Salaam a shukr
1 Buulus, a Silwaanus, a Tiimuuthaawus, gi kaniisa ga Tasaaluuniika gi Kalo gina giro Babo gwega a Kweleny gwina gwan Yasuuⓐ al Masiiẖ. 2 Niⓐma dagalo, a audhaijiye galo, di Kalo gina giro Babo gwega a Kweleny gwina gwan Yasuuⓐ al Masiiẖ.
H̱ukm gwina gwaji gwaje gi lamun lina lal Yasuuⓐ ila
3 Aram anaŋa lathaici Kaloŋa shukran ŋwamun peth gwan nyaŋa, limega lai, gwiro ŋinena gwaudhi ŋinena imaan gwalo gwathi biŋa gwoinyadhanu, a uminyi gwina gwuthanya dagalo peth gweta gweta gwathoinyadhani; 4 a minoŋ anaŋa lathare ŋamilai dagalo gi kanaayis ga Kalo gwan mutha dugore gwalo a imaan gwalo gi irini gwalo peth a dhuŋun dhina dhibur dhina dhathanya muthijo dugore. 5 Gwina gwiro ⓐalaama gwina gwaŋinu gwa ẖukm gwa Kalo dhuŋun dhai dhina dhiŋir, danya dhuredhini dhaudhi dhan gidhila ga Kalo, gina gathanyan umi ŋiya ko. 6 Ada dhuŋun dhimaro dhiŋir di Kalo wuro dhuŋuna dhina dhibur degen lina lathapai dhuŋuna dhina dhibur dagalo; 7 a dagalo, nyaŋa lina limabuje dhuŋuna dhina dhibur digatho uwa daguri, maji ma Kweleny gwina gwan Yasuuⓐ aŋina gi Sama malaayka ŋalai la ŋoma ŋuŋun, 8 kiga ina yathude, duŋw akimiye ŋediŋaije lina lati liliŋidhi Kaloŋa no, a lina lati lathuthejo Dhuŋuna dhina Dhiŋir dha Kweleny gwega gwina gwan Yasuuⓐ al Masiiẖ nyuni no, 9 lina lakimini erna gwai gwina gwathije gwortal gi je ganu ja Kweleny gi majdh gwa ŋoma ŋuŋun; 10 maji muŋw ila duŋw majidhini gi liji luŋun lina liŋir didirel, alalo galo dir dugun peth lina luminyu (ŋinena shahaada gwuri dagalo ganu gwuminyinu) gi lamun ibile. 11 Gi dhuŋun ibidha anaŋa ko lathabiŋadhaijo Kaloŋa gwan nyaŋa, daji Kalo gega dhura laudhi gi urnie ibigwa, a meaje iŋiruŋw dugore peth gwina gwiŋir gwa iŋir gwuŋun, a ŋiro ŋa imaan ŋoma ŋai. 12 Di jiriny ja Kweleny gwega gwina gwan Yasuuⓐ al Masiiẖ majidhini dagalo, a nyaŋa dugun, gwiro ŋinena niⓐma gwa Kalo gega a Kweleny gwina gwan Yasuuⓐ al Masiiẖ.
© First published by the British and Foreign Bible Society in 1966.