Dhuŋun dhadhuthejo lijo lina luthi ŋelenya nyuni
1 Abricul lijo peth aluthejo lijo lina luthi ŋelenya nyuni; ŋinena athi ŋeleny idhi kwiji gweda no, abi ŋidhi di Kalo dogo; a leleny lina lo ŋinena ligitinu di Kalo. 2 A minoŋ gwina gwadoinya kwelenya gwidoinyo dhuŋuna dhina dhigeto Kalo; a liji lina ladoinya laji lapai ẖukm gi lidom legen. 3 Ŋinena lina luthi ŋelenya lati luthi ŋidhenyo gi ŋiro ŋina ŋiŋir no, albuthi ŋidhenyo gi ŋidi ŋina ŋike. Abi ŋa gwati gwuminyu darnu ŋa gwati gwadhenya kwijo gwina gwuthi ŋelenya na? Apo ŋiro ŋina ŋiŋir a ŋa gwabuje orthadhaŋw dugun. 4 Ŋinena ŋeda gwiro gadham ga Kalo gan ŋa gi dhuŋun dhina dhiŋir. Abi ada ŋa gwimapai ŋida ŋina ŋike, ŋabidhenya; ŋinena athi ŋeda apo kalala tur no; ŋinena ruŋw gadham ga Kalo duŋwakimiye gi dhuŋun dhadhi kadugore gi kwiji gwina gwapai ŋida ŋina ŋike. 5 A minoŋ aram gwanya uthejo nyuni ko, gwati gwan kadhugore dogo no, ŋwubiro ko gi dhuŋun dha dhugor. 6 Gi dhuŋun ibidha nyalimejo ko; ŋinena rilo jadham ja Kalo jina jathapai ŋiro ibiŋa ŋwamun peth. 7 Dhedhul lijo peth ŋida ŋina ŋiro ŋegen; dhedhul kwijo thulba gwina gwathapai thulba; nyaldhedha ujra lina libupo ujra; nyadhedha lijo lina lathanyal dhenya; a nyalneje lina luthi nejuŋw.
Uminyi gwa ŋimega
8 Athanya ithi gamja ga kwiji gweda no; nyabi uminyejiye gweta gweta dagalo ganu; gwina gwuminyi kwijo gwiter gwimameaje naamuus. 9 Gi dhuŋun ibidha, athaŋa dhireyo kwaio gwa kwiji gwiter no, athaŋa rinyio dhimar no, athaŋa apo ŋwuramai no, athaŋa abiŋudhi kwijo gwiter ŋidhuŋinaŋa nono no, athaŋa ŋidi amiradhi ŋa liji liter no; a ada amr gwiter gwimaje gi dhuŋun ibidha, gwaro minoŋ, athaŋa uminyi kwijo gwina gwathanyagwai jaijiye galo gwiro ŋinena athaŋan uminyi gwidom gwuŋa. 10 Uminyi gwati gwiro gwadhapai dhuŋuna dhina dhike gi kwiji gwina gwathanyagwai jaijiye galo no; abi uminyi gwiro gwadhi meaje naamuus.
Ila gwa Lamun la al Masiiẖ
11 A gi dhuŋun ibidha ko, nyaŋa liliŋidhi lamun darnu ŋinena lamun limila dilbirthe ŋwar; ŋinena gilaŋ gwega gwimajani githo gi lamun lina luminyanalai kwereny. 12 Gile gimamadhini a aŋin imaje githo; a minoŋ abricije alwala ŋiro galo ŋa girim, algena kiraŋa gina giro carthuŋw ga fure. 13 Abricije alelila momaŋ, gwiro ŋinena athin liji elila galo kaŋin ganu; gwati gwaro gi dhuŋun dha gimure, i dhuŋun dhadhi rilele, i dhuŋun dhadhidhre la lai, i dhuŋun dhina dhathapa dhara, i kaijiye gi je, i ŋiduiny no. 14 Nyabi gena Kwelenya gwina gwan Yasuuⓐ al Masiiẖ, athanya geto afkaar gwalo gi ŋidi ŋina ŋathamira aŋina yalo no.
© First published by the British and Foreign Bible Society in 1966.