Loŋgo Räṛu ro
1 Mapena 'desipara miro tana 'da, Lu 'bädri'ba maro,
ago märäṛuna mi 'da rriro äduako.
2 Tu cini si mayena aro'boya 'da miri;
märäṛuna mi 'da rriro äduako.
3 OPI orivoya 'desi ago ṛo nda räṛune ndra;
'desipara ndaro orivoya ndrani tauni drisi.
4 Kovole'ba alo itina tase miyebe 'da kovole'ba kinja ri;
ànya ayonayi taoye mbaraekye miro tana 'da.
5 Ànya atanayi a'do'desi miro ndi a'dopara miro be tana 'da,
ago musuna taoye liŋgyiekye miro tavona 'da.
6 Lidri atana taoye mbaraekye miro tana 'da
ago mitina 'desipara miro tana 'da.
7 Ànya itinayi liku takado amba miro ro tana 'da
ago oŋgonayi loŋgo 'da ta a'do'diri miro rota.
8 OPI orivoya 'di lu'ba yi ago yauni amba be,
ka oŋga kyilaro liyaro ago orivoya twi ŋgalu 'duro be.
9 Nda orivoya kado 'dicini ri
ago yauni be ŋgase cini nda ko'babe dri.
10 Ŋgase cini mi'ba be oyena aro'boya 'da miri, OPI,
ago taŋgye'bai cini miro räṛunayi mi 'da.
11 Ànya atanayi a'do'desi miri 'bädri'ba miro ro tana 'da
ago itinayi mbara miro tana 'da,
12 tana lidri kuni taoye mbaraekye miro tana ro robe
ndi a'do'desi para miri 'bädri'ba miro robe.
13 Miri 'bädri'ba miro ro orivoya äduako,
ago 'dimiri miro orina ndi äduako.
OPI orivoya 'diri tao'bai cini ndaro ya,
ago yauni be ŋgacini se nda ko'ba be ri.
14 OPI kani ànya se kabe o'de ätina;
ago nda kani ànya se 'dete rriti ya eŋgana.
15 Ŋgavo cini ka mio'ba midri,
ago nyani ŋgaonya ozo ànyari tuna se ŋgye ya,
16 Nyani ozona ànyari amba
ago mi'ba ojo lemeri ŋgacini lindriidriro rote.
17 OPI orivoya taŋgye'ba yi tase cini nda kabe oyena ya,
yauni amba be taoye cini ndaro ya.
18 OPI orivoya loto ànya se cini kayibe nda uzi re,
se cini kabe nda uzi taŋgye si 'do.
19 Nda kani ŋga ozo ànya se kayibe nda oro ri;
nda ka kpani liyi ànyaro eri ago kani ànya opa.
20 OPI kani 'dicini se kabe nda lu gaga,
oko nda tufuna takozi'bai 'da.
21 Märäṛuna OPI 'da ondoalo;
ago mi'ba ŋga o'bao'baro cini käräṛu ävuru alokado ndaro äduako.
© The Holy Bible in Moru © The Bible Society in the Sudan, 2000