Ŋiro ŋa Buulus ŋadhaŋiye dhuŋuna dhina dhigilibicinu dha Kalo
1 Gi dhuŋun ibidha nyi gwina gwan Buulus, gwina gwigukinu gwan Yasuuⓐ al Masiiẖ gwan nyaŋa lina liro Liumam, 2 ada nyaŋa limadiŋini guginuŋw gwa niⓐma gwa Kalo gwina gwiminyil dhedha dagalo; 3 akwai dhuŋun dhina dhigilibicinu dhimateyini galo aŋini gwai diginy; (gwiro ŋinena ulinyina kwereny dhuŋuna dhitiny, 4 maji manya abiŋaijo dhuŋuna ibidha, nyaŋa laji laliŋa darnu nyi gwiliŋidhi dhuŋuna akwai dhina dhigilibicinu dha al Masiiẖ). 5 Dhina dhati dhiliŋinu gi jidhila jina jimerna gi keleŋa ga liji no, gwiro ŋinena aŋinuŋwna ŋinena gi liji luŋun lina lukejinu lina liŋir didirel a nebiŋa Dhigirim dhai; 6 di Liumam laicio Yahuud ŋalai gi ŋidi ŋa Kalo a gi aŋinu yetipo, alubie dilapai dhuŋuna dhina dharuŋwdhai di al Masiiẖ Yasuuⓐ Dhuŋun dhai dhina Dhiŋir. 7 Gi Dhuŋun ibidha dhina Dhiŋir nyi gwimarujini gadham, gwiro ŋinena dhedha tur gwa niⓐma gwa Kalo gwina gwidhedhiny ŋiro ŋai ŋa ŋoma ŋuŋun. 8 Diginy niⓐma ibigwa gwidhedhinu, nyi gwina gwitinyunu gi liji peth lina liŋir didirel, dabiŋaijo Liumam Dhuŋuna dhina Dhiŋir dha ŋeleny ŋa al Masiiẖ ŋina ŋati ŋabujini no. 9 A daŋiye gi liji peth aicaijiye gwa dhuŋun dhina dhigilibicinu dhina dhigilibicinu di Kalo gi jidhila jina jimerna, gina gigeto ŋida peth Yasuuⓐ al Masiiẖ gwai. 10 A minoŋ kaniisa gai bebra gwa Kalo gwitigwiter gwaliŋini ŋinena gi liji lina luthi ŋelenya a ŋoma kidhila ga Sama. 11 Gwiro ŋinena dhuŋun dhina dhigeto Kalo dhina dhathije gwortal dhina dhigetuŋw di al Masiiẖ Yasuuⓐ gwina gwiro Kweleny gwega. 12 Dugun a imaan gwai dugun alŋa lare ganu alela di Kalo dhugor dhai dhetipo. 13 Gi dhuŋun ibidha nyi gwajothaije galo dathanya mulo nono gi dugor ganu dalo no, ŋinena muthiny dhugore gi umi ŋiya gwan nyaŋa; dhuŋun ibidha dhiro majdh gwalo.
Abiŋaije Kaloŋa gwadhiliŋa Dhuŋuna dhina Dhiŋir
14 Gi dhuŋun ibidha nyi gwathidijo Babuŋw ŋwurko ŋwai gwa Kweleny gwega gwina gwan Yasuuⓐ al Masiiẖ, 15 gwina gwagwi liji peth dhedhini jiriny lina lathije gi Sama a kwiyaŋ, 16 dajidhedha, gwiro ŋinena ŋeleny ŋa majdh gwuŋun, danya bur nono ŋoma ŋai ŋa Dhigirim dhuŋun gi kwiji gwa dhugor; 17 di al Masiiẖ uthi ŋoma duŋwuje gi dugor ganu dalo imaan gwai; danya muthini galo dugun uminyi gwai, gwiro ŋinena kwari gwina gwathimuthini galo didiny, 18 danya uthi ŋoma diliŋa liji lai peth lina liŋir didirel aŋ gwiro ora galo, a ole, a ole ganu, a olalaŋ; 19 a danya liŋa uminyuŋw gwa al Masiiẖ, gwina gwati gwa liji liŋa gatur no, danya oinyadhani oinyadhe gwai peth gwa Kalo. 20 Dugun gina guthi ŋoma, gwiro ŋinena ŋoma ŋina ŋathapai ŋiro dega, dapai ŋida ŋoinyadhanu gi ŋidi peth ŋina ŋathilbupe i ŋathanal irijo je galo, 21 majdh dugun gi kaniisa Yasuuⓐ al Masiiẖ gwai gi liji peth lina laji laliŋini gi jidhila jina jaji jila, gwortal a gwortal. Amiin.
© First published by the British and Foreign Bible Society in 1966.