Igini gwa akhthaam
1 A nyaŋa dina ma Lirainy igiye khithm geta gi akhthaam gina giro kworoŋo‐thiril, a nyi diŋini gweta gi owaŋ ina iro kworoŋo ŋwurnie ŋwal ŋwai, ŋwiro ŋinena ŋwal ŋwa lirainy lina limirinu ganu ŋwarnu, Ila ŋaŋa. 2 Nyibaŋa, a aŋadhi, murtha gwina gwipidho, a gwina gwijinalaŋ gwuthi gurijal; aldhedha taaj, a ŋeda tuiya gwuthi dhinyuŋw duŋw dhinyi.
3 A dina muŋw igiye khithm gina giro nimra ram, nyidiŋini kowaŋu gina giro nimra ram ŋwarnu, Ila ŋaŋa. 4 A murtha tuiya gwiter gwina gwure; a gwina gwijinalaŋ dhedhini ŋelenya duŋw irniye audhaijiyuŋw galo gi gidhila, a di liji rinyiye gweta gweta degen ganu; a gwidhedhinu kalala gina ginaŋ.
5 A dina muŋw igiye khithm gina giro nimra thiril, nyidiŋini kowaŋu gina giro nimra thiril ŋwarnu, Ila ŋaŋa. A nyaŋa, a aŋadhi, murtha gwina gwuminaŋ; a gwina gwijinalaŋ gwuthi miizaan gi dhoi dhuŋun. 6 A nyi gwidiŋinu ŋwal keligeny ganu ga owaŋ ina iro kworoŋo ŋwina ŋwarnu, Kela geta ga gamẖ giro ga rubu, a kela thiril ga shaⓐiir giro ga rubu; abi ŋela a khamra athaŋal kerajo galo no.
7 Dina muŋw igiye khithm gina giro nimra kworoŋo, nyidiŋini ŋwal ŋwa kowaŋ gina giro nimra kworoŋo ŋwarnu, Ila ŋaŋa. 8 Nyibaŋa, a aŋadhi, murtha gwina gwigilaŋ, a gwina gwijinalaŋ jiriny juŋun jan Ai, a gwina gwigwujanu githo gwan kalo gina gathin liji je lina laio; aldhedhini ŋelenya gi rubu gweta gwa gidhila alaŋ dilrinya kalala gai a gidhuŋur gai a ai gwai a owaŋ yai ya gidhila.
9 A dina muŋw igiye khithm gina giro nimra thudhina, nyaŋa loboŋ nono digirima da ŋediŋa lina lirinyinu gi dhuŋun dha dhuŋun dha Kalo, a gi dhuŋun dha shahaada gwina gwuthilo; 10 alure gwula ŋwal ŋwai ŋwipa, alarnu, Kweleny gwai gwina gwiŋir didirel a gwina gwiro titiganu, kaija giro girau gina gadhaŋagai akimiye a ŋa wureje ẖukm gwa ŋin ŋuri gi liji lina lathije kidhila? 11 Albidhedha gweta gweta kiraŋa gina gipidho; allibaicinu lagatho uwa kaija gitiny manaŋ, di almeaje jinea jina jiro limedhigen legen a limegen legen ko, lina laji larinyini gwiro ŋinena ŋediŋa.
12 A nyaŋa dina muŋw igiye khithm gina giro nimra nyiril, a aŋadhi, kalo gubo galo gwuleny; a aŋin umini ŋwuro ŋinena guman gwa uru, a gwuwa ro ŋinena ŋin; 13 a ŋwudum ŋwa Sama upudhina kwiyaŋ, gwiro ŋinena athil kwari gwina gwiro gwudha upidhiniya ŋwudha ŋwuŋun ŋwina ŋwoma ŋwati ŋwure no, ada gwima karun gina gipa ariye galo. 14 A Sama erna ŋwuro ŋinena kitham gina gimirinu liduŋw, a ŋwen peth a jaziira peth alubrini gi kalo gina gijina. 15 A maluuk la gidhila, a liji lina linaŋ, a liji lina luthi ŋida ŋoinyadho, a komandaanŋa, a liji lina libur nono, a jine peth, a liji peth lina luthi ẖurriiya, algilibice lidom legen gi nyimu a gi nyol ganu nya ŋwen; 16 A ŋediŋa aici ŋwena a nyol nu, Upidhinadhijinalaŋ, a jigiriba galo gi je ganu ja ŋeda gwina gwijalo kursi alaŋ, a gi kadhugore gwa Lirainy; 17 ŋinena ma lamun ila ladhi kadhugore gwuŋun lina linaŋ; abi ei gwuthi ŋoma gwadhuna?