Ŋen ŋəɽənda egad̶am
1 Ya Đawufilus, egad̶am gənëiñua, igawërd̶u ŋen pred̶ Yesu gid̶u na gërrəŋaid̶u, 2 ŋen loman ləmulu gabəṯau rrəmwa elo ndə gəlwaɽəṯu led̶a ŋabəɽaŋa ŋ-Usila Gətəɽe əllëɽəŋu ildi ləd̶weinu, ildi gwoṯəlo eled̶a. 3 Yesu gërrəŋaicəlo aŋəno ilëɽəŋu ŋen yeməṯo ndə gətwod̶o eŋəɽaiñ ŋenŋa ŋəd̶eṯəm. Gamiñiṯəlo eñoman ered̶ia marldwan nəŋəllwaɽəṯi ŋen ŋəŋələŋe ŋə-Rəmwa. 4 Ndə lərraid̶əlda gënəŋu gəlwaɽəṯəlo ṯa alerṯe ləŋgaṯia alo yi-Ursalim orn alṯurṯi ŋen Đaṯa gëɽu na ñagənaṯəñe. 5 Ŋen ŋanṯa Yuanna gananaico led̶a mamuḏiya ŋawaŋa, orn eñoman ñətëfr ñaŋ ñagid̶i ñaneini mamuḏiya Usilaga Gətəɽe.
Ŋen Yesu gabeinu elo
6 Nṯia ndə lərraid̶o ldəɽo ldeɽəd̶e Yesu ldaṯa, “Eləŋ Yesu agid̶i ŋuɽəbeiṯi Israyil ŋələŋe iliga ildi?” 7 Na Yesu nəŋəleiṯi ṯa, “Gerṯe ŋen ŋaŋalo ṯa ñaləŋeṯe liga ildi Đaṯa gëɽu eŋələŋe ŋəlëɽəŋu ṯa lafia ndaŋəɽwa. 8 Orn ñagid̶i ñaneini ŋabəɽa ndə Usila Gətəɽe geṯənde nano, na ñagid̶i ñaɽeṯe d̶aməd̶aṯa d̶əlëɽəñi alo yi-Ursalim, na alo Yuḏiya, na alo yi-Saməra, na alo pred̶, na ltuŋga d̶ərṯi.” 9 Na ndə gəlwaɽəṯəlo ṯia d̶əge, lënəŋulu ṯaləməseicu gabeinia elo, na ibwëɽua nitërəlo isiano esen. 10 Ndə ləseid̶ia elo kaiñ led̶a ləɽijan ildi lerṯo ndrenia nano nəbəjo lad̶urəlo nano taltal, 11 ldaṯa, “Ya led̶a lalo yi-Jalil, ñagaṯurwa ṯəñaseid̶u elo ed̶a? Fə-Yesu igi gəmənu eñaŋ gid̶i aŋoɽəbəd̶ia ŋen ŋarno iŋi ñagəseicəma gabeinia elo.”
Ŋen ed̶a gwomən gəd̶weinu gëɽənu
12 Nṯia ṯaləmis niruwi naiyən ibërnia aiyən yi-Seṯun ldabəṯa alo yi-Ursalim, aiyən isi yafo Ursalim ṯwaiñ garno alganun yelwaɽo ṯa led̶a aləwerlde e-Loman ləd̶əmiñəniano. 13 Na ndə lərəmaṯo ldënṯi eɽa gənəŋ gəfo pəlelo, alo isi loɽaŋa. Buṯrus, na Yuanna, na Yagub, na Anḏərawus, na Filibus, na Ṯoma, Bard̶ulamawus, na Maṯṯa, Yagub id̶ia g-Alfi, na Siman igi gënəjənu Giwur, na Yaud̶a id̶ia gə-Yagub. 14 Ildi pred̶ lerṯo ara gonto ṯalṯurṯu Rəmwa lijila əɽəlda, na Mariam ləŋgen Yesu na lorəba əllëɽəŋu.
15 Iliga ildei Buṯrus gatwod̶o lorəba nëiñua, ildi pred̶ ləɽo ered̶ia red̶ na ered̶ia gəɽijan, nəŋaṯa ṯa, 16 “Lorldaiñ, d̶eṯəm ŋen ŋə-Rəmwa aŋəɽiñəd̶eini ŋəpənde iŋi Usila Gətəɽe gəlwaɽo ëiñuaya yi-Ḏawuḏ eŋen ŋə-Yaud̶a maje igi gaməd̶aṯo led̶a ildi lëndu Yesu. 17 Yaud̶a gafo gumad̶einu lëndərlda na ləganeinərlda ŋəmëɽria ŋə-Rəmwa.” 18 (Na Yaud̶a gilid̶u gii algərusya isiyeɽo ŋen ŋeicia d̶əpəɽad̶a d̶əŋen ŋəlëɽəŋu, nəŋiɽi nəŋəndid̶iano egare na yu neməñaṯe ndëuwər pred̶. 19 Na ŋen iŋi ŋaləŋinu eled̶a pred̶ lalo yi-Ursalim, na lënəcu gii igi Akaldama egole gagen ole igi ganṯa gii gəŋəfəni.)
20 “Ŋen ŋarno ŋəwërd̶ənu egad̶am gəmasamir ṯa,
‘Ŋgiṯu eɽa gəlëɽəŋu aŋəpiṯano, na ed̶a gənəŋ aŋerṯe gəfia egeɽa igi’, na, ‘Ŋgiṯu ed̶a gənəŋ aŋərraṯe iŋəmëɽria ŋəlëɽəŋu com’.
21 “Ŋen ŋafəṯia eled̶a ildi lərrwa ləgarraid̶ərlda iliga pred̶ ildi ñagəfo Eləŋ Yesu ŋəla, 22 iliga Yuanna gənanaid̶o mamuḏiya na liga ldela ildi Yesu gabeinu elo inëndr, ŋen d̶eṯəm ṯa ed̶a gənəŋ iŋulu ñaɽeṯəlda d̶aməd̶aṯa ed̶ətwod̶a eŋəɽaiñ d̶əlëɽəŋu.”
23 Nṯia lënəŋulu ldəme Yusif ganṯa Barsaba, eṯen gəbërnia Yusṯus, na Maṯiyas. 24 Na ldəṯurṯi Rəmwa, ldaṯa, “Eləŋ Yesu ŋəŋgi agaləŋeṯo nar nəled̶a pred̶, aŋaicənde maje igi agëndərna eled̶a ildi ləɽijan, 25 aŋəɽeṯe ed̶a gəd̶weinu ṯa aŋərraṯe iŋəmëɽria ŋə-Yaud̶a igi gəŋgaṯo iŋəmëɽria ŋə-Rəmwa na aŋəɽe alo ilëɽəŋu.” 26 Na ṯaləmis nindcici ŋen ŋəmajande ildi loɽijan na ŋen nəŋiɽəṯi Maṯiyas nano na nəŋuməd̶eini led̶a la ildi red̶ nəŋəməñe gonto ildi ləd̶weinu.
© New Testament in Nuba Moro © Bible Society in Sudan, 1993.