aza 6
kwere kweṯinani eḏi Kwruztu-na kwunderṯa kwiti kweṯinani ki ŋikya-na mac
1 ta a kwer ari ḏa? a kwer ṯa erri ŋikyaŋi ṯirṯir mindaŋ a ma ṯimeca ṯeḏi ŋimɽi kikindeḏi a? 2 beri ma! a kwirir kwayir ŋiɽaŋal ŋi ŋeḏi ŋikya ta, ŋer gwu dirnaṯi-na kwokwony aŋgwuru? 3 ati kwilŋiicar manya eḏaruŋw: nyiŋa tatap, limɔ baptazini eḏi Kwruztu-na kweni Yecu, ner eni limɔ baptazini ŋiɽany-na ŋuŋun? 4 kaka aninar gwu nyiŋa ŋundu gi ṯibaptizina ṯi, leni layyu, ṯaŋwu, kaka diɽer gwu Kwruztuŋw ŋiɽany-na ŋiniṯ ŋi ŋeḏi Papa ta, er ma dirnaṯi nyiŋa tɔk ŋeḏre ŋi ŋizaw ki ŋimiiḏa-na ŋiaŋ.
5 kaka mer gwu eni loɽmaṯi ŋundu gi ŋiɽany ŋi kaka ŋuŋun, er ṯa eni loɽmaṯi ŋundu gi ṯidiɽa ṯi kaka ṯuŋwun tɔk. 6 a kwilŋiicar eḏaruŋw, rɔgwɽɔ reri ruɽun rimay ŋundu gi, ki ŋwuɽi la ŋwuɽmɔḏalu, mindaŋ eḏi ma rɔgwɽɔ reṯəkizi ŋikyaŋi ŋɔḏɽor ere eḏi ŋuma kwokwony mac, mindaŋ er ere orɔ nyiŋa luway leḏi ŋikya kwokwony tɔk mac. 7 kaka muŋw gwu ay kwete ki lizi-na, eṯir ere ketize ŋikyaŋi ŋuŋun yey kwokwony mac. 8 lakin mer ay Kwruztu ŋgi ta, kwumer emni eḏaruŋw, a kwumiiḏir ŋundu ŋgi tɔk. 9 kaka ilŋiicar gwu rac eḏaruŋw: Kwruztu, diɽaŋw gwu ŋiɽany-na, ŋwu ere ay kwokwony duṯ; eṯi ŋiɽany ere eḏi ŋuma kwokwony mac eḏi miḏa ŋunduŋwu. 10 na ŋiɽany ŋayaŋw zi, nuŋw ay ŋiɽaŋal ŋi ŋeḏi ŋikya, tamin tutuput dak; na ŋimiiḏa ŋeṯuŋw ŋi miiḏi eṯuŋw zi miiḏi ŋiɽaŋal ŋi ŋeḏi Allah. 11 ŋwu ṯaŋwu, ŋaŋa tɔk aruŋw, rɔgwɽɔ reri rimay ŋiɽaŋal ŋi ŋeḏi ŋikya, na eṯir miiḏi ŋiɽaŋal ŋi ŋeḏi Allah eḏi Kwruztu-na kweni Yecu.
12 eṯere efrinji ŋikyaŋi eḏorɔ kweleny kweḏi yaŋna yalu mac yeṯay, mindaŋ mer ŋazi multani eḏinyici kaduwa nana keŋen. 13 etere ṯiŋaci ŋikyaŋi kwɔmne lu kwalu kweḏi yaŋna mac eḏi zi gi erri ŋeni ŋiki, lakin eṯi ṯiŋaci Allah rɔgwɽɔ lu ralu, kaka kla limɔŋw zi diɽi ŋiɽany-na eḏi miiḏi kwokwony, na eṯi ṯiŋaci Allah kwɔmne lu kwalu kweḏi yaŋna eḏi zi gi erri ŋeni ŋofḏana. 14 kaka iti inḏi gwu ŋikya eḏeḏi zulṯa kwokwony daŋgal-na mac, kaka iti ur ŋa gwu leḏi kuruu mac, lakin na orɔ ŋaŋa leḏi ṯimeca ṯeḏi ŋimɽi ŋeḏi Allah.
ŋiɽaŋal ŋeḏi ŋuway ŋeḏi ŋikya
15 ta a kwer ari ḏa? er zi erri ŋiki kaka iti enir gwu leḏi kuruu mac, lakin leḏi ṯimeca ṯeḏi ŋimɽi, a? beri ma! 16 ŋaŋa liti lilŋiica manya, a liri luway leḏi ŋgwa kwuṯiŋacaŋa rɔgwɽɔ lu ralu eḏinyica nana? kwir ŋikya kweṯi zi multaḏa ŋiɽany-na, ya kwir ṯiniŋneḏu kweṯi zi multaḏa ki ṯofḏana-na. 17 lakin alhamḏulillah, ŋaŋa, leni kerreny luway leḏi ŋikya, leṯinyici kirem ṯilŋiiḏina nana rugwor ri, kḏa ṯimɔ ŋazi mulɔtɔ. 18 na ŋaŋa, limerzi kediḏa ki ŋikya-na, a limorɔ luway leḏi ṯofḏana. 19 nyi kwandicaŋazi ŋizigwunaŋ ŋi, kaka iti eḏi ŋa gwu ŋuma mac eḏizelŋece tatap, kaka ṯiŋaca ŋa gwu ŋijina na ŋuduri ŋeṯi kikindeḏi yaŋna yalu, ŋwu ṯa kirem eṯi ṯiŋaci ṯofḏana yaŋna yalu, eḏirlinelu ter.
20 ur ŋa gwu luway leḏi ŋikya ta, eṯi ṯofḏana ere eḏici ŋaŋwuzi ŋuma ŋere mac. 21 lakin ki lomur ṯa kla na aḏa kwuməgini kwɔmne-na kweṯi ŋazi gi ṯurony miḏa kire-kirem ŋgu? kwɔmne-na ŋgwa kweṯi ŋazi irmiḏiḏi ŋiɽany-na. 22 lakin kedina ŋa gwu ki ŋikya-na eḏorɔ kirem luway leḏi Allah, a limaɽazi nani ŋa gwu ṯofḏana ṯirlinelu ter ṯeṯi ŋazi irmiḏiḏi ŋimiiḏa-na ŋiaŋ, ŋinḏi eḏi nanniḏa dɔk. 23 kaka eṯi gwu ujra weḏi ŋikya orɔ ŋiɽany, lakin haḏiya wir beyin weḏi Allah wiri ŋimiiḏa ŋiaŋ, ŋinḏi eḏi nanniḏa dɔk eḏi Kwruztu-na kweni Yecu, kwir Kweleny kweri.
© Nuba, Koalib Ngirere New Testament © First published by the British and Foreign Bible Society in Khartoum in 1967.