Dhuŋun dhina dhiŋir dhina dhuthi Ibraahiim
1 Abi alŋa larakwai gwan Ibraahiim gwina gwiro babo gwega? Gi dhuŋun dha aŋinu gwibujo aŋa? 2 Abi ada Ibraahiim gwima iŋirini ŋiro ŋai, gwuthi dhuŋuna dha dhare ŋamilai; abi dhati gi je ganu ja Kalo no. 3 Kitham garakwai? A Ibraahiim uminyi Kaloŋa, aldhurejo dhuŋuna dhina dhiŋir. 4 Abi gwina gwathapai ŋiro gwati gwaldhurejo ujra yuŋun gi dhuŋun dha niⓐma no, abi gi dhuŋun dha gamju. 5 Abi gwina gwati gwathapai ŋiro no, ŋwubuminyi ŋeduŋw gwina gwathiŋiriye lijo lina lati luminyu dhuŋuna dha Kalo no, a imaan gwuŋun gwadhuredhijo dhuŋuna dhina dhiŋir. 6 Gwiro ŋinena arna Daawud ko gwan baraka gwa kwiji, gwina gwima Kalo dhuredhijo iŋiruŋw gwuŋun gwati gi ŋiro ŋuŋun no. 7 Iŋiriyul dugore lina limal Kalo dhudhanijo ŋida ganu ŋegen ŋina ŋike, a ŋwugiriba ŋida galo ŋegen ŋina ŋike. 8 Kwiji gwiŋir dhugore gwina gwati gwa Kweleny dhurejo ŋida ŋuŋun ŋina ŋike no.
9 A minoŋ baraka ibigwa gwiro gwan liji lina lurtedhinu dogo a? i gwan liji lina lati lurtedhinu ko no. Ŋinena arilnu gwimadhuredhijo Ibraahiimuŋw iŋiruŋw imaan gwai. 10 Abi akwai gwidhuredhijuŋw? Dina muŋw uredhini, i kwereny nanaŋ gwati gwuredhinu no. Gwati gi uredhini no, ŋwubiro gi gwina gwati gwuredhinu no. 11 Gwapo ⓐalaama gwa uredhini, gwina gwiro khithm ga dhuŋun dhina dhiŋir dha imaan gwina gwijo dugun gwina gwati gwuredhinu no; duŋwuro babo gwa liji peth lina luminyu, lina lati lurtedhinu no; dil dhuŋun dhina dhiŋir dhuredhijo iŋiruŋw ko. 12 A babo gwa urtedhini degen lina lati lurtedhinu dogo no, abi lina lathelila ko gi ŋwora ŋwa imaan gwina gwuthi babo gwega gwina gwan Ibraahiim, gwina gwijo dugun kwereny nanaŋ gwoma gwati gwuredhinu no. 13 A minoŋ gwati naamuus gwai dhiro dhuŋun dhina dhabiŋaijuŋwdhai Ibraahiimuŋw, i gi ŋwulaŋ ŋwuŋun no darnu lapai ŋelenya ŋa gidhila, abi dhuŋun dhai dhina dhiŋir dha imaan. 14 Abi ada lina liro la naamuus limapai ŋelenya, a minoŋ imaan gwimarujini tur, a dhuŋun dhina dhabiŋaijildhai dhimarujini tur. 15 Ŋinena naamuus gwathapai kuŋw dhugore; ŋinena ada naamuus gwati gwimaje no, a ŋidi ŋina ŋike ŋati ko no. 16 Gi dhuŋun ibidha imaan gwai, di dhuŋun dhina dhabiŋaijildhai je niⓐma gwai; duŋwuro titiganu di ŋwulaŋ peth; a dhati dhiro gi lina liro la naamuus dogo no, ŋwubiro ko gi lina lijo gi imaan gwa Ibraahiim; gwina gwiro babo gwega peth. 17 (Gwiro ŋinena ulinuŋwna, Nyi gwimaŋa ruje babo gwa Liumam loinyadho,) gi je ganu ja Kalo, gina gimaŋa uminyi gina gathilmidhiye lina laio, a ŋwurnie ŋida ŋina ŋati ŋijo no ŋiro ŋinena ŋijo. 18 Gwina gwati gwuthi dhunijuŋw no gwuminyu dhunijuŋw, duŋwuthi ŋoma ŋwuro babo gwa Liumam loinyadho, gwiro ŋinena arna, A minoŋ ŋwulaŋ ŋwuŋa ŋwaje. 19 A ŋeda gwati gwimulo nono gi imaan no, athuŋw dhuredhi aŋina yuŋun darnu iro ŋinena imai no, dina uthuŋw jidhileo dure‐thudhina, i kwa gwuŋun gwina gwan Saara gwina gwiro ludum. 20 A gwati gwubo galo dina athuŋw uthi imaan gi dhuŋun dhina dhabiŋaijidhai Kalo no; ŋwubibur nono gi imaan, ŋwudhedha Kaloŋa majdh. 21 Gwiliŋidhi momaŋ darnu dhuŋun dhina dhabiŋaijildhai, ŋeda gwuthi ŋoma duŋwapai ko. 22 A minoŋ ko ŋwudhuredhijo iŋiruŋw. 23 Abi dhati dhulinu gwan ŋeda dogo, darnu dhadhuredhijo ŋeduŋw cucun no; 24 abi dhan alŋa ko lina laji lalidhuredhijo lina luminyi ŋeduŋw, gwina gwidireyo Yasuuⓐuŋw dai gwina gwiro Kweleny gwega, 25 gwina gwidhedhinu dai gwan ŋidi ŋega ŋina ŋike, ŋwubidirini dai gwan iŋirini gwega.