Ŋen ŋəd̶ənna ëiñua
1 Fiñi Bulus, ñəŋgi igëndənu ṯa yid̶i ŋəmëɽria ŋ-Almasiya Yesu, na oraiñ Ṯiməd̶awus. Ñageɽəd̶o Filimun igi ñagəbəd̶ialda ŋəmëɽria na igi ñagəbwamaiya, 2 na ñageɽəd̶o oraiñ gəɽəbwa Abfia igi ñagəbwamaiya na Arkibbus igi ləgəldəbwaiñəd̶iar eŋen ŋə-Rəmwa na ñageɽəd̶o kanisa id̶i d̶ərarraid̶ia egeɽa gəlaɽəŋa.
3 Ñagabeɽəd̶ia ṯa Bapa Rəmwa irëndr, na Eləŋ Yesu Almasiya aləndənaice d̶ənaica məɽəməɽeñ na d̶ëuṯaralo.
Ŋen ŋəd̶əbwa na ŋəd̶wonaṯa d̶ə-Filimun
4 Igaŋërṯu Rəmwa nano rəlëɽəñi jaica jaica, ñoman pred̶ ndə egəbekeɽəd̶ia na igəŋaulëldəŋəd̶einia, 5 ŋen ŋanṯa eganna ŋen ŋəd̶əbwa na ŋəd̶wonaṯa əllaɽəŋa ildi agerṯəlo eg-Eləŋ Yesu na eled̶a ɽ-Rəmwa. 6 Na egabekeɽəd̶ia Rəmwa ṯa ŋaləŋeṯe ŋen pred̶ ŋəŋəra iŋi ləgerṯr ig-Almasiya ŋen ŋanṯa d̶əɽəbəd̶ia eŋen ŋəd̶wonaṯa d̶əlaɽəŋa. 7 Đeṯəm d̶əbwa d̶əlaɽəŋa d̶anaicəñe d̶əŋəra nano na d̶onḏeicia ŋen ŋanṯa aganəŋa, oraiñ, agatud̶i nara nəled̶a ɽ-Rəmwa.
Ŋen ŋəd̶eɽəd̶ia eŋen ŋ-Unisimus
8 Eŋen iŋi egerṯo ŋabəɽa ig-Almasiya igaŋəlwaɽəṯia ṯa ŋid̶i ŋen iŋi ŋəfo ŋopea, 9 orn ŋen ŋanṯa igəbwaŋaiya, egwonaṯa egəŋeɽəd̶ia. Fiñi Bulus ñiŋgi igəd̶weinu na d̶əñid̶i com igëndənu ŋen ŋanṯa Almasiya Yesu. 10 Egaŋeɽəd̶ia eŋen ŋid̶ia gəlëɽəñi Unisimus igi egəfo egəɽo eṯen ŋen igëndənu egafo isijən. 11 Ananoŋ gënəŋu gero gəberṯia ŋen ŋənəŋ ŋəŋəra eŋa, orn d̶əñid̶i gerṯo ŋen ŋwaiña ŋəŋəra eŋa na iñi com.
12 Igaŋamuɽəbiṯia d̶eṯəm na egad̶waṯa ara gəlëɽəñi ŋuga. 13 Egafo egaṯa egare ṯa ŋen ŋaŋəra ndə igəmëndeicia ëli ñaldəgəfeṯe ṯa gënəŋu aŋəñiṯi ŋəmëɽria aŋərraṯe eŋen ŋəlaɽəŋa iliga ildi egəfo isijən ŋen ŋanṯa ŋen ŋəŋəra ŋə-Rəmwa. 14 Orn egero egwonaṯa igəbəd̶ia ŋen ŋənəŋ agero agəbəŋinia, illi ndə agəŋënṯu ŋen iŋi, ṯa ŋen ŋəlaɽəŋa aŋəŋəreṯe na aŋerṯe ŋəfia ŋen ŋanṯa egalwaɽo ṯia d̶eṯəm, orn ndə agəŋënṯu ŋen.
15 Aŋgaica fəŋen iŋi ñagafo ɽeteo iliga lobəlano ṯa gënəŋu aŋoɽəbəd̶ia ñaldəgəfeṯe bəɽəbəte. 16 Gerṯe gaɽo ebai məldin, orn gaɽo ŋen ŋəməñaṯa ebai. Đəñid̶i gënəŋu gaɽo oraiñ gəbwaniya kaiñ, orn gaɽo oralo egaŋəno na eg-Eləŋ Yesu com.
17 Ŋen ŋafəṯia ndə agəbaṯa ṯa ləgafo eŋen ŋonto, aŋënṯəma ŋen ŋarno agaiñaŋënṯia. 18 Ndə gënəŋu giṯiaŋa ŋen ŋənəŋ ŋeicia walla ndə gënəŋu ñagerṯəldaga ëməcu, ëɽu ŋen iŋi ñi nano. 19 Fəñi Bulus igawërd̶ia ŋen iŋi d̶əŋd̶a d̶əlëɽəñi ṯa igid̶i eŋanaice ŋen iŋi pred̶. Egaber egəlwaɽa eŋen ŋənəŋ ŋëməcu agerṯo iñi, fəd̶əməṯia d̶əlaɽəŋa. 20 Đeṯəm, ya oraiñ, egwonaṯa ṯa agaiñamədaṯa eg-Eləŋ Yesu, onḏəco ara gəlëɽəñi ig-Almasiya.
21 Igëɽənu d̶əñano ŋen igaŋəwërd̶əṯia ṯa agid̶i ŋid̶i ŋen egwonaṯa, na egaləŋeṯo ŋen d̶eṯəm ṯa agid̶i ŋid̶i ŋen ŋwaiña ŋəməñaṯo ŋen egəŋeɽəd̶ia. 22 Na ṯoɽaṯo alo ŋen ŋanṯa ñi, egabaṯa Rəmwa arəŋënṯi d̶ekeɽəd̶ia ed̶alo ṯa endeṯa nano.
Ŋen ŋəd̶ənna ëiñua d̶ənḏurṯalo
23 Abafras igi nanda ñagëndənəldəga iŋəmëɽria eŋen ŋ-Almasiya Yesu gënəŋu geɽəd̶iaŋa, 24 na Margus, na Arisṯarkus, na Ḏimas, na Luka, ildi ñagəbəd̶ialda ŋəmëɽria leɽəd̶iaŋa com.
25 Egabeɽəd̶ia ṯa d̶ənaica məɽəməɽeñ d̶-Eləŋ Yesu Almasiya ad̶əfeṯe usilaga egalo.