Aⲁmaal Ar Rusul 7 - Kitham Gina Giyaŋ 1966 (HBN)

Dhuŋun dhina dhabiŋu Istifaanuus

1 A kweleny gwa gusus arnu, Dhuŋun ibidha dhiro minoŋ a? 2 Ŋwarnu, Liji lai lina liro limega, a baboŋa, diŋinul. Kalo gina guthi majdh gaŋinijo babuŋw gwega gwina gwan Ibraahiim dina juŋw Ma ben al Baẖren, kwereny nanaŋ gwati gwijo gi H̱aaraan no, 3 ŋwaicinu, Tui gi len luŋa, a gi liji luŋa, ŋela gi len lina laŋa aŋajo. 4 Ŋwubitu gi len la Kaldaaniyiin, ŋwuje mine gi H̱aaraan. A dina ma babo gwuŋun ai, ŋwela gi len lina lathanyan je ŋinena. 5 Athuŋwbidhedhi kaloŋa mine gadhuŋwunje, i gitiny gina gadhuŋwun geta lora luŋun no; ŋwubabiŋaijo darnu guŋwdhedha ŋwulaŋu ŋwuŋun ŋwina ŋwaji ŋwila gidon, ŋinena athuŋw uthi nanaŋ ŋare no. 6 A Kalo gabiŋu minoŋ, ŋwulaŋ ŋwuŋun ŋwaji ŋwaje gi len lina lati liro len legen no; a ŋwaro jine ja liji la len ibile, a ŋwali umeye ŋiya jidhileo arabaⓐ miiya. 7 A liumam lina lirujilo jine laji linyil akimiye nyi, Kalo garna, a gidon gi dhuŋun ibidhe latuiya a linyi orthadha kalo ibiga. 8 A ŋwudhedha dhuŋuna dhina dhidiminu dhadhi uredhini; a minoŋ ŋwuliŋa Isẖaaguŋw, a ŋwura gi lamun lina liro nimra dubaŋ; a Isẖaag liŋa Yaⓐguubuŋw, a Yaⓐguub liŋa lelenya la baboŋa lina liro die‐a‐ram. 9 A leleny la baboŋa ubijo ŋida ganu ŋina ŋuthilo Yuusuf, alelaŋ gi Mas̱r. Athilbije Kalo gai, 10 ŋwubigilaŋiye ŋidi ganu ŋuŋun peth ŋina ŋadhumeye ŋiya, a ŋwudhedha niⓐma a bebra gi je ganu ja Firⓐuun gwina gwiro malik gwa Mas̱r; ŋwuruje kweleny gi Mas̱r alaŋ a gidunu alaŋ gwuŋun peth. 11 Abi gidhuŋur ila gi ŋwen peth ŋwa Mas̱r a Kanⓐaan, a dhuŋun je dhina dhibur gwuleny; athi baboŋa lega bujo ŋida ŋa dheny no. 12 A dina ma Yaⓐguub diŋini darnu ŋwon ŋwo gi Mas̱r, ŋwukeje baboŋaije lega gi lamun lina liro kwerkwereny. 13 A gi lamun lina liro nimra ram a Yuusuf aŋajo limegen darnu ŋeda gwiro; a Yuusuf aŋajo Firⓐuunuŋw limegen. 14 A Yuusuf ukejiye di babo gwuŋun gwina gwan Yaⓐguub, a liji peth luŋun, lina liro dure‐thiril a die‐a‐thudhina. 15 A Yaⓐguub ule gi Mas̱r, ŋwubai, ŋeda, a baboŋa lega. 16 Alapai algwela gi Shakiim, algeta gi dhel ganu dhina dhili Ibraahiim luro la gwarush gwina gwiro faḏḏa gi keleŋa ga H̱amuur gwa Shakiim.

17 Abi dina ma lamun je githo la dhuŋun dhina dhabiŋaijidhai Kalo dhina dhalifijodhai Kalo Ibraahiimuŋw, a liji oinyadhani gwuleny gi Mas̱r, 18 di a malik gwiter dire, gwina gwati gwiliŋidhi Yuusufuŋw no. 19 A ŋeda ibigwa uthi dhuŋuna dhina dhuthi ŋwujimiya ganu gi liji alaŋ lega, athuŋwupijo baboŋaije lega dhuŋuna dhina dhathil umeye ŋiya, dathi ŋwugur ŋwegen guthini por dathil midho no. 20 A Muusa gwiliŋinu kaija ibige, a ŋwubujini gwiŋir gwuleny, ŋwudimini gi dunu gwa babo gwuŋun luweo thiril; 21 a dina muŋw guthini por, a ŋera ŋa Firⓐuun apai, ŋwireje ŋwuro ŋari ŋuŋun. 22 A Muusa alimini bebruŋw peth gwa liji la Mas̱r, ŋwubur nono gi dhuŋun a gi ŋiro. 23 A dina muŋw ro jidhileo dure‐ram, ŋwuthi dhuŋuna gi dhugor ganu dhuŋun duŋwela daŋadha limegen lina liro keleŋa ga Israayiil. 24 A dina muŋw aŋa gweta gwina gwibujo dhuŋuna dhina dhike tur, ŋwudujo gwina gwibujo dhuŋuna dhina dhike, ŋwura galo, ŋwurinya Gwimas̱r. 25 Ŋwari gi dhugor ganu dhuŋun nu udubidi limegen laliŋa darnu laji lal Kalo gilaŋiye dhoi dhai dhuŋun; athibi ŋediŋa liŋidhi no. 26 A gi lamun lina ligwujo lamun ibile ŋwulbuje ram dilkadhe, ŋwari ŋwulabiŋaijo diliŋiriye, ŋwulaicinu, Liji lai, nyaŋa liro ŋimega; kworaŋ nyabapai dhuŋuna dhina dhike gweta gweta dagalo ganu? 27 Abi gwina gwurijo kwijo gwiter dhuŋuna dhina dhike dhiŋa Muusuŋw, ŋwaicinu, Ei gwirujaŋa kweleny a gadhi guri? 28 Ŋa gwibupo dinyi rinya, gwiro ŋinena rinyiaŋana Gwimas̱r dilaŋina a? 29 A Muusa abire dina muŋwdiŋini dhuŋuna ibidha, ŋwuro gwirin gi len la Madiiyaan, kalo gina giliŋidhuŋwna keleŋa ram gina giro loma. 30 A dina ma jidhila erna jina jiro dure‐ram, a malaak gwa Kweleny uŋinijo gi leba gi len lina lan Siinaa gi dhiŋila dha iga gi kwari. 31 A dina ma Muusa aŋa dhuŋuna ibidha, ŋwali galo dir gi dhuŋun dhina dhaŋudhuŋw; a dina muŋw doga githo duŋw daŋa, ŋwudiŋini ŋwal ŋwa Kweleny, 32 ŋwarnu, Nyi gwiro Kalo ga baboŋa luŋa, a Kalo ga Ibraahiim, a Kalo ga Isẖaag, a Kalo ga Yaⓐguub. A Muusa ube galo, athuŋw uthi reuŋw ganu datiŋa no. 33 Abi Kweleny aicinu, Wuludhi caudhe galo ŋwora ŋwuŋa; kalo gina go gidhunudhaŋana alaŋ giro kwiyaŋ gwina gwiŋir didirel. 34 Titiganu nyi gwimaŋa umuŋw ŋiya gwa liji liny lina lo gi Mas̱r, a nyi gwimadiŋini aruŋw gwegen gi dugor ganu degen, a nyi gwimula dinyil guda galo, abi ila ŋinena ŋukeje gi Mas̱r.

35 Muusa gwiro ibigwa gwina gwidoinyilo, alarnu, Ei gwirujaŋa kweleny a gadhi? Ŋeda gwiro gwina gwukejo Kalo duŋwuro kweleny a gwadhi guda galo dhoi dhai dha malaak gwina gwaŋinijo gi kwari. 36 Ŋeda gwiro ibigwa gwina gwimalteya por, ŋwugeta ŋiro ŋina ŋathalije lijo galo dir a ŋwapai ŋiro ŋina ŋipiŋipa gi len la Mas̱r, a gi Baẖr gwina Gwure, a gi leba jidhileo dure‐ram. 37 Muusa gwiro ibigwa gwina gwabiŋaijo keleŋa ga Israayiil, ŋwulaicinu, Kweleny gwina gwiro Kalo galo gaji gajidirijo nebuŋw gi limagalo ganu, gwiro ŋinena nyi; a gwanya deŋinaijo. 38 Ŋeda gwiro ibigwa gwina gwijo gi kaniisa gi leba malaak gwai gwina gwabiŋaijo gi len alaŋ lina lan Siinaa ŋedaŋa baboŋa lai lega; gwina gwapo dhuŋuna dhina dhuthi midhuŋw dijidhedha. 39 Gwina gwati gwibupo baboŋa lega diluthejo nyuni no, albidhiŋa, alwureje dugore degen gi Mas̱r. 40 Alaici H̱aruunuŋw nu, Gitijije kaloŋa athiji madhinijo; gi dhuŋun dhan Muusa ibigwa gwina gwiteyije gi len la Mas̱r, anaŋa lati liliŋidhi aŋ gwina gwimaje dugun no. 41 Algegito ŋimiro ŋina ŋitiny gi ŋwamun ibiŋwe, aldhugijo ŋida, aliŋir dugore gi ŋiro ŋa doi degen. 42 Albi Kalo urle galo, ŋwulabrico dilorthadha ejigur ya Sama; gwiro ŋinena ulinuŋwna kitham ga nebiŋa, Dunu gwai gwa Israayiil, nyaŋa liminyi dhugijo ŋida ŋadhi dhuge jidhileo dure‐ram gi leba a? 43 Abi nyaŋa lapo gutu ga Muuluuk, a ludum la kalo galo gina gan Ramfaan, s̱uwaar gwina gwigegitanya danyal idijo ŋwurko ŋwai; a nyi gwajapa kwereny di Baabil.

44 Baboŋa lega luthi gutu ga shahaada gi leba, gwiro ŋinena abiŋuŋwna ŋeda gwina gwabiŋaijo Muusuŋw duŋwgeta gwiro ŋinena s̱uura gwina gwaŋudhuŋw. 45 Gina gapo baboŋa lega ko gi lamun legen Yashuuⓐ ŋalai dina malmutha lena la liumam, lina limal Kalo ruce gi je ganu ja baboŋa lega, di gi ŋwamun ŋwa Daawud; 46 gwina gwibujo niⓐma gi je ganu ja Kalo ŋwubupe duŋwbuje kaloŋa gadhije gan Kalo ga Yaⓐguub. 47 Abi Sulemaan aicijo ŋeduŋw duna. 48 Abi gwina gwinunu gwuleny gwati gwathije gi heyaakil gwina gwigitinu doi dai no; gwiro ŋinena arna nebi, 49 Sama gwiro kursi giny, a gidhila giro gidhur ga ŋwora ŋwiny. Dunu gwiro dhaŋ gwina gwadhinyil aicijo? Kweleny gwarnu, i kalo giro dhaŋ gina gadhinyin gatho uwa. 50 Dhoi dhiny dhati dhiro dhina dhigeta ŋida ibiŋa peth na? 51 Nyaŋa lina lathi biradhalaŋ gi dugor ganu dalo a lina lati liro ŋwudhriny gi dugor ganu dalo a gi nyuni ganu nyalo no, nyaŋa lathekajo Dhigirima dhina Dhiŋir, gwiro ŋinena athin baboŋa lalo ekajo nyaŋa lirna ko. 52 Nebi gwiro gwirau gwina gwati gwirinu baboŋa lalo no. Alrinya ŋediŋaije lina lidhi kwereny alabiŋi dhuŋuna dhan ila gwa ŋeda gwina gwiŋir; gwina gwimanyanugejiye a gwina gwimanyarinya. 53 Nyaŋa lina lidhedhilo malaayka naamuus, athanyabi dimii no.

Ai gwa Istifaanuus

54 Dina maldiŋini dhuŋuna ibidha al dugor pi ganu gwuleny, alŋireje jiŋai nono. 55 Abi ŋeda oinyadhe Dhigirima dhina Dhiŋir, ŋwubaŋalaŋ gi Sama, ŋwaŋa majdh gwa Kalo, a Yasuuⓐ didhuna gi dhoi dhina dhiro dhiŋir dha Kalo, 56 ŋwarnu, Aŋadhul, nyi gwa gwaŋadhi Samawaat gwiginu, a Ŋari ŋa liji didhuna gi dhoi dhina dhiro dhiŋir dha Kalo. 57 Albure gwula ŋwal ŋwai ŋwina ŋwipa, algirba nyuni galo nyegen, alrudhudhe nono dhugor dhai dhetipo, 58 alteye len por gi mediina alaice nyol nyai. A lina liro shuhuud wala ciraŋa jegen galo alligeta gi ŋwora ganu ŋwa kamal gina gan Shaawul. 59 Alaici Istifaanuusuŋw nyol nyai, a ŋeda urnie Kaloŋa, ŋwarnu, Kweleny gwai gwina gwan Yasuuⓐ, apo dhigirima dhiny. 60 Ŋwujalo ŋwurko ŋwai ŋwure gwula ŋwal ŋwai ŋwipa ŋwarnu, Kweleny gwai, athaŋa geto ŋida ibiŋa ŋina ŋike degen no. A dina muŋw are minoŋ, ŋwudhire ŋwar ŋwai ŋwa dhai.