aza 9
1 na maleyka, kwir nimra ṯuḏni, əri bruza kwuŋwun, nenyeze ṯorumi tete ṯiidu ki lere nuŋw oɽa kureyu lu, ner inḏeḏa mufṯah kweḏi ogwur weḏi ezir woɽu lac kuṯelu; 2 nuŋw kiti ogwur weḏi ezir wa, na gwu kwulu ruḏa-na kwupa, kwulu kwir kaka kweḏi igə wupa weḏi kəmruŋw, na aŋwun orɔ kirim ezir yi wa, kwulu gi ŋgwa. 3 na kwulu-na na yama ruḏa, nerele ṯurmuna nana, ner zi inḏeḏa ŋuma ŋir kaka ŋuma ŋeḏi ŋwebdeny. 4 ner zi eca ŋwu: etere ye karwa keḏi ureyu mac, yaɽi yere tɔk mac, lakin lizi kla ṯuɽuk, liti leḏi nimra kweḏi Allah ki yuḏul la yeŋen mac; 5 ner zi inḏeḏa zulṯa eḏi zi biḏini ṯurfa domony yowa ṯuḏni, eḏi zi ere eɽenye mac, na ṯurfa ṯeŋen orɔ kaka ṯeḏi lebdeny muŋw ye kwizi. 6 na ki ŋwamin la ṯa ŋwa, a lizi naŋna ŋiɽany er zi ere inḏa mac; er orɔ zurum eḏay wuɽeny, ezi ŋiɽany arṯiḏalu.
7 na yama aɽani limɔrṯa lirlice ṯiṯugwuḏa cugwɔ-cugwɔp; ki ŋwoɽa la ŋweŋen na kwɔmne nani kwir kaka nyaŋgi nyir ḏahab, ner orɔ kiyeyna kaka lizigwunaŋ, 8 ner eḏi owɽu wir kaka weḏi law, na yiŋaṯ yeŋen orɔ kaka yeḏi lizundaŋ; 9 ner eḏi yamnya yir kaka ŋwerua ŋwir zarṯu, na kwurna kweḏi yufu yeŋen orɔ kaka kwurna kweḏi yarabiya, yeṯi zi limɔrṯa mulɔtɔ mer afri eḏi ṯugwuḏi; 10 na ria reŋen orɔ kaka reḏi ŋwebdeny, ner eḏi runi tɔk, na ŋuma eḏi ŋi biḏini lizi ṯurfa yowa ṯuḏni nani ki ria-na reŋen. 11 ner eḏi kwelenyi kwir maleyka kweḏi ezir woɽu lac kuṯelu, na lizi leḏi yahuuḏ ner enjici yiriny yeni abaḏun, na lizi lir yunaan, ner eca abullun.
12 ṯurfa tir ṯiŋna ṯimɔṯamḏu; izaṯi, kḏata ṯuɽen ṯinḏi kinna eḏila.
13 na maleyka, kwir nimra nyirlil, əri bruza kwuŋwun, nenyi neŋne ṯɔgwɽɔ ṯuruḏi nani gwu ril rir kwaɽŋan ki ŋweḏgwun la ŋwir ḏahab, ŋwunani ki yey-na yeḏi Allah, 14 nuŋw eca maleyka kwir nimra nyirlil, ŋgwa kweḏi bruza, ŋwu: kediḏi limaleyka lir kwaɽŋan, likəkine nani gwu kufurṯa kupa keḏi ŋaw, keni al furaṯ. 15 ŋwu ṯa, na limaleyka lir kwaɽŋan kedini, likita zi leḏi zaa, na lamin, na owa, na kiḏla tɔk, na lizi yiḏriḏa ṯɔɽɔl ner eɽenye kete. 16 na ŋwuɽu ŋweḏi orṯa weḏi limɔrṯa uri dedep, ŋwir miyaṯen milyuun, kaka 200,000,000, nenyi neŋne ŋwuɽuŋi ŋweŋen. 17 ner orɔ ŋwu nenyeze limɔrṯa ki ŋiŋliṯa-na ŋinyi; kla lelliḏi gwu la leḏi ŋwerua ŋweḏi tuwən. ŋwir kaka igə mindaŋ, na kaka kwulu, na kaka kibriṯ. na ŋwoɽa ŋweḏi limɔrṯa aɽani ŋwoɽa ŋweḏi lizundaŋ, na kworɔ-na kweŋen na igə ruḏa kwulu gi, na kibriṯ gi. 18 na lizigwunaŋ yiḏriḏa ṯɔɽɔl, na ki jiiza-na ŋgwu kwir ṯɔɽɔl, na gi kete ay igə yi, na kwulu gi, na kibrit gi tɔk, kuruḏi kworɔ-na kweŋen. 19 kaka nani gwu ŋuma ŋeḏi limɔrta kworɔ-na kweŋen, na ki ria-na reŋen tɔk; na ria reŋen aɽani yumowa yeḏi ŋwoɽa ŋwetir ŋi erezi kwɔmne-na.
20 na lizi liḏaḏu-na, kla liti limay mac jiiza gi ŋgwu, ner ere urla rugwori lu mac eḏi duŋgweci ŋɔḏɽor ŋeḏi rii reŋen, ner ere duŋgweci ṯikwocalu teḏi libayil mac, na kwɔmne kwudaɽmina rii ri kwir ḏahab na faḏḏa gi na lizarṯu lir zurman, na yal tɔk, na ŋwuɽi, kwɔmne kwiti kweḏi ŋuma mac eḏeze ezir, ya eḏi neŋne, ya eḏele; 21 ner ere orlaci ŋiɽaŋali ŋwudɔŋw mac ŋeṯir ŋi kete ḏimya, ya eḏi duŋgweci ŋuzura ŋeŋen, ya eḏi duŋgweci ŋijina ŋeŋen, ya ŋoɽami ŋeŋen too.