Ŋen ŋəled̶a ləɽia nələŋ nəkanisa
1 Ŋen iŋi ŋaɽo d̶eṯəm. Ndə ed̶a gəɽəd̶iaŋəno ṯa aŋəɽeṯe eləŋ ikanisa, gënəŋu gwonaṯa ŋen ŋəŋəra. 2 Ŋen d̶eṯəm ṯa eləŋ gəkanisa aŋerṯe gəberṯia mənna iŋu, na aŋerṯe wuji gonto, na aŋərəkëd̶i aŋəno, na aŋəṯuɽeini, na aŋəd̶əñini ŋen ŋanṯa ŋen ŋəlëɽəŋu ŋəd̶urwaṯo, na aŋələŋeṯe d̶əño na aŋəɽwad̶aṯe gəbërrəŋaid̶ia ŋen. 3 Ŋen d̶eṯəm ṯa gënəŋu aŋerṯe gəṯia ŋuɽu, na aŋerṯe gəjeiciano, orn ṯa aŋəd̶ərnaṯaralo, na ṯa aŋerṯe gəgerd̶ia eŋen, na d̶eṯəm gënəŋu aŋerṯe gəbwa algərusya. 4 Ŋen ŋarəjad̶aṯo d̶eṯəm ṯa gënəŋu garəmoṯwa led̶a əllëɽəŋu na ŋen ŋeɽa gəlëɽəŋu ŋopia, na ṯa aŋaṯoɽaṯe ñere ñəlëɽəŋu ṯa aiñəmanaṯe na aiñəmad̶əñiṯi eŋen pred̶. 5 Ndə ed̶a gero gəɽwad̶aṯa gərəmoṯwa led̶a leɽa gəlëɽəŋu, fəṯau gënəŋu gəɽwad̶aṯa gərəmoṯwa led̶a ləkanisa d̶ə-Rəmwa? 6 Ŋen ŋarəjad̶aṯo d̶eṯəm ṯa gënəŋu aŋerṯe gəɽia ed̶a gëndu ŋen maijən, ŋen ŋanṯa ndə ŋen ŋəfəṯia aŋgaica gënəŋu gid̶i aŋinṯi egare na aŋiɽiṯi ed̶akəmia Seṯanya. 7 Ŋen ŋarəjad̶aṯo d̶eṯəm ṯa gënəŋu aŋerṯe ŋen ŋəŋəra led̶a nëiñua ləndëuwər, ṯa aŋerṯe gəbəɽiṯia ed̶aria na gəbëndənia ŋenŋa ŋə-Seṯan.
Ŋen ŋəled̶a ləɽo d̶aməd̶aṯa ikanisa
8 Nṯia com led̶a ildi lëɽənu ṯa aləd̶uɽəd̶ənṯi led̶a ləkanisa, ŋen d̶eṯəm ṯa lënəŋulu aɽrəjad̶aṯe eŋen ṯa led̶a aldəd̶əñiṯi. Ŋen ŋad̶eṯəm ṯa lënəŋulu alerṯe laləŋəjəd̶ia ŋenŋa, na ṯa alerṯe ləṯia ŋuɽu ŋwaiña, na ṯa alerṯe lwonaṯa ləberṯia laŋge lwaiña. 9 Ŋen ŋarəjad̶aṯo d̶eṯəm ṯa lënəŋulu alëndeici ŋen ŋəd̶wonaṯa narna ini nəɽwata d̶eṯəm i-Yesu id̶i d̶ërrəŋeinu eled̶a əllëɽəŋu. 10 Ŋgiṯərldo alirnḏeini ananoŋ na ndə ləfid̶ənu lero mənna ano ŋgiṯərldo aləd̶uɽəd̶əni. 11 Nṯia com ŋen d̶eṯəm ṯa wasenanda alerṯe d̶əd̶əñad̶aṯa eŋen. Ŋen d̶eṯəm ṯa lënəŋulu alerṯe ləbwaid̶ia ŋen na ṯa aɽrəkëd̶i aŋəno, orn ṯa alerṯe d̶əd̶urwaṯa eŋen pred̶. 12 Ŋen ŋarəjad̶aṯo d̶eṯəm ṯa ed̶a igi gëɽənu ṯa aŋəd̶uɽəd̶əni aŋerṯe wuji gonto, na ṯa garəmoṯwa ñere ñəlëɽəŋu na ŋen ŋeɽa gəlëɽəŋu ŋopia. 13 Led̶a ildi ləd̶uɽəd̶ənia ŋopia, lënəŋulu lid̶i aləd̶əñini, na lid̶i alerṯe d̶ëɽənia d̶əñano d̶oɽra ed̶wonaṯa ndəŋ ig-Almasiya Yesu.
Ŋen ŋəŋaməɽa ŋələbijənu ŋoɽra
14 Igaŋəwërd̶əṯia ŋen iŋi ṯa, egwonaṯa igid̶i eŋeṯa nano taltal, 15 orn ndə ŋen ŋənəŋ ŋendəñi, ŋaləŋeṯe agëbəd̶ia ṯau egeɽa gə-Rəmwa igi gəɽo kanisa d̶ə-Rəmwa irri rəməṯo, id̶i d̶əɽo lwad̶ia na ad̶una yed̶eṯəm. 16 Ŋen ŋero ŋəd̶əgerd̶ia ṯa ŋaməɽa ŋəd̶ërrəŋaid̶ia id̶ëndr ŋaɽo ŋoɽra iŋi ləgəbëndiar,
ṯa Rəmwa raməñaṯo egaŋəno,
raŋaid̶ənu ṯa rad̶urwaṯo eŋen ig-Usila Gətəɽe, na malaiyəka yaseicəma.
Na rënəŋu rerrəŋcid̶ənu eled̶a lalo,
na ŋen ŋəlëɽəŋu ŋëndənu eled̶a lalo,
na gënəŋu gabeinu eŋaɽrwa ŋelo.