Ŋen ŋəd̶ənna ëiñua
1 Fiñi eləŋ goɽra. Egeɽəd̶o wuji gəɽəbwa igi gëɽənu na ñere ñəlaɽəŋa ñaŋgi igəbwandiya d̶eṯəm, na gerṯe igënəñi egonto orn led̶a pred̶ labwandiya ildi lələŋeṯo ŋen ŋəd̶eṯəm, 2 ŋen ŋanṯa ŋen ŋəd̶eṯəm iŋi ŋafəndrau na ŋid̶i aldəfeṯərlda bəɽəbəte. 3 Egabeɽəd̶ia ṯa d̶ənaica məɽəməɽeñ na ŋəbaiyaŋəno na d̶ëuṯaralo aləndefeṯr i-Rəmwa Đaṯa na i-Yesu Almasiya Id̶ia gə-Đaṯa eŋen ŋəd̶eṯəm na id̶əbwa.
Ŋen ŋod̶eṯəm na ŋəd̶əbwa
4 Egaŋəra nano kaiñ ndə igəfid̶u ŋen ṯa ñere ñəmaṯan ñəlaɽəŋa ñabərlda eŋen ŋəd̶eṯəm garno Đaṯa Rəmwa rəlwaɽəṯəndr. 5 Ya wuji, d̶əñid̶i egaŋeɽəd̶ia gerṯe garno igaŋəwërd̶əṯia ŋen iŋi ŋəmaijən orn ŋen iŋi ləgerṯr ananoŋ, egaŋeɽəd̶ia ṯa aliyəbwid̶r. 6 Fəd̶əbwa ṯa ləgəbərldar eŋen ŋə-Rəmwa. Fəŋen ŋəlëɽəŋu garno ñaŋ ñagəno ananoŋ ṯa ñerlde id̶əbwa.
7 Ŋen ŋanṯa led̶a lwaiña labakaldaica alo ildi ləɽo lad̶əna, ildi labəlaica ŋen ṯa Yesu Almasiya geṯo gəɽo aŋəno. Fəŋu igi gəɽo ad̶əna na gəgeiyo Almasiya 8 Rəmojəd̶r eŋen ṯa ñerṯe ñagəṯwia ŋen iŋi na ŋəmëɽria iŋi ñagid̶u, ṯa ñaneini d̶əpəɽa ŋopia. 9 Ed̶a gənəŋ igi gəmiñad̶aṯa nëiñua na gəber gəɽaŋa eŋen ŋ-Almasiya iŋi ŋërrəŋeid̶ənu gënəŋu gero gəberṯia Rəmwa. Orn gënəŋu igi gəɽaŋa eŋen ŋ-Almasiya gënəŋu gerṯo Đaṯa Rəmwa na Id̶ia com. 10 Ndə ed̶a gənəŋ gəndeṯa nano igi gəber gəber Təŋaid̶ia ŋen iŋi ñerṯe ñagəməŋënṯia egeɽa egalo, na ñerṯe ñagəmanna ëiñua. 11 Ŋen ŋanṯa ed̶a igi gənəma ëiñua gënəŋu laɽəbəd̶əldəga eŋen ŋəlëɽəŋu ŋeicia gəbəd̶ia.
Ŋen ŋənḏurṯalo
12 Egerṯo ŋen ŋwaiña ṯa igandəwërd̶əṯia, orn egaber egwonaṯa igəwërd̶ia abred̶a lgaləmya, nṯia egwonaṯa egeṯənde nano na aɽwataid̶r ṯa d̶əŋəra nano id̶ëndr ad̶əɽiñad̶eini. 13 Ñere ñoralo gəɽəbwa igi gëɽənu ñeɽəd̶iaŋa.
© New Testament in Nuba Moro © Bible Society in Sudan, 1993.