aza 3
buuluz muŋw zi ermici ŋiɽaŋal ŋi ŋeḏi ṯundenena kaniiza-na
1 lakin, lieŋgeri linyi, nyi kwiti kweḏi ŋuma mac eḏandaci ŋaŋwuzi kaka lizi leḏi Ṯigɽim-na tirlinelu ter, lakin kaka kla lir zurum kweḏi rɔgwɽɔ ruɽun, lir kaka nyor nyɔkwɽeny eḏi Kwruztu-na. 2 nyi kwuɽanaŋazi ŋan ŋi, nenyere ɽuni ŋaŋwuzi eḏne yi mac wufirli-na, kaka iti ṯimayina ŋa gwu eḏi ye ki lomur ṯa kla mac, na iti kinna ṯimayina ŋa gwu kirem tɔk mac eḏi ye, 3 kaka ur ŋa gwu keni zurum kweḏi rɔgwɽɔ ruɽun kire-kirem ŋgwu. kaka ma gwu kiyaḏizi ŋiɽany-na, eḏi ŋa gwu ŋerya daŋgal-na tɔk ta, a liti liri zurum kweḏi rɔgwɽɔ ruɽun manya, leṯizerri tatap kaka lizigwunaŋ a? 4 ma gwu kwete aruŋw: nyi kwiri kweḏi buuluz; na kwir ter: nyi kwiri kweḏi abuluuz, a liti liri kaka lizi liira Ṯigɽim-na manya?
5 aḏa kwiri kweni abuluuz? na aḏa kwiri kweni buuluz? yaḏaam yiri pa tuɽuk, yimɔŋazi mulḏa ki ṯəmna-na, ŋiɽaŋal ŋi ŋimɔ zi Allah inḏeḏa lere lere. 6 nyi ta, nenyi kiiḏi, na abuluuz orɔ kwumaŋɽaḏa ŋaw, lakin na Allah orɔ wuminḏeḏa lola ŋuma eḏi duŋgwuŋgwa. 7 ner ṯa orɔ ŋwu, kaka iti ur gwu kwizi kwere kweṯikiiḏi ŋiɽaŋal ŋere mac, ya kwizi ŋgwa kweṯaŋɽaḏa ŋaw ŋiɽaŋal ŋere tɔk mac, na Allah orɔ ṯuɽuk weṯinḏeḏa lola ŋuma eḏi duŋgwuŋgwa. 8 ŋgwa kweṯikiiḏi, na ŋgwa kweṯaŋɽaḏa ŋaw, eṯir biɽḏina; ler zi keni inḏeḏa ujra weḏi ŋɔḏɽor ŋeŋen ter ter. 9 Allah wiri weṯir yi oɽmaṯi ki ŋɔḏɽor-na, na Allah wiri weṯi ŋazi ruzi ṯuruny ṯuŋwun, na ṯawca ṯuŋwun tɔk.
lom leḏi kla leṯizilŋiiḏini liḏaḏu ŋir injiil
10 nyi kwiri kaka kwɔrṯɔ kwilŋiiḏi ŋɔḏɽor beṯen, kwumɔkete ṯugwagiza, ṯimeca ṯi ṯeḏi ŋimɽi ŋeḏi Allah, a gwu kwizi kwir ter awci la. nenyaruŋw, eḏi lɔrṯɔ lere lere aci ŋama-ŋamaŋ, 11 kaka iira gwu ṯugwagiza ṯir ter mac ṯeḏi kwere ŋuma eḏi kete, illi kḏa ṯimenyi kete ṯuɽuk, ṯinderṯa ṯeni Yecu Kwruztu. 12 lakin eŋgi kwizi kwere awci ki ṯugwagiza la ḏahab ṯi, faḏḏa gi, yal yi yir gaali, ŋiɽfin ŋi, karwa gi, ya ŋwuforu ŋi, 13 ŋɔḏɽor ŋeḏi lizi lere lere ŋinḏir zi eḏi zi ruwenicelu. kaka inḏi gwu lamin leḏi Kweleny eḏi ruwenelu igə yi, na igə wa wunderṯa wuṯeci ŋɔḏɽor ŋimɔ zi lizi erri lere lere, ŋurɔtɔ ḏa. 14 ma ŋɔḏɽor ŋimɔ zi kwizi kwere aci ki ṯugwagiza la ere irṯaḏa lu igə yi mac, kwunderṯa ŋgwa kwafi ujra. 15 ma ŋɔḏɽor ŋeḏi kwizi kwere uɽeḏi ndeṯ, kwunde kwiri kwuṯuzi ujra weŋguŋw afi; lakin ki rɔgwɽɔ ruŋwun ŋwu firaŋ igəŋi-na eḏi kilaw.
16 a liti lilŋiica manya eḏaruŋw, a liri duənu kwirlinelu ter kweḏi Allah, na eṯi gwu Ṯigɽim ṯeḏi Allah nani-na? 17 muŋw kiyazi kwere duənuŋw lu kweḏi Allah, a Allah irṯazi kwizi lu ŋgwa. kaka eni gwu duənu kweḏi Allah kwirlinelu ter, na eni ŋaŋa duənu ŋgwa.
18 eṯuŋw keɽinjinelu kwere mac. muŋw aruŋw, nyi kwiri kweḏi yeyna ki ṯurmun-na kḏu, eḏuŋw orɔ keɽyaŋ; mindaŋ ta ŋwu ma eḏi yeyna. 19 kaka ṯeḏinayeyna ṯeḏi ṯurmun kḏu ṯiri ŋiḏyaki ki yey-na yeḏi Allah, kaka luḏinar gwu, ŋaruŋw:
ṯeḏinayeyna ṯeŋen ṯimorɔ kaka kiɽbin kuŋwun, kezi gi iidezi.
20 na kwokwony:
nezi Kweleny elŋece ŋeŋen tatap ŋeḏi lizi leḏi yeyna, ŋiti ŋeḏi fayḏa mac.
21 ŋwu ṯaŋwu, eḏi ŋi ere ellini ŋeḏi lizigwunaŋ mac, kaka ur gwu kwɔmne tatap kwalu, 22 muŋw eni keni buuluz, ya abuluuz, ya zafa, ya ṯurmun, ya ŋimiiḏa, ya ŋiɽany, ya lomur leḏi kiremŋw, ya lomur kla linḏi, kwɔmne ŋgwu tatap kwalu kwiri; 23 na orɔ ŋa gwu leḏi Kwruztu; na Kwruztu orɔ kweḏi Allah.
© Nuba, Koalib Ngirere New Testament © First published by the British and Foreign Bible Society in Khartoum in 1967.