Dhuŋun dhina dhaŋinijo Yuuẖannaŋw dhina dhiro ŋinena dhiŋidi dhan Lirainy a liji lina libibrinu
1 A nyi datiŋa galo, a aŋadhi, nyaŋa Lirainyu lidhunudhi gi len alaŋ la S̱aahyuun, liji lai lina liro miiya arbaⓐ wa arbaⓐiin alif, lina luthi jiriny ja Babo gwuŋun julinu gi nyoul alaŋ nyegen. 2 A nyi diŋini ŋwal gi Sama, ŋwiro ŋinena ŋwal ŋwa ŋau ŋoinyadho, a ŋwiro ŋinena ŋwal ŋwa mirini ganu gwa lirainy ŋwina ŋwipa; a nyidiŋini ŋwal ŋwina ŋwiro ŋinena ŋwal ŋwa lina lathure jubura alure jubura jegen. 3 A ŋediŋa eliŋa gwiro ŋinena man eliŋa dheliŋa dhina dhiyaŋ gi je ganu ja kursi, a gi je ganu ja owaŋ kworoŋo, a shiyuuk. Athi kwiji gweda uthi ŋoma duŋwalimiye dheliŋa ibidhe no abi ŋediŋa dogo lina liro miiya arbaⓐ wa arbaⓐiin alif lina lilinu gi gidhila. 4 Ŋediŋa liro lina lati lapo ŋida ŋina ŋiro ŋirle la lai no; ŋinena jurilo. Ŋediŋa liro lina lathigwuje Lirainyu kalo peth gina gathuŋwun ela; a ŋediŋa lilinu gi liji ganu dilro fruuta gwina gwiro ŋwura di Kalo a di Lirainy. 5 Athiluthi ukinejuŋw ganu gi ŋwinyu ŋwegen no, ŋinena athiluthi dhara gi je ganu ja kursi ga Kalo no.
Dhuŋun dhina dhaŋinijo Yuuẖannaŋw dhina dhiro ŋinena dhiŋidi dhan malaayka lina liro thiril
6 A nyi gwaŋadhi malaak gwiter gwina gwidhi nyibo nyai keligeny ganu gi Sama, gwuthi Dhuŋuna dhina Dhiŋir dhina dhathije gwortal duŋwulabiŋaijo lina lathije kidhila, liumam peth a gabaayil a diŋila a liji, 7 ŋwari ŋwal ŋwai ŋwina ŋwipa nu, Dhenyul Kaloŋa, a nyadhedha majdh; ŋinena ma saaⓐa ila ja ẖukm gwuŋun; idijul gwina gwigeto Sama, a gidhila, a baẖr, a ŋwijigeny ŋwa ŋau, ŋwurko ŋwai. 8 A malaak gwuja gwiter, ŋwarnu, Baabil gwina gwiro mediina gwina gwinaŋ gwimide, gwimide, ŋinena muŋwice liumam peth khamra ga kadhugore gwa ŋidhir ŋuŋun. 9 Al malaak gwina gwiro nimra thiril gwuja, ŋwabiŋi ŋwal ŋwai ŋwina ŋwipa ŋwarnu, Ada kwiji gweda gwimidijo kowaŋu a s̱uura gwuŋun ŋwurko ŋwai, ŋwuminyi ŋule ŋuŋun ŋoul alaŋ ŋuŋun, i gi dhoi alaŋ, 10 a ŋeda ko gweye khamra ga kadhugore gwa Kalo, gina gibalijinu gi finjaan gwadhi kadhugore gwuŋun gina gati gilagijinu ganu dhuŋun dhai dheda no; a gwurini ŋina iga yai a kibriit gai gi je ganu ja malaayka lina liŋir didirel, a gi je ganu ja Lirainy. 11 A gwuluŋw gwalidha gwa umi ŋiya gwegen gwortal di gwortal; alati luthi gathuŋw uwa ninaŋin i gigilo, lina lathidijo kowaŋu a s̱uura gwuŋun ŋwurko ŋwai, a peth lina luminyu ŋule ŋa jiriny juŋun no. 12 Mina mutha dugore gwo gwa liji lina liŋir didirel, a mina lina lathidima awaamir gwa Kalo a imaan gwa Yasuuⓐ. 13 A nyi gwidiŋinu ŋwal gi Sama nyilaicinu, Ulo, Liŋir dugore lina laio lina laio gi dhuŋun dha Kweleny gi ŋwamun ibiŋwa di ŋwamun ŋwina ŋwaji ŋwila gidon. Ye, Dhigirim dharnu dilgatho uwa ŋiro ŋegen; ŋinena athil ŋiro ŋegen gwuje.
14 A nyi datiŋa galo, a aŋadhi, kiburu gina gipidho, a kibur alaŋ gweta gwijinalaŋ gwiro ŋinena Ŋari ŋa liji, gwuthi taaj gi lira alaŋ luŋun dhina dhigitinu dahab dhai, a gi dhoi dhuŋun gwuthi munjal gwina gwuthi ŋin. 15 A malaak tuiya gwiter gi hekal, ŋwurnie ŋeduŋw gwina gwijalo kiburu alaŋ ŋwal ŋwai ŋwina ŋwipa ŋwaicinu, Ukejo munjal gwuŋa, nyuni; ŋinena ma saaⓐa ila jadhuni; ŋinena ma dugur udhe da gidhila. 16 A gwina gwijalo kiburu alaŋ gatho munjal gwuŋun kidhila; a dugur unini kidhila. 17 A malaak tuiya gwiter gi hekal gwina gwo gi Sama, gwuthi munjal ko gwina gwuthi ŋin. 18 A malaak tuiya gwiter gi loboŋ, gwina gwuthi ŋelenya kiga alaŋ; ŋwure gwula gwulo gwai gwina gwipa di ŋeda gwina gwuthi munjal gwina gwuthi ŋin, ŋwarnu, Ukejo munjal gwuŋa gwina gwuthi ŋin, a ŋawureje dugura liduŋw da gidhila; ŋinena ma fruuta gwuŋun ure. 19 A malaak gatho munjal gwuŋun kidhila, ŋwuwureje dugura liduŋw da gidhila, ŋwulgatho gi libugul ganu ladhude lina linaŋ la kadhugore gwa Kalo. 20 A fruuta gwa dugur udini gi libugul ganu ladhude por gi mediina, a ŋin tuiya gi libugul ladhude, di alobani gi ŋwijam ŋwa limurtha gi kalo gina golaŋ ganu giro ŋinena alif suttumiiya qalawa.