Dhuŋun dhina dhaŋinijo Yuuẖannaŋw dhina dhiro ŋinena dhiŋidi dhan koraat gina giro kworoŋo‐thiril a dhan ŋirainy
1 A nyi gwaŋadhi ⓐalaama gwiter gi Sama gwina gwinaŋ a gwina gwuthi dhuŋuna dhadhalije galo dir, malaayka kworoŋo‐thiril lina luthi ŋirainy kworoŋo‐thiril ŋina ŋiro gidon; ŋinena uthilo dhuŋuna dhadhi meaje kuŋw dhugore gwa Kalo.
2 A nyi gwaŋadhi ŋida ŋeta ŋina ŋiro ŋinena baẖr gwina gwigitinu gizaaz gai ŋwulagudhini ganu iga yai, a ŋediŋa lina lidhinyu kowaŋu, a s̱uura gwuŋun, a ŋule ŋuŋun, a ⓐadad gwa jiriny juŋun, lidhunudhi gi baẖr alaŋ gwina gwigitinu gizaaz gai, luthi jubura ja Kalo. 3 A ŋediŋa eliŋa dheliŋa dha Muusa, gwina gwiro gine ga Kalo, a dheliŋa dha Lirainy, alarnu, Ŋiro ŋuŋa ŋinaŋ a ŋathalije lijo galo dir, Kweleny gwai gwina gwiro Kalo gina guthi ŋoma ŋidi alaŋ peth; a dai duŋa didhunu galo a diro titiganu, Malik gwai gwa lina liŋir didirel. 4 Ei gwina gwati gwaŋadhenya no, Kweleny gwai, a ŋwumajidhe jiriny juŋa, ŋinena raŋa gwetipo gwina gwiŋir didirel; ŋinena adhi liumam peth ila a ŋalidijo ŋwurko ŋwai gi je ganu juŋa; ŋinena ma aẖkaam gwuŋa aŋini.
5 A gidon gi dhuŋun ibidha nyidatiŋa galo, a aŋadhi, a hekal gwa gutu ga shahaada igini gi Sama, 6 a malaayka lina liro kworoŋo‐thiril tuiya gi hekal, lina luthi ŋirainy ŋina ŋiro kworoŋo‐thiril, a ŋediŋa ligeno ciraŋa jina jiro tiil jina jijuro a jathare gumgum, algukini ganu gash gai gi jabaŋ jegen gina giro dahab. 7 A kowaŋ geta gi owaŋ ina iro kworoŋo dhedha malaayka lina liro kworoŋo‐thiril koraat gina giro kworoŋo‐thiril gina gigitinu dahab dhai gina goinyadho kuŋw dhugore alaŋ gwa Kalo, gina gathimidhe gwortal di gwortal. 8 A hekal oinyadhe gwuluŋw ganu ditel gi majdh gwa Kalo, a gi ŋoma ŋuŋun; athi gweda uthi ŋoma duŋwuni hekal ganu no, di ma ŋirainy ŋina ŋiro kworoŋo‐thiril ŋa malaayka lina liro kworoŋo‐thiril meadhe.