Ŋen ṯa led̶a labuŋṯia Rəmwa ṯau ikanisa
1 Ŋen ŋəɽənda egaŋeɽəd̶ia kaiñ ṯa ñekeɽəd̶e Rəmwa na ñaɽwataid̶e Rəmwara na ñaŋërṯi Rəmwa nano eŋen ŋəled̶a pred̶, 2 na eŋen ŋənələŋ noɽra nalo na eŋen ŋəled̶a lerṯo ŋələŋe, ṯa alɽaŋr ŋopia id̶ëuṯaralo ŋəd̶aiñaŋa na d̶ənaṯa Rəmwa. 3 Ŋen iŋi ŋaŋəra na ŋëbəd̶ia Rəmwa rəŋəra nano irri rəɽo Đëbəria id̶ëndr, 4 irri rwonaṯa led̶a pred̶ alëbərni na alləŋeṯe ŋen ŋəd̶eṯəm. 5 Rəmwa raɽo ronto na ed̶a gaɽo gonto gəfo iligano gokoɽəbaica ŋen Rəmwa nano na eled̶a, na maje fəŋu Almasiya Yesu, 6 igi gənaid̶o etam gəlëɽəŋu gəɽo d̶əpəɽa ŋen ŋanṯa led̶a pred̶. Rəmwa raməd̶aṯo ŋen iŋi iliga lëɽənu. 7 Igënəñi igëɽənu, ṯa eɽeṯe ed̶a gəɽwata ŋen ŋə-Rəmwa na d̶əd̶weinia na ṯa yërrəŋaici led̶a ŋen ildi gerṯe laɽo Alyawuḏ ed̶wonaṯa na eŋen ŋəd̶eṯəm. (Egalwaɽa d̶eṯəm. Egaber egagəbalo.)
8 Ŋen ŋafəṯia egwonaṯa led̶a pred̶ alekeɽəd̶e Rəmwa alarrəbaice rəŋ elo irri rətəɽe d̶eiciano d̶ero na d̶əgerd̶ia eŋen d̶ero. 9 Nṯia com egwonaṯa liji əɽəlda alid̶əni ŋaiyo ŋərəjad̶aṯo alëɽəni ndrenia nano ŋopia, gerṯe dəbəɽuad̶a ŋəɽwa ŋaiyəŋa, na gerṯe aḏaəbya na gerṯe ñerldeña na gerṯe ndreniana nwaiña iliano, 10 orn ŋəmëɽriaŋa ŋəŋəra, ŋen ṯia ŋaŋəra iliji əɽəlda ildi ləbaṯa ləbwa Rəmwara. 11 Ŋgiṯr liji əɽəlda alërrəŋeini ŋen d̶əbwaiñad̶a ŋəma na d̶əɽiñaṯad̶a ŋen. 12 Egaber igəŋgiṯia liji əɽəlda alërrəŋaid̶i ŋen walla alerṯe ŋələŋe eled̶a lərrwa. Đeṯəm lënəŋulu aləbwaiñe ŋəma. 13 Ŋen ŋanṯa Ad̶əm gid̶ənu ananoŋ, oro Auwa nəŋid̶əni nḏurṯu. 14 Na Ad̶əm gero gəbəd̶ənia ŋad̶əna, orn wuji gid̶inu ŋad̶əna nəŋid̶i ŋen ŋeicia. 15 Orn wuji gəɽəbwa gid̶i aŋëbərni ndə gələŋa, ndə gəɽaŋa ed̶wonaṯa, na id̶əbwa, na ed̶ətəɽia d̶ətad̶a egare.