋen ṯa aruɽəbeini laŋge nano pred̶ lelo na lalo ŋuga, na ṯa gënəŋu aŋid̶i d̶ëuṯaralo ŋəfəniŋa iŋi gënəŋu girəweicu alo id̶uɽi.
21 Ananoŋ ñaŋ ñagaɽo ilia Rəmwa nëiñua, na ñagafo ñagageiyo eŋəṯəɽa eŋalo, na ñagid̶u ŋen ŋeicia. 22 Orn d̶əñid̶i rënəŋu ruɽəbeinde nano enare, ŋəɽaiñəŋa ŋ-Almasiya gəɽo aŋəno ṯa rënəŋu arəndërrəŋaid̶i ñagətəɽe, mənna gero, na d̶əskinia d̶ero ŋu nëiñua, 23 ndə d̶eṯəm ñagëndialo ed̶wonaṯa i-Yesu, na ñaɽaŋe ñagwonḏəṯo na ñagəber ñagəd̶wad̶ənia ṯa ñaŋgiṯi ŋen ñagəṯurṯiau ŋen ŋəŋəra ŋə-Rəmwa iŋi ñagəno. Ŋen iŋi ŋəŋəra ŋafo ŋërrəŋeid̶ənu elaŋge pred̶ lalo na igënəñi Bulus igid̶ənu ed̶a igi gad̶uɽəd̶ənia eŋen iŋi.
Ŋen Bulus gəɽəbəd̶ia iŋəmëɽria ŋ-Almasiya
24 Egaŋəra nano d̶əñid̶i ŋen ŋanṯa igənaneinia ŋen ŋubwa ŋeicia ŋen ŋanṯa ñaŋ, na egonḏəjaica ŋen iŋi ŋəfo pwa eŋen ŋubwa ŋeicia Almasiya gənaneinu egaŋəno ilëɽəñi ŋen ŋanṯa aŋəno ilëɽəŋu, isi yeɽo kanisa. 25 Igid̶ənu ed̶a gəd̶uɽəd̶ənṯia kanisa eŋen ŋə-Rəmwa iŋi rënəŋu rənaicəñe ŋen ŋanṯa ñaŋ, ṯa yid̶i ŋen pred̶ ŋəlëɽəŋu ŋələŋinu ŋopia. 26 Na ŋen iŋi igəndërrəŋaicia ŋaɽo ŋaməɽa iŋi ŋero ŋəbërrəŋeid̶ənia eled̶a lananoŋ pənde, orn d̶əñid̶i ŋënəŋu ŋërrəŋeid̶ənu eled̶a əllëɽəŋu ltəɽe. 27 Rəmwa rëɽu ŋen ṯa arërrəŋaici led̶a əllëɽəŋu ṯa ŋələŋe ŋəŋaməɽa iŋi ŋerṯo ŋaɽrwa ŋwaiña eled̶a ildi gerṯe laɽo Alyawuḏ, fəŋaməɽa ṯa Almasiya gafəndau, igi gəɽo ŋen ñagəṯurṯiau ṯa ñagid̶i ñaneini ŋaɽrwa. 28 Nanda ñagabërrəŋaicia led̶a ŋen ŋəlëɽəŋu na ñagabəɽia led̶a nano pred̶ na ñagabërrəŋaicia led̶a pred̶ ŋen d̶ələŋeṯad̶a ŋen nəsi d̶waiña ṯa ñiṯi Rəmwa led̶a pred̶ loɽra eŋen ŋ-Almasiya. 29 Na ṯa eɽwad̶aṯe igəbəd̶ia ṯia, igëbəd̶ia ŋəmëɽria d̶wonḏəṯad̶a kaiñ id̶i Almasiya gənaicəñe id̶i d̶əbəd̶ia ŋəmëɽria iñi.
© New Testament in Nuba Moro © Bible Society in Sudan, 1993.