Sama gwina gwiyaŋ a gidhila gina giyaŋ
1 A nyi gwaŋadhi Sama gwina gwiyaŋ a gidhila gina giyaŋ; ŋinena ma Sama gwina gwiro kwerkwereny a gidhila gina giro kwerkwereny erna; a baẖr gwati gwabujini manaŋ no. 2 A nyi gwina gwan Yuuẖanna gwaŋadhi mediina gwina gwiŋir didirel, gwina gwan Urushaliim gwina gwiyaŋ gwulo gi Sama di Kalo, gwijarimanu gwiro ŋinena ŋera ŋadhi gitini gi dhai ŋwugena ciraŋa jina jiŋir gwan kwoma gwuŋun. 3 A nyi gwadiŋinu ŋwal ŋwina ŋwipa gi Sama ŋwarnu, Aŋadhi, gutu ga Kaloŋa liji lai a ŋeda gwalje ŋediŋa lai, a ŋediŋa laro liji luŋun, a Kalo gaje ŋediŋa lai, a garo Kalo gegen. 4 A Kalo gaji gabaruthe ŋwal peth gi je ganu jegen; a ai gwati gwaje manaŋ no, i kadugore, i are, i ŋwuredeny ŋwati ŋwaje manaŋ no, ŋinena ŋidi ŋina ŋiro kwerkwereny ŋimerna. 5 A gwina gwijalo kursi alaŋ arnu, Aŋadhi, nyi gwageta ŋida peth ŋiyaŋ. Nyibaicinu, Ulo, ŋinena ro dhuŋun ibidha titiganu a dhiŋir. 6 Nyibaicinu, Dhuŋun dhimaro peth di. Nyi gwiro Alif a Alyaa, gwina gwiro kwerkwereny a gwina gwiro gidon. A nyi gwadhedha gwina gwithi odha duŋwiye gi ŋwijigeny ŋwa ŋau ŋina ŋimidho tur. 7 Gwina gwadhinyi gwuthi ŋelenya ŋidi alaŋ peth; a nyi gwaro Kalo guŋun, a ŋeda gwaro ŋari ŋiny. 8 Abi lina lidhenyo, a lina lati luminyu no, a lina lathapai dhuŋuna dhina dhike, a lina lathirinyiye, a lidhir, a lina lathapai ŋima, a lina lathorthadha ŋida ŋitiŋiter, a lidhuŋun peth laji luthi dhuŋuna dhegen gi baẖr gwina gwathimujini iga yai a kibriit gai. Ibigwa gwiro ai gwina gwiro nimra ram.
Urushaliim gwa Sama
9 A malaak gweta ila diginy gi malaayka lina liro kworoŋo‐thiril gwina gwuthi koraat gina giro kworoŋo‐thiril gina goinyadho ŋirainy alaŋ ŋina ŋiro kworoŋo‐thiril ŋina ŋiro gidon, anagwai abiŋi, ŋwarnu, Ila, a nyi gwaŋa aŋajo gwina gwadhi gitini gi dhai, gwina gwiro kwa gwa Lirainy. 10 Nyi Dhigirim odha gi len lina linaŋ lina lolalaŋ, a nyaŋajo mediina gwina gwinaŋ, Urushaliim gwina gwiŋir didirel, gwina gwulo gi Sama di Kalo. 11 Gwuthi majdh gwa Kalo, a fure gwuŋun gwiro ŋinena kol gina gipa luro gwuleny, giro ŋinena yashib, gina guro ganu giro ŋinena balluur; 12 a gwuthi kwaribainyu gwina gwinaŋ a gwolalaŋ, a gwuthi our die‐a‐ram, a malaayka lina liro die‐a‐ram dhuna kour alaŋ yeta yeta, a gi our alaŋ yeta yeta jiriny julinu, jina jiro jiriny ja gabaayil gina giro die‐a‐ram ga keleŋa ga Israayiil. 13 A kalo gina gathin aŋin alidha ŋwuthi our thiril; a gi shemaal ŋwuthi our thiril; a gi januub ŋwuthi our thiril; a kalo gina gathin aŋin ule ŋwuthi our thiril. 14 A kwaribainy gwa mediina gwuthi dugul dina diro die‐a‐ram, a gi dugul alaŋ jiriny julinu ja liji lina lukejinu la Lirainy lina liro die‐a‐ram. 15 A gwina gwabiŋanagwai gwuthi liboraŋa lina liro dahab duŋwyece mediina, a our yuŋun, a kwaribainy gwuŋun. 16 A mediina gwuthi ŋwubil kworoŋo, a ola gwuŋun gwiro ŋinena ore galo gwuŋun; ŋwubi yece mediina liboraŋ lai luŋun, a ola gwuŋun gwiro ŋinena itnaashar alif qalawa. A ola gwuŋun a ore galo gwuŋun a olalaŋ gwuŋun lubiyo galo. 17 A ŋwuyece kwaribainyu gwuŋun ko, ŋwuro miiya arbaⓐ wa arbaⓐiin ḏuraaⓐ, gwiro ŋinena athi kwiji yece, a dhuŋun ibidha dhuthi maⓐna, gwan malaak. 18 A kwaribainy gwuŋun gwaicinu yashib gwai; a mediina gwiro dahab dhina dhijuro, dhiro ŋinena gizaaz gina gijuro ganu. 19 A dugul da kwaribainy gwa mediina digigitinu gwiŋir nyol nyai peth nyina nyipa luro. A kol gina giro kwerkwereny ga dhugul giro yashib; a gina giro nimra ram giro yaaguut gina giro azrag; a gina giro nimra thiril giro ⓐagiig gina gipidho; a gina giro nimra kworoŋo giro zumurrud gina gigilaŋ; 20 a gina giro nimra thudhina giro jazaⓐ ⓐagiig; a gina giro nimra nyiril giro ⓐagiig gina gure; a gina giro nimra kworoŋo‐thiril giro zabarajid gina giro gilo; a gina giro nimra dubaŋ giro zumurrud silgi; a gina giro nimra thudhina‐kworoŋo giro yaaguut gina giro gilo; a gina giro nimra die giro ⓐagiig gina gigilaŋ; a gina giro nimra die‐a‐gwetipo giro asmaanjuuni; a gina giro die‐a‐ram giro jamshat. 21 A our ina iro die‐a‐ram iro lulu lina liro die‐a‐ram; a our yeta yeta yigitinu lulu lai leta, a dhai dha mediina dhiro dahab dhina dhijuro, dhiro ŋinena gizaaz gina guro ganu. 22 A nyi gwati gwaŋudhina hekal no, ŋinena ro Kweleny gwina gwiro Kalo gina guthi ŋoma ŋidi alaŋ peth a Lirainy hekal gwuŋun. 23 Athi mediina bupo aŋinu i gwuwa dilorajo galo no, ŋinena uriyo majdh ganu gwa Kalo, a Lirainy liro lamba luŋun. 24 A liumam la liji lina lagilaŋini lelila fure gwai gwuŋun; a maluuk la gidhila apa majdh gwegen a neye gwegen dugun. 25 A our yuŋun yati yalaŋthini aŋina no; ŋinena athi gile jo mine no. 26 A ŋediŋa lapa majdh gwa liumam a neye gwegen dugun. 27 A ŋidi ŋeda ŋati ŋanuni ganu ŋina ŋiro ŋirle, i lina lathapai ŋida ŋina ŋike, i lina liro lidhuŋun gatur no, abi ŋediŋa lina lulinu kitham gadhi midhe ga Lirainy dogo.