aza 1
ṯagna na ṯortaḏa
1 nyiŋa liri leni buuluz-ŋa zilwaanuz gi na timuṯaawuz tɔk lagnaŋazi ledi kaniiza kinani ṯazaluniiki, lir ledi Allah wir Papa, na Kweleny kweni Yecu Kwruztu, eḏi ṯimeca ṯeḏi ŋimɽi nani daŋgal-na ŋiɽena ŋi.
2 nyiŋa leṯeca Allah zukran ŋeni ŋaŋa tatap, mer ŋazi ortuti kworɔ dɔk, ki ṯara-na ṯeri ki yiriny. 3 nyiŋa leṯi kikiḏayini ki yey-na yeḏi Allah weri wir Papa, ŋɔḏɽor ŋalu ŋedi ṯəmna, na ŋedi ṯamɽa, na ṯindinyana nana ṯalu ṯəkiza ṯi kizen ṯimɔ ṯi alliḏa Kwelenyi kweri kweni Yecu Kwruztu rugwori nana. 4 kaka ilŋiiḏinyi gwu, lieŋgeri lamɽa zi Allah, eḏaruŋw, Allah wumɔŋazi ecena; 5 kaka iti ilicaŋazi gwu ŋiɽaŋal ŋir injiil weri kandiza gi tuɽuk mac, lakin ŋuma ŋi tɔk Ṯigɽim ṯi ṯirlinelu ter, mindaŋ mezelŋe eḏaruŋw rugwor ri minmin, ŋiri mi rerem, ŋilŋiiḏi ŋazi rac, a limenyjinḏa lir lor lurti ḏa daŋgal-na ŋiɽaŋal ŋi ŋeni ŋalu. 6 na a limenyji kwakiḏa eḏaɽani nyuŋwuzi na Kwelenyi tɔk, kaka ma gwu emni ŋiɽaŋali ki ṯurfa-na ṯuru ṯinyiŋla ṯi-na ṯeḏi Ṯigɽim tirlinelu ter; 7 ṯaŋwu ta, a ma orɔ leṯir zi gwu izazi tatap kla leḏici Kwelenyi ṯəmna linani makḏunya na akaya tɔk. 8 a limɔrərmi ŋiɽaŋal lu ŋeḏi Kweleny makḏunya na akaya tɔk, na ṯəmna ṯalu ṯeṯinani eḏi Allah-na ṯimɔfaḏiḏa ezir nana ndendeṯ; ṯaŋwu na ŋiɽaŋal ere nani ŋere kwokwony mac eḏizandazi. 9 ŋeṯi zi lizi andindazi ŋimernyji ŋi enji kiloɽu-na, ner iṯiḏi ŋiɽaŋal la ŋeni ŋaŋa ŋimɔ ŋi orlaca kwɔmne ŋwudɔŋw kwudaɽmaḏir rii ri, eḏi kwoce Allah lu wumiiḏu wir rerem, ŋɔḏɽor ŋi ŋalu, 10 na eḏəkizi Toru tuŋwun kizen, tinḏi eḏila teḏi kilerena, tinderṯa timɔŋw diɽi ki ŋiɽany-na, teni Yecu, kweṯinyji kileḏi ki ŋirŋaza-na ŋinḏi eḏila.
© Nuba, Koalib Ngirere New Testament © First published by the British and Foreign Bible Society in Khartoum in 1967.