Ŋen ŋərappa ralo
1 Đəbwaiñəd̶ia eñaŋ d̶eṯo ŋga? Na d̶əgerd̶ia eñaŋ d̶eṯo ŋga? Gerṯe d̶əd̶wonaṯa d̶eicia ed̶alo id̶i d̶əpəd̶ia eŋen ŋaŋəno esalo? 2 Ñagwonaṯa laŋge na ñagero ñagəlerṯia nṯia ñagaɽiñəd̶ia. Ñagagiyaca ŋen, orn ñagebr ñagəɽwad̶aṯa ñagəma laŋge ñagəlwonaṯa, nṯia ñagëpəd̶ia na ñagabwaiñəd̶ia. Ñagero ñagəberṯia laŋge ŋen ŋanṯa ñagero ñagəbeɽəd̶ia. 3 Ñagabeɽəd̶ia na ñagero ñagəneinia ŋen ŋanṯa ñagabeɽəd̶ia mənna eŋen ŋəd̶wonaṯa d̶eicia ed̶alo. 4 Ya ñəŋgi ñagəɽiano eŋen, ñagaijəba ṯa d̶əbwa ŋenŋa ŋalo d̶ageiya Rəmwa? Ŋen ŋafəṯia, ed̶a gənəŋ igi gwonaṯa ṯa gaɽia d̶appa d̶alo gënəŋu gëbəd̶ənia bəɽan gəgeiya Rəmwa. 5 Ñagaṯa ṯa ŋen ŋəpiano iŋi ad̶am gə-Rəmwa gaṯa ṯa, “Rəmwa raɽo aŋwar ndrəbwiṯi usilaga igi rëɽu ṯa aŋəndofeṯr?” 6 Orn rënəŋu rananeid̶ia d̶ənaica məɽəməɽeñ d̶waiña. Nṯia ad̶am gə-Rəmwa gaṯa com ṯa,
“Rəmwa rageiya led̶a ildi linia enare,
orn rananaica led̶a d̶ənaica məɽəməɽeñ ildi lərra enare.”
7 Nṯia naicr Rəmwa ntam enalo na ŋgiṯr Rəmwa arerṯe ŋələŋe enare enalo. Đwad̶einr Seṯan nano na yënəŋu yid̶i aiyendobəd̶e nano. 8 Borgwad̶aṯr Rəmwa nano na rënəŋu rid̶i arandəborgwad̶aṯe nano. Wasənr rəŋ ya led̶a leicia, təɽer nare enalo ñaganəñaŋ ñəŋgi ñagerṯo ŋen ŋəɽijan. 9 Id̶ənr ñagirəwano, wanr na ñare. Ŋgiṯr d̶urrəməd̶a ed̶alo ad̶əmërni d̶wana na d̶əŋəra nano ed̶alo ad̶əmërni d̶irəwano. 10 Id̶ənr ñagərra enare Eləŋ Rəmwa nëiñua na rënəŋu rid̶i arəndoɽre.
Ŋen ŋəd̶əgariñaṯa eŋen ŋəd̶akəmia led̶a lwomən
11 Lorldaiñ, ñerṯe ñagəɽwataid̶ia eŋen ŋeicia ŋəled̶a lwomən. Ed̶a igi gəɽwata eŋen ŋorəba ŋeicia, walla gakəmia orəba, gënəŋu gaɽwata ŋen ŋ-Alganun ŋeicia na gakəmia Alganun. Ndə agakəmia Alganun agaber agəbəd̶ia Alganun orn agakəmia ŋen ŋ-Alganun. 12 Ed̶a gaɽo gonto gənaid̶ia Alganun na gakəməd̶ia, fəŋu igi gəɽwad̶aṯa gëbəria na gagera. Orn aganəŋa fəŋa əsëgi ṯa agakəmia ŋen ŋoralo?
Ŋen ŋəd̶əɽaŋad̶aṯa Rəmwa nano
13 Nər, ya ñəŋgi ñagəbaṯa ṯa, ñagabəṯa alo yenəŋ nwaldaŋ d̶əñid̶i walla eṯeɽe ñaɽaŋe tu iṯəlia gonto ñabwana na ñama algərus. 14 Ñaganəñaŋ ñagaijəba ŋen ŋeṯeɽe, na d̶əməṯia ed̶alo d̶aɽo ṯau? Ñagarno ibwëɽua isi yefo liga lətëfr, orn niyerṯe. 15 Gəbanṯa ñagəbaṯa ṯa, “Ndə Eləŋ Rəmwa ramed̶əño ñagaməṯia, oro ñid̶i ŋen iŋi walla ŋakəl.” 16 Orn d̶əñid̶i ñagëminia id̶inia enare ed̶alo. Đëminia pred̶ id̶i d̶aɽo ṯia d̶eicia. 17 Ed̶a igi gələŋeṯo ṯa ŋen iŋi ŋame ṯa aŋid̶i, na nəŋerṯe gəbəd̶ia, gënəŋu gëbəd̶ia ŋen ŋeicia.