aza 3
juwab kweḏi kaniiza kinani zarḏiz
1 lucazi maleyka kweḏi kaniiza kinani zarḏiz, ŋwu: ŋiɽaŋal ŋu ŋir ŋandizazi ŋgwa kweḏi rigɽima dufɔkwɽeny reḏi Allah, na rorumi dufɔkwɽeny.
nyi kwilŋiiḏi ŋɔḏɽor ŋɔŋa, na eḏi yiriny eḏaruŋw nyi ŋgwu kwumiiḏu, lakin na eni kwayyu. 2 kiɽṯi, a firli ŋgwa nana kweḏi ŋa kwumadiḏi eḏay, kaka menyi gwu ere inḏa ŋɔḏɽor ŋɔŋa ŋir minmin mac ki yey-na yeḏi Allah. 3 kiḏayinazi ŋa ŋafa ŋazi, na ŋiniŋna ŋazi tɔk, ezi miḏa, a urla ṯugwori lu. ma ere kiɽṯi mac, nyi kwila kaka kwoɽam, a ere elŋe zaa mac kwenyi gi ila nani ŋa gwu. 4 ŋa kweḏi kinna yiriny yeḏi lɔkwɔ linani zarḏiz liti limɔruŋwi yireṯi yeŋen mac; na kla lenyi li irerelu yireṯ yi yifiiḏu pərpər, kaka ofḏanir gwu. 5 ŋgwa kweṯillazi ki, kwunderṯa kwer oɽaci yireṯi nana yifiiḏu pərpər, enyi ere miɽnyaḏa yiriny lu yuŋwun mac kiṯam-na keḏi yiriny-na yeḏi kla leḏi ŋimiiḏa, enyi ruweci yiriny lu yuŋwun ki yey-na yeḏi Papa kwinyi, na limaleyka luŋwun tɔk. 6 ŋgwa kweḏi kəni, eḏuŋw zi gi neŋne ŋa ŋandicazi Ṯigɽim tirlinelu ter yaniiza.
juwab kweḏi kaniiza kinani filaḏalfiya
7 lucazi maleyka kweḏi kaniiza kinani filaḏalfiya, ŋwu: ŋiɽaŋal ŋu ŋir ŋandizazi ŋgwa Kwirlinelu ter rerec, ŋgwa kweḏi mufṯah kweḏi dauḏ, kweṯi kiṯi, ŋwere kwere eḏi leŋḏeḏa mac, na kweṯi leŋḏeḏa, ŋwere kwere eḏi kiti mac.
8 nyi kwilŋiiḏi ŋɔḏɽor ŋɔŋa. izari, nyi ŋgwu kwumɔŋa ketize ogwur lu wufuɽu, ŋwere kwere mac kweḏi ŋuma eḏi leŋḏeḏa. ŋilŋiiḏinyji rac, a kweḏi ŋuma ŋɔkwɽoc, na ta miḏa kinna ŋiɽaŋali ŋinyi teter, na ere nyindini yiriny yinyi mac. 9 izaṯi, nyi kwiili lizi kla leḏi majma kweḏi zeyṯaan, kla letaruŋw: nyiŋa liri yahuuḏ, lakin ner ere orɔ yahuuḏ mac, likəki ŋeluŋi—izaṯi, lenyji iili er ŋa iidecelu ŋwuɽele-na, mindaŋ mer elŋe eḏaruŋw nyi kwumɔŋazi amɽi. 10 kaka ma gwu aŋraci ŋiɽaŋali ŋinyi ṯukwurmɔṯana ṯi, a ŋa aŋraci ki lomur leḏi tumɔmma ṯinḏi eḏila ṯurmuna nana ndendeṯ, eḏi mummi lizi tatap linani ki ṯurmun-na. 11 nyi ŋgwu kwila fitak, miḏizi ŋa teter ŋeḏi ŋazi, mindaŋ ma ŋa kwere ere agiḏa taŋgiŋi mac. 12 ŋgwa kweṯillazi ki, kwunderṯa kwenyi ruzi ṯiɽḏin ki heykal-na weḏi Allah winyi; ŋwere ruweḏe lu kwokwony ḏuṯ, enyi lɔ ŋunduŋwu yiriny nana yeḏi Allah winyi, na yiriny yeḏi meḏiina kweḏi Allah winyi, kwir urzaliim kwiaŋ, kwinḏi eḏoɽa kilerena nani gwu Allah winyi, na yiriny yinyi yiaŋ tɔk. 13 ŋgwa kweḏi kəni, eḏuŋw zi gi neŋne ŋa ŋandicazi Ṯigɽim tirlinelu ter yaniiza.
juwab kweḏi kaniiza kinani lawuḏikya
14 lucazi maleyka kweḏi kaniiza kinani lawuḏikya, ŋwu: ŋiɽaŋal ŋu ŋir ŋandizazi ŋgwa kwetari emba, kwir zuhuuḏ kwirlalu, kweri zi andazi ŋir rerem, kwunani kwizatuk ki lomur limɔ li Allah daɽmaḏa kwɔmne tatap.
15 nyi kwilŋiiḏi ŋɔḏɽor ŋɔŋa; ŋa kwiti kwiḏi mac, na ere fuḏi tɔk mac. aḏri, nyi kwunaŋna ŋa ta eḏorɔ kwiḏi tuc, ya eḏorɔ kwufuḏu tuc. 16 taŋwu, kaka iti ḏi ŋa gwu rerec mac, na ere fuḏi rerec tɔk mac, ur ŋa gwu ṯalam, nyi kwɔ ŋa weḏiḏelu kworɔ gi kwinyi. 17 kaka ari ŋa gwu ŋwu: nyi kwiri kwurṯu, nyi kwumɔ be teter, nenyi ere naŋni kwɔmne kwere kwokwony mac, nezi ere elŋece mac eḏaruŋw nyi kwurluŋw nyiḏak, kweṯir eca mizkiin, na kwiri kwuway cakicagi, na kwiri kwunduŋ, na kwunani lufḏutu. 18 taŋwu nyi kwunaŋna ŋa eḏi liṯaḏa nyuŋwu ḏahaba titiɽnyi nana igə yi, mindaŋ ma orɔ kwurṯu; na yireṯi yifiiḏu pərpər ezi kenne, mindaŋ ma turony ere ye ŋaŋwu mac ŋiɽaŋal ŋi ŋeḏi ŋufduṯu ŋɔŋa; na ḏawa eḏenji ki yey-na yɔŋwa, mindaŋ ma eḏi ŋuma eḏeze. 19 kla tatap leṯinyjamɽi, eṯinyji ermici, na eṯinyji rati; taŋwu, kitizazi yey ŋamaŋ, a urla tugwori lu. 20 izaṯi, nyi ŋgwu kwirli kogwur, kwupiiḏi yerge eḏenḏa. ma kwizi kwere niŋnaci nyuŋwu ṯɔgwɽɔ, mindaŋ muŋw kiṯizi nyuŋwu, nyenḏi nanuŋw gwu eḏi gi eḏne, mindaŋ menyi gi oɽmaṯi duŋw. 21 ŋgwa kweṯillazi ki, kwunderṯa kwenyi emni eḏi nanalu nyi gi kwurzi la kweḏi ŋeleny, kaka illazanyi gwu ki tɔk, nenyi nanalu Papa gi kwurzi la kwuŋwun kweḏi ŋeleny. 22 ŋgwa kweḏi kəni eḏuŋw zi gi neŋne ŋa ŋandicazi Ṯigɽim ṯirlinelu ter yaniiza.