aza 15
nyiṯra nyir dufɔkwɽeny jiiza gi kweŋen
1 mindaŋ nenyeze ŋiɽaŋali ŋir ter kilerena, ŋir ŋupa ŋeṯi liŋɽazi tɔk ŋir ŋu, limaleyka dufɔkwɽeny jiiza gi dufɔkwɽeny, kwunde kwiri kweḏi kwaḏanŋw, kaka ma gwu ŋirŋaza ŋeḏi Allah irmiḏiḏi jiiza gi ŋgu.
2 nenyeze ṯujuli ṯete ṯir kaka ṯujul ṯir gizaaza ṯilagḏina igə yi, nenyjeze kla limillazi kwɔmne ŋgwa kwumiiḏu ki kweḏi ŋerya, na zura kwuŋwun tɔk, na ŋwuɽu ŋweḏi yiriny yuŋwun, ner irli tatap ṯujuli kəni ṯir gizaaza, lapa lumbəra leḏi Allah ki rii-na reŋen. 3 eṯir kete ṯilŋa ṯeḏi muuza, kwir kaḏaam keḏi Allah, na ṯeḏi Tirany, ṯaruŋw:
na, kwir Kweleny kweni Allah wuṯemḏizi la tatap ŋuma ŋi,
ŋɔḏɽor ŋɔŋa ŋir ŋupa ŋeṯi liŋɽazi tɔk.
ŋa, kwir Kweleny kweḏi ŋeleny ŋir-na ter ter,
ŋeḏre ŋɔŋa ŋir ŋirlalu rerec.
4 eya kwiri kwiti kwɔ ŋa ṯenye mac, Kweleny, ŋwere nii yiriny-na yɔŋwa tɔk mac?
kaka ur ŋa gwu dak Kwirlinelu ter.
na ŋeleny tatap ŋir-na ter ter ŋinḏi eḏi kwoce ŋaŋwu lu,
kaka mer gwu ruwene lu ŋa ŋofḏana ŋeṯizerri.
5 mer ere ŋu ta, nenyi kete yey nenyeze heykala weḏi kheyma kinani kilerena kimɔ iŋḏini, 6 na limaleyka lir dufɔkwɽeny ruḏa ki heykal-na, likinna yireṯi yimri-na, yifiiḏu pər pər, liməlina ŋwar ŋi ŋwir ḏahab ki lurdum la, lapa jiiza dufɔkwɽeny. 7 na kwete kweḏi kwɔmne ŋgwa kwumiiḏu kwir kwaɽŋan inḏeḏa limaleyka dufɔkwɽeny nyiṯraŋi dufɔkwɽeny nyir ḏahab, nyurene ŋirŋaza-na ŋeḏi Allah weṯinanniḏa dɔk dɔk; 8 na heykal ureni kwuluŋi-na kweḏi ŋiniṯ ŋeḏi Allah, na kweḏi ŋuma ŋuŋun, mindaŋ nuŋw ere kwere mac kweḏi ŋuma eḏenḏi ki heykal-na mindaŋ ma jiiza ŋgwa dufɔkwɽeny kweḏi limaleyka dufɔkwɽeny ernine.