Yaḏaam yǝthi Allah.
1 Laakin liyǝŋgǝri liinyi, nyii kwiti kwǝthi ŋɔma ethi andaci ŋaaŋwɔsi mac kaka lizi lǝthi Ṯigɽim-nǝ, laakin kaka lizi lǝthi sɔɔrɔma kwǝthi aŋna, nǝ kaka nɔrŋa-gwɔ tǝ kinnǝni lokwɔɽony ethi Kwɔrɔstɔ-na. 2 Nyii kwiccǝ-ŋǝsi ŋan, nǝ ethne ere oro wɔfirlli mac, nǝ neere ṯimmannici kinnǝni kire-kirem ŋgwɔ tok mac, 3 kaka naani-ŋa tǝ kinnǝni ki-sɔɔrɔm-na kwǝthi aŋna. Nǝ kaka naanɔ-gwɔ tǝ kinnǝni kee ŋiɽany nǝ ŋurrǝthǝ-nǝ daŋgal-na, e-ta neere oro lǝthi yaŋna mac-a, nǝ kaka nǝṯi-gwɔ nanni kaka lizi lir domony tok mac-a? 4 Kaka mǝ kweere aarɔŋw, “Nyii kwɔrɔ kwǝthi Bɔɔlɔs”, nǝ kwir ter, “Nyii kwɔrɔ kwǝthi Abɔllɔɔs”, ŋaaŋa liti lir lizi lir-ta-lɔŋw domony mac-a?
5 Aatha kwɔrɔ kwǝni Abɔllɔɔs? Nǝ aatha kwɔrɔ kwǝni Bɔɔlɔs? Nyii-ŋǝ lir-pa yaḏaam kiya yimǝ-yi ǝmmini, kaka-ṯǝ ŋothɽor ŋa ŋikannica-nyji Kweeleny leere-leere. 6 Ninyoro kwigiithǝ, nǝ Abɔllɔɔs-tǝ nɔŋw icci ŋaaw, laakin Allah tǝ nɔŋworo wǝṯi duŋgwǝci ethi peŋe. 7 Ŋwɔṯaŋw nǝreere ǝni ŋiɽaŋal ŋeere mac naanɔ-gwɔ ŋgwa kwugiithǝ wala ŋgwa kwiccǝ ŋaaw, laakin nǝṯǝ Allah oro ṯɔɽɔk wǝṯi duŋgwǝci ethi peŋe. 8 Ŋgwa kwǝṯi kiithi nǝ ŋgwa kwǝṯi icci nǝrǝni libɽithɔ-na, ŋwɔṯaŋw ǝri aavi ɔjra ter-ter wǝthi ŋothɽor ŋeeŋen. 9 Kaka nɔrɔny-gwɔ lǝṯi ɔɽɔmaṯṯi ki-ŋothɽor-na ŋǝthi Allah; noro ŋaaŋa ṯɔrɔny ṯǝthi Allah, nǝ noro tok yiŋna yǝthi Allah.
10 Nǝ ŋiɽaŋal-ŋi ŋǝthi ne@ma kwǝthi Allah kwinḏǝthǝr-nyii, nǝnyii kwuuru ṯɔgwagiza kaka kworṯowa kwilŋiṯṯi ŋorṯo-na, mindaŋ nǝ-gwɔ kwizi kwɔthaathɔ acci-la. Ethir aŋraci kila tatap beṯ-beṯṯen linḏi ethi-gwɔ acci-la. 11 Kaka niti ninaani-gwɔ ṯɔgwagiza ṯeere ṯir ter mac ethi kitha-la ṯimǝ ǝccini, ṯǝni Yǝcu Kwɔrɔstɔ. 12 Na mǝ kweere nyithak acci ki-ṯɔgwagiza-la, ḏahab-thi, ya fiḏḏa-gi, ya yall-yi yir ghaali, ya ŋiɽivin-ŋi, ya karaaw-gi, ya ŋwɔvɔɔrɔ-ŋi, 13 e-ta a ŋothɽor ŋǝthi leere-leere ruwǝnnǝlɔ, ǝsi Laamin lǝthi Kweeleny ruwǝzǝlɔ, kaka ninḏir-gwɔ ethi ruwǝnnǝlɔ iigǝ-yi, mindaŋ a iigǝ ṯǝcci ŋothɽor ŋǝthi leere-leere ethiseese ŋɔrtɔti aŋgwɔrɔ. 14 Mǝ ŋothɽor ŋeere ŋǝthi kwizi kweere nyithak ŋa ŋacca-ŋwsi ki-ṯɔgwagiza-la ere kiirathalɔ iigǝ-yi mac tǝ, ŋwaavi ɔjra. 15 Na mǝ ŋothɽor ŋǝthi kweere uɽǝthi tǝ, ŋwɔ ṯuusi ŋothɽor ŋuuŋun ŋundu tǝ, ŋwɔ kilǝthi rogɽo ruuŋwun, laakin kaka firaŋ-ŋgi iigǝŋi-nǝ ṯɔɽɔk.
16 Ŋaaŋa liti lilŋithi mac ethaarɔŋw ŋaaŋa lir heikal wǝthi Allah, nǝ ǝṯi-ŋǝsi-gwɔ Ṯigɽim ṯǝthi Allah ɔmina? 17 Mɔŋw kiirasi kweere heikala-lɔ wǝthi Allah, e-ta a Allah kiirasi ŋunduŋw-lɔ tok. Kaka nirllinǝ-gwɔ heikal-lɔ ter wǝthi Allah, nǝ nǝṯoro ŋaaŋa lir heikal wuuŋwun.
18 Ǝṯɔŋw kǝɽinyjǝ kweere rogɽo-lɔ ruuŋwun mac. Mɔŋw aarɔŋw kweere duŋgwun-nǝ nyii kwǝthi yǝnǝ ki-ṯurmun-nǝ kɔthɔ, ethɔŋw kǝniny oro kǝɽiyǝŋ, mindaŋ mɔŋw ǝthi yǝnǝ rerrem. 19 Kaka nɔrɔ-gwɔ ṯǝthinǝ yǝnǝ ṯǝthi ṯurmun ŋǝɽiyǝŋ kiyǝnǝ yǝthi Allah. Kaka nɔlɔɔthɔnar gwɔ ŋaarɔŋw, “Kwǝṯi iidǝsi kila lǝthi yǝnǝ ŋishaaṯir-ŋi ŋeeŋen.” 20 Nǝraaɽi nǝraari kwokwony-ŋwɔ, “Kweeleny kwilŋithi ǝfkǝrǝ wǝthi kila lǝthi yǝnǝ witi wǝthi faayitha-na kweere mac.” 21 Ǝṯɔŋw ǝllinǝ kweere mac kwomne-gi kwǝṯi kwizigwunǝŋ ǝrri. Kaka nɔro-gwɔ kwomne tatap kwaalɔ. 22 Ɔrɔ-gwɔ Bɔɔlɔs alla Abɔllɔɔs alla Bɔṯrɔs alla ṯurmun alla ŋimiitha alla ŋiɽany alla ŋǝthi kirem-gwɔ alla ŋinḏi ethiila, nǝ ŋɔ tatap nǝroro ŋaalɔ. 23 Nǝ noro lǝthi Kwɔrɔstɔ; nǝ Kwɔrɔstɔ oro kwǝthi Allah.
© Nuba Ŋireeɽe New Testament © The Bible Society in Sudan, 1993.