Kalo gina giŋir didirel gina gurun giro ŋinena s̱uura gwa kalo gina giŋir didirel gina giyaŋ
1 Ŋinena uthi dhuŋun dhina dhidiminu dhina dhiro kwerkwereny ko dhuŋuna dhina dhuthilo dhadhapai dha ŋiro ŋa dhorthadha Kaloŋa, a kalo guŋun gina giŋir didirel ga gidhila ibiga. 2 Ŋinena gitinu gutu gina giro kwerkwereny gina gan Gwiŋir Didirel; gina guthi shamaⓐdaan ganu a tharabeza dhina dhuthi ⓐesh; ina yathi liji gitijo Kaloŋa. 3 A kwereny kiraŋ gina giro nimra ram gutu gijo gina gathilaici Iŋir Didirel gwa Iŋir Didirel; 4 gwina gwijina kwoŋ gwina gwigitinu dahab dhai, gwina gwathin ŋara ŋina ŋiro gwudhurul je a s̱anduug gwa dhuŋun dhina dhidiminu gwigitinu dahab dhai ŋwimera peth, gwina gwijina gidhe ganu gina giro dahab gina gijina manna ganu, a lura la H̱aruun lina liteyo ŋwudhirenya, a nyol ram nyina nyiro jimiriny nyina nyiro nya dhuŋun dhina dhidiminu; 5 a gi s̱anduug alaŋ karuuba gijo ga majdh gina gigeto dhigirima duŋwgiriba kursi galo ga ina; abi gi ŋidi ibiŋa anaŋa lati luthi ŋoma danabiŋi ŋinena gwan dhuŋun ibidha peth no. 6 Ŋinena ma ŋidi ibiŋa getini momaŋ, athi gusus uni gi gutu gina giro kwerkwereny ŋwamun peth dilapai ŋiro ŋegen. 7 Abi gi gutu gina giro nimra ram athinbi kweleny gwa gusus uni dogo lamun letipo la gidhila, athuŋw udhi ada gwati gwimapai ŋina ŋina ŋathuŋwul geta ŋan ŋidi ŋina ŋike ŋa gwidom gwuŋun, a ŋan ŋidi ŋina ŋike ŋa liji no. 8 Gi dhuŋun ibidha Dhigirim dhina Dhiŋir dhaŋiyo darnu dhai dha kalo gina giŋir didirel dhoma dhati dhaŋinu no, ŋinena jo gutu gina giro kwerkwereny. 9 Gina giro ⓐalaama gwan kaija ibiga, gina guthi dhuŋuna ganu dhadhi dhedha Kaloŋa dhedhaŋw tur a ŋidi ŋadhi dhuge, ŋina ŋati ŋuthi ŋoma gi dhuŋun dha dhugor dilruje kwijo gwina gwathupijo Kaloŋa ŋiro didima no; 10 ŋinena uthuŋw dhuŋuna dhan eny a iye a dhan uye gwitigwiter a dhuŋun dhina dhigitinu dhadhapai dhan aŋinu dogo, dhina dhigitinu di gi lamun ladhi geta dhuŋuna momaŋ dhina dhiyaŋ.
Ŋoma ŋadhuye dugore dega ŋibujinu ai gwai gwa al Masiiẖ
11 Abi al Masiiẖ dina muŋw ila gwiro kweleny gwa gusus gwa ŋidi ŋina ŋiŋir ŋina ŋaji ŋila, ŋwuni gi gutu gina ginunu a gina giro didima gina gati gigitinu doi dai no, a dhuŋun ibidha dhuthi maⓐna gwan, gina gati gigitinu kidhila ibiga no; 12 athuŋw udhi ŋin ŋai ŋa nyo i ŋa nyimiro nyina nyitinyitiny no, ŋwubuni ŋin ŋai ŋuŋun lamun letipo gi kalo gina giŋir didirel, ŋwapa bibruŋw gwina gwathije gwortal. 13 Abi ada ŋin ŋa nyidhri a ŋa nyo, a jaro ja ŋimiro ŋina ŋitiŋitiny ŋina ŋijigejilŋai lijo lina liro ŋirle ŋimathijuriye juriyuŋw gwa aŋinu, 14 abi akwai gwoinyadhanu gwina gwaje gi ŋin ŋa al Masiiẖ, Dhigirim dhai dhuŋun dhina dhathije gwortal dina dhedhuŋw Kaloŋa gwidom gwuŋun gwina gwati gwuthi dhara no duŋw juriye dugore dalo gi ŋiro ŋina ŋaio danya upijo Kaloŋa ŋiro gina gimidho? 15 A gi dhuŋun ibidha ŋeda gwiro gweta gwina gwo keligeny ganu gi dhuŋun dhina dhidiminu dhina dhiyaŋ, di liji lina lurninu uthi ŋelenya ŋina ŋathije gwortal gi dhuŋun dhina dharildhai, ŋinena ma ai gwuŋun ro bibre gwa ŋidi ŋegen ŋina ŋike ŋina ŋijo gi dhuŋun dhina dhidiminu dhina dhijo kwereny. 16 Ada dhuŋun dhina dhidiminu dhimaje, aram ai gwaŋini gwa kwiji gwina gwigeto dhuŋuna ibidha. 17 Dhuŋun ibidha dhina dhidiminu dhuthi ŋoma dupini ada kwiji gwina gwigeto gwimai; abi dhati dhuthi ŋoma dupini ada kwiji gwina gwigeto gwimaje gwimidho no. 18 A minoŋ dhuŋun dhina dhidiminu dhina dhiro kwerkwereny ko dhati dhathi gitini ada ŋin ŋati ŋimaje no. 19 Dina abiŋaijo Muusa lijo peth gi dhuŋun dha awaamir peth gi dhuŋun dhina dhuthi naamuus, ŋwapai ŋina ŋa nyimiro nyina nyitinyitiny a ŋa nyo, ŋau ŋai a jola jina jure ditaŋ a zufa, ŋwujigeje kitham a liji peth, 20 ŋwarnu, Ŋin ŋiro ibiŋa ŋa dhuŋun dhina dhidiminu ŋina ŋabiŋaijajiŋai Kalo. 21 A gutu ko a ŋidi peth ŋa ŋiro ŋwuljigeje ŋin ŋai gwiro minoŋ. 22 A ŋidi peth, nyi gwarnu udubidi, ŋajurini gi dhuŋun dhina dhuthi naamuus ŋin ŋai; a ada ŋin ŋati ŋima ire no a dhudhani ganu gwa ŋidi ŋina ŋike gwati gwaje no.
23 A minoŋ dhuŋun dhiro daruri di ŋidi ŋina ŋiro ŋinena ŋidi ŋina ŋo Samawaat jurini dhuŋun dhai ibidha; abi ŋidi ŋina ŋo Samawaat ŋajurini ŋidi ŋai ŋadhi dhuge ŋina ŋiŋiranu gi dhuŋun ibidha. 24 Ŋinena athi al Masiiẖ udhi kalo gina giŋir didirel gina gigitinu doi dai, gina giro ŋinena kalo gina giŋir didirel gina giro titiganu no; ŋwubuni gi Sama, ŋinena duŋw aŋini gi je ganu ja Kalo gwan alŋa. 25 Athuŋw udhi didhedha Kaloŋa gwidom gwuŋun ŋwamun ganu ŋwoinyadho, gwiro ŋinena athin kweleny gwa gusus uni kalo gina giŋir didirel jidhileo peth ŋin ŋai ŋina ŋati ŋiro ŋin ŋuŋun no; 26 a minoŋ ada dhuŋun ibidha dhimaje dhuŋun dhiro daruri duŋw umi ŋiya ŋwamun ganu ŋwoinyadho ro dina gitinina dhugul dha gidhila. Abi ŋinena gwimaŋini lamun letipo di gi lamun lina lamira duŋw erniye ŋida ŋina ŋike rinyini gwai gwuŋun. 27 A gwiro ŋinena gitijina lijo darnu lathilai lamun letipo, albaji aluthi ẖukm; 28 a minoŋ al Masiiẖ ko, dina dhedhuŋw Kaloŋa gwidom gwuŋun lamun letipo duŋwapai ŋida ŋina ŋike ŋa liji loinyadho; a gwaji gwaŋina manaŋ, gwati gwuthi ŋida ŋina ŋike no digilaŋiye lijo lina lathidhunijo ŋeduŋw.
© First published by the British and Foreign Bible Society in 1966.