aza 3
ŋafur ŋeḏi buuluz eḏi ŋi ruwezi ŋejmeṯi lu ŋeḏi Allah
1 ŋiɽaŋal ŋi ŋu ta, nenyari ki yiriny, nyi kweni buuluz, kwumorɔ mabuuz kweḏi Kwruztu kweni Yecu ŋiɽaŋal ŋi ŋalu lir umam. 2 a liti lilŋiiḏi manya eḏaruŋw, Allah wumenyi inḏeḏa haḏiya wuŋwun wir ṯimeca ṯeḏi ŋimɽi ŋuŋun ŋiɽaŋal ŋi ŋalu, a? 3 nenyi Allah ilŋiiḏini ŋejmeṯi ŋuŋun ṯiruweniza ṯi lu, kaka lucaŋazi gwu ŋɔkwɔ; 4 na mezi orti ŋulucaŋazi ta, a eḏi ŋuma eḏelŋece eḏaruŋw, nyi kwilŋiiḏi ŋejmeṯi ŋeḏi Kwruztu, 5 ŋiti ŋimerzi ruweci lizi lu leḏi kerrenyŋw tuk mac, kaka ruwecerzi gwu yafura lu liɽi li kirem, Ṯigɽim ṯi ṯirlinelu ter, 6 ŋeni ŋu, lizi lir umam linḏi eḏafi ŋoru nyiŋa li, leni tɔk kwɔmne kweḏi aŋna wutuput nyiŋa li, ner oɽmaṯi nyiŋa li ki ṯikitaḏa-na eḏi Kwruztu-na, ŋiɽaŋal ŋi ŋeḏi injiil.
7 nyi kwumorɔ kafur keḏi injiil wu, haḏiya yi wir ṯimeca ṯeḏi ŋimɽi ṯinḏeḏa nyi Allah, ŋiɽaŋal ŋi ŋeḏi ŋuma ŋuŋun ŋeṯerrini. 8 emba, nuŋw inḏeḏa nyuŋwu ṯimeca kḏu, ur nyi gwu fa ta kineni kwɔkwɽeny beṯen tɔk eḏi liḏaḏu la tatap lɔkwɽeny, leni lirlinelu ter eḏi Kwruztu-na, eḏi zi andaci lir umam ŋiɽaŋali ŋiccaw ŋeḏi ŋurṯu ŋinanu eḏi Kwruztu-na, ŋiti ŋeŋgir zi eḏici ŋuma mac eḏizelŋece ezir wandir gwu. 9 na eḏilŋiiḏini lizi tatap ŋama-ŋamaŋ nizama kweḏi ŋejmeṯ, ŋulucina kerreny tuk eḏi Allah-na, wa wukita kwɔmne ndendeṯ; 10 mindaŋ kirem kaniiza gi, a ṯeḏinayeyna ṯeḏi Allah, ṯiṯemḏelu purpur, ruwenezi limaleyka lu zulṯa gi kezir weḏi yilim. 11 nuŋw ŋi kitaḏa ŋu ki ṯugwor-na ṯuŋwun kwɔnkwɔn, mindaŋ muŋw zi erri kirem eḏi Kwruztu-na kweni Yecu, kwir Kweleny kweri. 12 na duŋgwun-na ta, a kwumer orɔ hurr eḏi duŋgwaḏa Allah nana, kaka mer gwu alliḏa Kwruztuŋw rugwori nana ṯəmna ṯi. 13 ṯaŋwu na ŋazi andaci eḏere pini rugwor-na mac ŋeḏi ṯurfa tinyi, ṯirerinica ŋazi ṯi, kaka inḏuŋw gwu keni eḏorɔ ŋiniṯ ŋalu.
ṯuṯalu ṯara ṯi ki yiriny eḏizelŋe ŋir injiil ṯugwor ṯi
14 menyji kiḏayini ŋu ta, nenyi iideci Papaŋw lu ŋwurgwuŋi— 15 kaka ruḏu gwu lizi tatap, leḏi kilerena na leḏi ṯurmun tɔk, kogwur wutuput weni wuŋun ner eni nyiɽŋeyin— 16 mindaŋ, ŋiɽaŋal ŋi ŋeḏi ŋurṯu ŋuŋun ŋupak ŋeḏi ŋiniṯ ŋuŋun, ŋwufirlazi ŋaŋwuzi la teter ki rugwor-na ralu lac, ŋuma ŋi ŋeḏi Ṯigɽim ṯirlinelu ter. 17 na eti nyi ari ki yiriny tɔk mindaŋ a Kwruztu ruzi rugwori ralu duənu kwuŋwun eḏi gwu nanni-na, təmna ṯi; mindaŋ ma enji ŋwara lu teter ki ṯamɽa-na, 18 a kaṯazi ŋuma eḏi zi miḏa, lizi li tatap leni lirlinelu ter eḏi Kwruztu-na, ŋeḏi ṯamɽa ṯiṯemḏelu purpur, 19 na eḏelŋe ṯamɽa kḏu ṯeḏi Kwruztu, ṯeṯi ṯamḏaci ṯilŋiiḏa la, mindaŋ a urenina dedep ṯurena ṯi ṯeḏi Allah.
20 eḏi ŋgwa kweṯeḏi ŋuma eḏizerri ŋa ŋiṯemḏizi tatap ŋeŋgir ŋi uṯizelu, ya ŋeŋgir ŋi ireci yey lu tɔk, ŋiɽaŋal ŋi ŋeḏi ŋuma ŋeṯerrini deŋgeri-na, 21 eḏi ŋgwa ortani ŋiniṯ ŋi kaniiza-na, na eḏi Kwruztu-na kweni Yecu tɔk ki ŋelŋe-na tatap ŋinḏi, dɔk dɔk. emba.
© Nuba, Koalib Ngirere New Testament © First published by the British and Foreign Bible Society in Khartoum in 1967.