Dhuŋun dhina dhadhijaŋajo darnu aŋ gwiro gwina gwa gwulinu kitham ganu ibiga a dhuŋun dha salaam
1 Ruuya gwa Yasuuⓐ al Masiiẖ, gwina gwidhedhi Kalo ŋeduŋw duŋwaŋajo jinea juŋun darnu aŋ gwiro ŋidi ŋina ŋaji ŋaje gwaji gwitiny; ŋwaŋiye dhuŋuna ibidha dina muŋw ukeja malaak gwuŋun gi gine guŋun gina gan Yuuẖanna. 2 Gwina gwiro shaahid gi dhuŋun dha Kalo, a gi shahaada gwa Yasuuⓐ al Masiiẖ, a gi dhuŋun peth dhina dhaŋudhuŋw. 3 Kwiji gwiŋir dhugore gwina gwabiŋaijo, a lina ladiŋini dhuŋuna dha dhuŋun dhina dhabiŋinu, almuthedha dhuŋuna dhina dhulinu gi dhuŋun ibidha; ŋinena jo lamun githo.
4 Yuuẖanna gwulijo kanaayis gina giro kworoŋo‐thiril gina gathije gi Asiiya. Niⓐma dagalo, a audhaijiye galo, gi ŋeda gwina gwo, a gwina gwijo, a gwina gwaji gwila; a gi Digirim dina diro kworoŋo‐thiril dina do gi je ganu ja kursi guŋun; 5 a gi Yasuuⓐ al Masiiẖ, gwina gwiro shaahid gwina gwiŋir, gwina gwiro lira gi liji lina laio, a kweleny gwa maluuk la gidhila. Gwina gwuminyije, a gwimijuye gi ŋidi ŋega ŋina ŋike ŋin ŋai ŋuŋun, 6 a gwimijiruje maluuk a gusus ga Kalo gina giro Babo gwuŋun; gwina gwuthi majdh a ŋeleny gwortal di gwortal. Amiin. 7 Aŋadhul, ŋeda gwo gwidhi jiburu jai; a gwaji gwa je peth aŋa, a ŋediŋa lina lidhugo; a gwa liji la gabaayil peth ga gidhila ara. Ye, Amiin. 8 Nyi gwiro Alif a Alyaa, gwina gwiro kwerkwereny a gwina gwiro gidon, Kweleny gwarna, gwina gwo, a gwina gwijo, a gwina gwaji gwila, gwina gwuthi ŋoma ŋidi alaŋ peth.
Dhuŋun dhina dhaŋinijo Yuuẖannaŋw dhina dhiro ŋinena dhiŋidi dhan al Masiiẖ
9 Nyi gwan Yuuẖanna, gwina gwiro magalo gwalo, a gwina gwaicaijanyalai gi dhuŋun dhina dhibur, a gi gidhila ga Yasuuⓐ al Masiiẖ a mutha dhugore, nyi gwijo gi jaziira jina jan Baṯmus, gi dhuŋun dha dhuŋun dha Kalo, a gwan shahaada gwa Yasuuⓐ al Masiiẖ. 10 Nyi gwijo gi Dhigirim gi lamun la Kweleny, a nyi diŋini ŋwal ŋwina ŋwipa gi dhuro ganu diginy, ŋwiro ŋinena ŋwal ŋwa ŋiridhe, 11 ŋwarnu, Nyi gwiro Alif a Alyaa, gwina gwiro kwerkwereny a gwina gwiro gidon, a dhina dhaŋudhaŋa, ulo gi kitham, a ŋukeje gi kanaayis gina giro kworoŋo‐thiril gina go gi Asiiya; gi Afasus a gi Samiirna a gi Barqaamus a gi Thayaatiira a gi Saardis a gi Fiilaadelfiiya a gi Lawudikiiya. 12 Nyiburle galo dinyaŋa ŋwal ŋwina ŋwabiŋaijiny, a dina minyi urle galo, nyaŋa shamaⓐdaanaat gwina gwiro kworoŋo‐thiril gwina gwigitinu dahab dhai; 13 a keligeny ganu gi shamaⓐdaanaat gwina gwiro kworoŋo‐thiril a gweta je gwiro ŋinena Ŋari ŋa liji, gwigeno kiraŋa gina golaŋ gina gulo di ŋwobani ŋwora galo, a ŋwugena gash gina giro dahab gi jabaŋ juŋun. 14 Abi lira luŋun a uru yuŋun ipidho iro ŋinena jola jina jipidho, a ipidho iro ŋinena talj; a je juŋun jiro ŋinena dhiŋila dha iga; 15 a ŋwora ŋwuŋun ŋwiro ŋinena naẖaas gwina gwijuro, gwiro ŋinena gwiduninu gi iga ina ipa; a ŋwal ŋwuŋun ŋwiro ŋinena ŋwal ŋwa ŋau ŋoinyadho. 16 A ŋwuthi gi dhoi dhuŋun dhina dhiro dhiŋir ŋwuduma ŋwina ŋwiro kworoŋo‐thiril, a kalala tuiya gi ŋwinyu ŋwuŋun gina guthi ŋin ŋwumera ram, a gi je ganu juŋun ŋwuro ŋinena aŋin ina yathora galo gi ŋoma ŋuŋun. 17 A dina minyaŋa, nyide ŋwora ganu ŋwuŋun nyiro ŋinena gwaio. Nyinbi ŋeda geta dhoi alaŋ dhuŋun dhina dhiro dhiŋir, nyaicinu, Athaŋa dhenyo no, nyi gwiro gwina gwiro kwerkwereny a gwina gwiro gidon; 18 a gwimidho, nyi gwaio; a aŋadhi nyi gwo gwimidho gwortal di gwortal, Amiin; a nyi gwuthi mufaaṯiiẖ gwa kalo gina gathin liji je lina laio a gwa ai. 19 Abi ulo dhuŋuna dhina dhaŋudhaŋa, darnu aŋ gwina gwan nu gwo, a aŋ gwina gwan nu gwaji gwila gidon gi dhuŋun ibidha. 20 Dhuŋun dhina dhigilibicinu dha ŋwudum ŋwina ŋwiro kworoŋo‐thiril ŋwina ŋwaŋudhaŋalo gi dhoi dhiny dhina dhiro dhiŋir, a shamaⓐdaanaat gwina gwiro kworoŋo‐thiril gwina gwiro dahab. Ŋwudum ŋwina ŋwiro kworoŋo‐thiril ŋwiro malaayka la kanaayis gina giro kworoŋo‐thiril, a shamaⓐdaanaat gwina gwiro kworoŋo‐thiril gwina gwaŋudhaŋa gwiro kanaayis gina giro kworoŋo‐thiril.
© First published by the British and Foreign Bible Society in 1966.