Ŋiro ŋa calmiz jina jiro die‐a‐ram
1 Ŋwurnie calmiz juŋun jina jiro die‐a‐ram alauradha liduŋw, ŋwuldhedha ŋoma a ŋeleny ŋa nyuriny peth, a ŋa dhiŋiriye lijo nono lina luma. 2 Ŋwulukeje dabiŋaijo dhuŋuna dha gidhila ga Kalo, a digeta lijo momaŋ lina luma. 3 Ŋwulabiŋaijo, ŋwulaici, Athathanya apo ŋida ŋeda gi dhai no, ŋwura, i nyilgu, i ⓐesh, i gwarush. Athathanya apa ŋwuga ram, ram no. 4 Mathanya uni gi dunu gweta, athanyan je di manya gathana lena ibile. 5 Mathaji liji irini, manyari nya lela, athanya dhudhire fura gwina gwo gi ŋwora ŋwalo, nyal aŋidhaniye dhuŋuna dhegen. 6 Alela, athilelila galo ŋwen ganu peth, athilabiŋaijo lijo Dhuŋuna dhina Dhiŋir, athil geta lijo momaŋ lina luma kalo peth.
Hiiruudus gwireyo je galo gi dhugor ganu dhuŋun
7 Ma Hiiruudus diŋini dhuŋuna peth dhina dhupinu, gwina gwiro kweleny, ŋwire je galo gi dhugor ganu dhuŋun; ŋinena athi liji coŋ arnu Yuuẖanna gwimadire dai. 8 A coŋ arnu, Iliiya gwimaŋina; a liter arnu, nebi gweta gwa nebiŋa gwiro gwina gwimadire manaŋ. 9 A Hiiruudus arnu, Nyi gwurudhi Yuuẖannaŋw lira galo. Abi ei gwiro ibigwa gwina gwuthi dhuŋuna dhina dhiro minoŋ dhina dhidiŋininy? Ŋwari gwuŋwaŋa.
Eny gwa liji lina liro khamsa alaaf
10 A ma liji lina lukejinu aura, alabiŋaijo Yasuuⓐuŋw dhuŋuna peth dhina dhapilo. Ŋwulodha girimu, alela gi leba leta la len lina lan Bets̱aida. 11 A dina ma liji liŋa darnu limela, alligwuje, al Yasuuⓐ ina, ŋwulabiŋaijo dhuŋuna dha gidhila ga Kalo, ŋwulgeta momaŋ lina luma. 12 A ma kalo ro keraga, a calmiz jina jiro die‐a‐ram alela dugun, alabiŋaijo, alaici, Dhiŋudhi lijo alela ŋwen ŋwina ŋwijo githigitho, aldhire, alapa ŋida ŋa dheny; anaŋa lo gi leba mina. 13 Ŋwulbabiŋaijo, ŋwulaici, Dhedhilo nyaŋa dileny. Albarnu, Anaŋa luthi ⓐesh thudhina a ŋwum ram dogo; anela deliya ŋida ŋa dheny analdhedha lijo ibila peth a? 14 Liji lijo lina liro loma lar khamsa alaaf. Ŋwabiŋaijo calmiz juŋun, ŋwulaici, Abricilo aljalo ŋwiduŋw ŋwar dure‐ram‐a‐die, dure‐ram‐a‐die. 15 A calmiz juŋun apa dhuŋuna ibidhe, alabrico aljalo. 16 Ŋwapa ⓐesh ina iro thudhina a ŋwum ŋwina ŋwiro ram, ŋwubaŋalaŋ di Sama, ŋwulbarkiye, ŋwurta ganu, ŋwudhedha calmiz ŋwari yaldhedha lijo. 17 Aleny peth, alpa; alwura nyuni die‐a‐ram ina idi galo.
Buṯrus gwaico Yasuuⓐuŋw nu, Ŋa gwan al Masiiẖ
18 A lamun leta dina abiŋaijuŋw Kaloŋa cucun, alje calmiz jai juŋun; ŋwulothaije galo, ŋwulaici, Liji latharnu nyi gwan ei? 19 Alabiŋaijo, alaici, Latharnu ŋa gwan Yuuẖanna al Maⓐmadaan; athibi coŋ arnu, ŋa gwan Iliiya; a liter arnu nebi gweta gwa ro gidhila gwina gwimadire dai. 20 Ŋwulabiŋaijo, ŋwulaici, Athanya barnu nyi gwan ei? A Buṯrus abiŋaijo, ŋwaici, Ŋa gwiro al Masiiẖ gwa Kalo.
Yasuuⓐ gwabiŋu dhuŋuna dha ai gwuŋun a dire gwuŋun dai
21 Ŋwulekajo ŋwari lati laŋajo kwijo gwetipo dhuŋuna ibidhe no. 22 Ŋwulaici, Aram Ŋari ŋa liji ŋabuje ŋwuredenya ŋwoinyadho, a ŋadunyini gi liji lina lurun a gi leleny la gusus a gi jathib, a ŋalrinya, a ŋaje ŋwamun thiril a ŋadire dai.
Urnini didoinya gwidom
23 Ŋwulabiŋaijo peth, ŋwulaici, Ada kwiji gweta gwimari gwinyigwuje, abricul ŋwirini gwidom gwuŋun, ŋwapai lure luŋun gigina lina limaliganu, nyibigwuje. 24 Gwina gwara gwadima midhuŋw gwuŋun gwaji gwuŋwdhudhiye, abi gwina gwadhudhiye midhuŋw gwuŋun jiriny jai jiny gwaji gwuŋwgilaŋiye. 25 Kwiji gwateyani aŋ galo ada gwimateyani gidhileo galo peth, a gwimadhudhe gwidom gwuŋun, i gwimuŋw kiye? 26 Gwina gwathinyidoinya a ŋwudoinya dhuŋuna dhiny, gwaji gwa Ŋari ŋa liji doinya maji muŋwila majdh gwuŋun, a gwa Babo gwuŋun, a gwa malaayka lina liŋir didirel. 27 Nyi gwa gwabiŋaijaje titiganu, ŋajaici, Lo coŋ billidhunudhi mina lina lati laŋila aiuŋw, di malaŋa gidhileo ga Kalo no.
Ŋwurujini ter gi je ganu jegen
28 Dina abiŋuŋw dhuŋuna ibidhe aljalo ŋwamun ŋwar dubaŋ, ŋwodha Buṯrusuŋw a Yuuẖanna a Yaⓐguub, alalo kamarigen dabiŋaijo Kaloŋa. 29 A dina abiŋaijuŋw Kaloŋa, ŋwuro gi je ganu ter, a kiraŋ guŋun pidhe bibrul, ŋware gumgum. 30 Alabiŋi liji ŋalai ram lina liro loma, Muusaŋa Iliiya gwai liro. 31 Alaŋini gi majdh, alabiŋadhe gi dhuŋun dha ai gwuŋun gwina gwaji gwuŋwmeaje Urushaliim. 32 A Buṯrusŋa dhire liji lai lina lijilai lithilo ŋwar gwuleny; abi dina malbirthe alaŋa majdh gwuŋun, alaŋa lijo ram lina lidhunudhi lai. 33 A dina gathanilo, a Buṯrus abiŋaijo Yasuuⓐuŋw, ŋwaici, Muⓐallim gwai, gwiŋir ŋinena jilo mina; alodha jutu thiril, ŋaludhijo geta, aludhijo Muusuŋw geta, aludhijo Iliiyaŋw geta; gwati gwiliŋidhi dhuŋuna dhina dhabiŋuŋw no. 34 Dina abiŋuŋw minoŋ, a giburu ilalaŋ, ŋwulgitijo dhigirima; aldhenya dina idhina giburu alaŋ. 35 A gwulo ula kiburu, ŋwarnu, Ŋari ŋiny ŋiro ibiŋa ŋina ŋuminyiny; deŋinaijul. 36 A dina ma gwulo erna, a Yasuuⓐ bujini cucun. Athil ŋiŋirini dhuŋuna ibidhe, athilabiŋaijo kwijo gwetipo dhuŋuna dhetipo dhina dhaŋadhilo no.
Iŋir nono gwa ŋari ŋina ŋuthi ŋurinya
37 A bigunu mal uludha galo gi len alaŋ albudhe liji lai loinyadho. 38 A kwiji gweta je gi liji ganu, ŋwure gwula, ŋwaici, Muⓐallim gwai, nyi gwa gwothaijaŋa galo, nyarnu, aŋadhi ŋare ŋiny; ŋiro ŋetipo ŋina ŋuthiny. 39 Ŋathi ŋuriny mutha, ŋwun ureje gwula ganu; athuŋwideye, ŋwuteye jidhwa gi jiŋai ganu, athathuŋw gathanu no di ma aŋinu yuŋun je githo dumi peth. 40 Nyi gwothaijo calmiz galo juŋa nyari ŋalteye; athilbuthi ŋoma no. 41 Al Yasuuⓐ abiŋaijo, ŋwulaici, Liji lai lina lati lathuminyi no a lina like, alje ŋwamun uman manaŋ athajilbikijo dhugore. Udhijiny ŋare ŋuŋa mina. 42 A dina idhuŋw, a ŋuriny ideye gwuleny, ŋwudhadhire galo. A Yasuuⓐ lo ŋurinya, ŋwugeta ŋare momaŋ, ŋwuwurijo babuŋw gwuŋun.
Yasuuⓐ gwabiŋu dhuŋuna dha ai gwuŋun ŋwamun ganu ram
43 A liji peth ali galo dir ŋoma ŋa Kalo ŋina ŋinaŋ. A dina udhil galo dir peth gi dhuŋun peth dhina dhapo Yasuuⓐ, a Yasuuⓐ abiŋaijo calmiz juŋun, ŋwulaici, 44 Aŋidhanul dhuŋuna ibidha momaŋ darnu, Ŋari ŋa liji ŋaji ŋanugejie gi liji. 45 Athilbi liŋidhi dhuŋuna ibidha no, a dhigilibicinu degen, athilliŋidhi no; aldhenya dilothaije galo dhuŋun dhai ibidha.
Alimiye gwan dilrujini litilitiny a dilmutha dugore
46 Alaji alkadhe, alarnu ei gwaji gwanuni degen. 47 A Yasuuⓐ liŋa darnu lire je galo gi dugor ganu degen minoŋ, ŋwodha ŋare ŋeta ŋwudhuneje gi limera dugun. 48 Ŋwulabiŋaijo, ŋwulaici, Kwiji gwina gwathuminyi ŋare ibiŋa gi jiriny jiny, gwathinyuminyi; a gwina gwinyuminyi, gwathuminyi ŋeduŋw gwina gwukejiny; gwina gwitinyunu dagalo peth gwaro gwinunu. 49 A Yuuẖanna abiŋaijo, ŋwaici, Muⓐallim gwai, anaŋa laŋadhi kwijo gweta diteye nyurinya jiriny jai juŋa; anabekajo; ŋinena athiji gwujo no. 50 A Yasuuⓐ abiŋaijo, ŋwaici, Athanya ekajo no; gwina gwati gwikilai no, gwathiliŋiriye.
Yasuuⓐ gwiludhi Urushaliim. Gwidoinyo liji la Saamira duŋwjalo degen
51 Ma ŋwamun ari ŋwaje ŋwa dhuŋwaura Sama, athuŋwela gi dhai dhina dhathela Urushaliim. 52 Ŋwukeje lijo kwereny, alela, alobani gi len leta la liji la Saamira, alari gwalgitijo ŋida peth momaŋ. 53 Athibi liji uminyi Yasuuⓐuŋw gwajalo gi len legen no, gwaŋadhilo darnu gwiludhi Urushaliim. 54 A ma Yaⓐguubŋa Yuuẖanna gwai aŋa dhuŋuna ibidhe lina liro calmiz juŋun, alabiŋaijo, alaici, Kweleny gwai, au gwara anaŋa labiŋaijo iga ŋwula di Sama, ŋwulduni a? gwiro ŋinena arna Iliiya ko. 55 Ŋwuburle galo, ŋwulekajo, ŋwulaici, Nyaŋa lati liliŋidhi nyaŋa liro dhigirim dhirau. 56 Ŋari ŋa liji ŋati ŋiludhi dirinya lijo no, ŋwubeladha duŋwul gilaŋiye. Alela gi len liter. 57 Dina idhilo gi dhai, a kwiji gweta abiŋaijo, ŋwaici, Kweleny gwai, nyi gwatigwaŋagwuje dalela kalo peth gina gathaŋanela. 58 A Yasuuⓐ abiŋaijo, ŋwaici, Nyartumi nyuthi ŋwubo, a nyira nya kabo nyuthi jidhul; athibi Ŋari ŋa liji uthi kaloŋa ga dhidhire lira luŋun no. 59 Ŋwabiŋaijo kwijo gwiter, ŋwaici, Gwujiny. Ŋwubarnu, Kweleny gwai, abriciny nyela nyigwurcena babuŋw gwiny kwereny. 60 A Yasuuⓐ abiŋaijo, ŋwaici, Abrico lijo lina limai algwurce lijo legen lina laio; ŋabela, ŋabiŋaijo lijo dhuŋuna dha gidhila ga Kalo. 61 A kwiji gwiter abiŋaijo, ŋwaici, Kweleny gwai, nyi ko gwaŋagwuje; nyi babrico nyela nyimirudha lijo kwereny lina lathije daguri. 62 A Yasuuⓐ abiŋaijo, ŋwaici, Kwiji gwati gwaudhi duni kidhila ga Kalo gwina gwijo dikwure gidhaga gai, ŋwubidhaŋani galo no.
© First published by the British and Foreign Bible Society in 1966.