Yasuuⓐ gwidhedhi lijo ⓐarba alaaf ŋida ŋa dheny
1 Ŋwamun ibiŋwe dina jo liji loinyadho gwuleny liduŋw, athiluthi ŋida ŋa dheny no, a Yasuuⓐ urnie calmiz juŋun, ŋwulaici, 2 Nyi gwa gwinudhi lijo ibila, limanalje ŋwamun thiril a lati luthi ŋida ŋa dheny no. 3 Ada liminyil dhiŋa gi dunu gwegen jamu, laji lubilikudhe gi dhai; lo coŋ lina lidhi kalo golaŋ ganu. 4 A calmiz juŋun aicinu, Kwiji gweda gwuthi ŋoma gwapa ⓐesh na mina gi leba ŋwubidhedha lijo ibila, albeny, alpa? 5 Ŋwulothaije galo, ŋwulaici, Nyaŋa luthi ⓐesh uman? Alarnu, Yo kworoŋo‐thiril. 6 Ŋwabiŋaijo lijo ŋwari lajalo kwiyaŋ alaŋ; ŋwapai ⓐesh ina iro kworoŋo‐thiril, ŋwaici Kaloŋa shukran, ŋwurta ganu, ŋwudhedha calmiz juŋun dilguginijo lijo; alliguginijo. 7 Aluthi ŋwuma coŋ ŋwina ŋwitiŋwitiny; ŋwulbarkiye, ŋwabiŋaijo calmiz juŋun dilguginijo lijo ŋida ibiŋa ko. 8 Aleny, alpa; alothadha ina idi galo gi nyuni kworoŋo‐thiril. 9 A lina lithi lar ⓐarba alaaf; ŋwuldhiŋa. 10 A kaija ibige aluni gi felluuka ganu calmiz jai juŋun, alela gi len la Dalmaanuutha.
Yasuuⓐ gwiŋiŋirudhi calmiz juŋun jina joma jirima gi je gi dhuŋun dhuŋun
11 A Farriisiyiin tuya, alothaije galo duŋwulaŋajo ⓐalaama gwa Sama, alari gwalidheje. 12 Ŋwubi gatho uwa gwuleny gi dhigirim dhuŋun, ŋwarnu, Kworaŋ abi liji lina lo ŋinena kidhila bupe ⓐalaama? Titiganu nyi gwa gwacaijinu, ⓐalaama gwati gwaldhedha lijo lina lo ŋinena kidhila no. 13 Ŋwulbigathani, ŋwuni gi felluuka ganu manaŋ, ŋwela kimumu giter. 14 A calmiz juŋun dhudhani ganu dilapai ⓐesh, athil uthi gi felluuka ganu no, albuthi ⓐesh yetipo dogo. 15 Ŋwulabiŋaijo, ŋwulaici, Diŋinul momaŋ, ethadhinul galo gi dhuŋun dha ŋijini ŋa Farriisiyiin, a ŋijini ŋa Hiiruudus. 16 Alabiŋaijiye, alireye je galo, alarnu, Anaŋa lati luthi ⓐesh no. 17 A Yasuuⓐ liŋa dhuŋuna ibidha, ŋwulaici, Kworaŋ nyabireye je galo nyarnu nyaŋa lati luthi ⓐesh no? Nyaŋa loma lati liliŋinu ganu no, a nyaŋa loma lati liliŋidhi na? a ŋinena dugor dalo doma dibur a? 18 Nyaŋa luthi je, athathanyabi daŋadhi galo na? a nyaŋa luthi nyuni, athathanyabi diŋinu na? a nyaŋa loma lati laŋidhanu na? 19 Dina urtudhiny ⓐesh ganu ina iro thudhina a liji eny lina liro khamsa alaaf, nyuni nyiro uman nyina nyoinyadho ⓐesh alaŋ ina idi galo nyina nyapanyalo? Alaicinu, Nyiro die‐a‐ram. 20 A dilaŋ urtudhiny ⓐesh ganu kworoŋo‐thiril, nyi guginijo lijo lina liro ⓐarba alaaf, nyuni nyiro uman nyina nyoinyadho ⓐesh alaŋ ina idi galo nyina nyapanyalo? Alaicinu, Nyiro kworoŋo‐thiril. 21 Ŋwulbaicinu, Kworaŋ athanyabi liŋidhi na?
Yasuuⓐ gwigeto kwijo gwina gwirima gi je momaŋ gwa Bets̱aida
22 Ŋwela gi Bets̱aida; aludhijo kwijo gwina gwirima gi je, alothaije galo duŋw mini. 23 Ŋwumutha kwijo gwina gwirima gi je gi dhoi, ŋwugwitu por gi len; ŋwugwoinya gi je, ŋwumini doi dai duŋun, ŋwothaije galo, ŋwaici, Ŋa gwo gwaŋadhi ŋida ŋeda a? 24 Ŋwubaŋalaŋ, ŋwarnu, Nyi gwo gwaŋadhi lijo liro ŋinena jari, athilbelila. 25 Ŋwubaji ŋwugeta doi duŋun manaŋ gi je juŋun, ŋwabrico ŋeduŋw dibaŋalaŋ; ŋwure je ganu, ŋwaŋa lijo peth momaŋ. 26 Ŋwudhiŋa gi dunu gwuŋun, ŋwaici, Athaŋa idhi gi len no, i athaŋa abiŋaijo kwijo gweda gi len no.
Buṯrus gwitejo Yasuuⓐuŋw galo ŋwarnu gwiro al Masiiẖ
27 A Yasuuⓐŋa tu calmiz jai juŋun, alela ŋwen ŋwa Ges̱ariiya Fiilibbus; a dina idhilo ŋwothaije calmiz juŋun galo, ŋwulaici, Liji latharnu nyi gwan ei? 28 Albaicinu, Latharnu ŋa gwan Yuuẖanna al Maⓐmadaan; athibi liter arnu, Ŋa gwan Iliiya; a liter arnu, Ŋa gwiro gweta gwa nebiŋa. 29 Ŋwulbabiŋaijo, ŋwulaici, Athanya barnu nyi gwan ei? A Buṯrus abiŋaijo, ŋwaici, Ŋa gwiro al Masiiẖ. 30 Ŋwulabiŋaijo ŋwari lati labiŋaijo kwijo gweda ŋeda gwai no.
Yasuuⓐ gwabiŋu dhuŋuna dha ai gwuŋun a dire gwuŋun dai
31 Ŋwulalimiye darnu aram Ŋari ŋa liji ŋabuje ŋwuredenya ŋwoinyadho, a ŋadunyini gi liji lina lurun a gi leleny la gusus a gi jathib, a ŋalrinya, a ŋaje ŋwamun thiril a ŋadira manaŋ. 32 Gwabiŋu dhuŋuna ibidhe galo ditir, a Buṯrus odhadha ter, ŋwari gwuŋw ekajo dabiŋi minoŋ. 33 Abi dina muŋw urle galo, ŋwaŋa calmiz juŋun, ŋwulo Buṯrusuŋw, ŋwaici, Tuiya ganu diginy, Sheṯaan gwai; ŋinena athaŋa irijo dhuŋuna je galo dha Kalo no, ŋwubiro dha liji.
Urnini didoinya gwidom
34 A dina muŋw urnie lijo calmiz jai juŋun, ŋwulabiŋaijo, ŋwulaici, Kwiji gwina gwara gwatigwinyi gwuje, abricul ŋwirini gwidom gwuŋun, ŋwapai lure luŋun lina limaliganu, nyi gwuje. 35 A kwiji gwina gwara gwadima midhuŋw gwuŋun gwaji gwuŋw dhudhiye; abi gwina gwadhudhiye midhuŋw gwuŋun jiriny jai jiny a gi Dhuŋun dhina Dhiŋir, gwaji gwuŋwgilaŋiye. 36 Kwiji gwateyani aŋ galo, ada gwimateyani gidhileo galo peth, a gwimadhudhiye dhigirima dhuŋun. 37 I kwiji gwupeye dhigirima dhuŋun aŋ ganu? 38 Ada kwiji gweda gwiminyi doinya a ŋwudoinya dhuŋuna dhiny gi ŋwamun ibiŋwa ŋwina ŋwike; gwaji gwa Ŋari ŋa liji doinya maji muŋwila gi majdh gwa Babo gwuŋun a malaayka ŋalai lina liŋir didirel.
© First published by the British and Foreign Bible Society in 1966.