Uminyi gwa Babo gwathiji odha gi midhe gwina gwiŋir
1 Aŋadhul, aŋ gwiro uminyi gwina gwidhedhije Babo danuthi jiriny jan keleŋa ga Kalo. Gi dhuŋun ibidha gidhila gati giliŋidhije no, ŋinena athuŋw liŋidhi ŋeduŋw no. 2 Liji lai lina luminyinu, ŋinena alŋa liro keleŋa ga Kalo; a alŋa loma lati liliŋinu momaŋ alŋa laji laro akakwai no, abi alŋa liliŋidhi darnu ada gwimaŋina, alŋa laro ŋinena ŋeda; ŋinena adhilaji alaŋa ŋeduŋw gwiro ŋinena ruŋw na. 3 A liji peth lina luthi dhunijuŋw ibigwa dugun gwalgwai juriye lidom legen, gwiro ŋinena ŋeda gwijuro.
Ŋidi ŋina ŋike ŋati ŋuthi dhuŋuna gi keleŋa ga Kalo no
4 Kwiji gwina gwimapai ŋida ŋina ŋike gwathikiye naamuus ko; ŋinena ŋidi ŋina ŋike ŋathikiye naamuus. 5 A nyaŋa liliŋidhi darnu ŋeda gwaŋinu dapai ŋida ŋega ŋina ŋike; a ŋidi ŋina ŋike ŋati ŋijo dugun no. 6 Gwina gwathimuthini galo dugun athuŋw apo ŋida ŋina ŋike no. Gwina gwathapai ŋida ŋina ŋike gwati gwaŋadhuŋw no, athuŋw liŋidhi ŋeduŋw no.
7 Keleŋa gai gina gitigitiny, athanya abrico kwijo gweta gwajukinejo ganu no; gwina gwathapai dhuŋuna dhiŋir ŋeda gwiŋir, gwiro ŋinena ŋeda ibigwe gwiŋir. 8 Gwina gwathapai ŋida ŋina ŋike gwiro gwa Ibliis; a Ibliis gwathapai ŋida ŋina ŋike ro kwerkwereny di a ŋinena. Gi dhuŋun ibidha Ŋari ŋa Kalo ŋaŋinu, dekajo ŋiro ŋa Ibliis. 9 Gwina gwiliŋinu di Kalo athathuŋw apo ŋida ŋina ŋike no; ŋwulaŋ ŋwuŋun ŋwathije dugun, athuŋw uthi ŋoma dapai ŋida ŋina ŋike no, ŋinena liŋinuŋw di Kalo. 10 Gi dhuŋun ibidha keleŋa ga Kalo a ga Ibliis giliŋinu. Gwina gwati gwathapai dhuŋuna dhina dhiŋir gwati gwa Kalo gwiro no, a ŋeda gwina gwati gwuminyu megen no gwati gwa Kalo gwiro ko no. 11 Dhuŋun dhiro ibidha dhina dhidiŋinanya ro kwerkwereny, athil uminyiye gweta gweta dega ganu. 12 Athil rui ŋinena Gaayin gwina gwiro gwa Gweta gwina Gwike, ŋwurinya megen no. Gwirinyiuŋw gwaraŋ? Ŋinena ro ŋiro ŋuŋun ŋike, abi ŋa megen ŋiŋir.
Uminyi gwa limega
13 Limaguri lai, athanya alidhi galo dir ada gidhila gimajirini no. 14 Alŋa limaliŋa darnu alŋa limagathana aiuŋw alela di midhe, ŋinena alŋa luminyiyo ŋimega. Gwina gwati gwuminyu megen no, gwathije dai. 15 Gwina gwathirini megen ŋeda gwirinyio dhimar; a nyaŋa liliŋidhi darnu gwina gwirinyio dhimar gwati gwuthi midhuŋw gwina gwathije gwortal no.
16 Gi dhuŋun ibidha alŋa liliŋidhi uminyuŋw gwa Kalo darnu ibigwe gweijije; a gwiŋir dega dileijo limega. 17 Abi gwina gwuthi ŋida ŋa gidhila, ŋwubaŋa megen gwina gwibupo ŋida, ŋwubilaŋthani dhugor dhuŋun gwan ŋeda, akwai uminyi gwa Kalo gwamuthini galo dugun?
18 Keleŋa gai giny gina gitigitiny, athil uminyu dhuŋun dhai i dhiŋila dhai no; albuminyi ŋiro ŋai a dhuŋun dhai dhina dhiro titiganu. 19 A gi dhuŋun ibidha alŋa laliŋa darnu alŋa liro liji lina luthi dhuŋuna dhina dhiro titiganu, algeta dugor dega gi je ganu juŋun. 20 Ada dugor dega dimijakimiye, Kalo gibuthanu gi dugor dega, a gathiliŋa ŋida peth. 21 Liji lai lina luminyinu, mathiji dugor dega akimiyo no, abi aluthi uminyuŋw di Kalo. 22 Dhuŋun peth dhina dhaldhothaije galo dhalbuje dugun, ŋinena athilmuthadha awaamir gwuŋun, athilapai ŋiro ŋina ŋathamira gi je ganu juŋun. 23 A amr gwuŋun gwiro ibigwa, diluminyi jiriny ja Ŋari ŋuŋun ŋina ŋan Yasuuⓐ al Masiiẖ, aluminyiye gweta gweta dega ganu, gwiro ŋinena dhedhijina awaamir gwuŋun. 24 A gwina gwathimuthadha awaamir gwuŋun ŋwumuthini galo dugun, a ŋeda gwanije ganu. A gi dhuŋun ibidha alŋa laliŋa darnu ŋeda gwimuthinu galo dega Dhigirim dhai dhina dhidhedhije.
© First published by the British and Foreign Bible Society in 1966.