U'diako 'Bu ro
1 OPI atate ma Yeremaya ri ta u'diako 'bu ro rota ekye:
2 “Yuda ka ugu kukuo'be;
'bakicii anyaro kate ugu rupere,
lidri anyaro kate ugu u'du vurusi likyii be,
ago Yerusalema kate totre ndra ta ŋgaopa rota.
3 Lidri se ŋgaamba be iyi kayi ruindu'bai ànyaro ozona gyi ta;
ànya kayi oyi koroŋwai ya,
caoko usuyi gyi kote;
ànya kayi ego lakazà ànyaro be ya awi ro.
Ànya orivoya driupiro ago wiriwiriro
ago ànya kayi mi ànyaro da'dona
4 Tana 'bu i'do
ago gyini wite ṛatara.
Ämvuoso'bai te tusuro;
ànya kayite mi ànyaro da'dona da'do.
5 Ca kaliŋga endre ka ŋgwa giṛiŋwa anyaro
se kutibe luruŋwa ro 'do e'bena te vo awi ya
tana käyi te i'do.
6 Doŋgyii vocowa ro kayite edre lutui awiro drisi,
kayite lawa shye shye shye oso kobai ronye;
mi ànyaro nite
tana ŋgaonya te i'do ànyari.
7 Lidri maro kayi driayo märi ekye:
‘Takozi amaro kikicu ama gica oko,
OPI mipa ama, oso mi'ba tao'ba be ronye.
Màlapa teni miresi perena amba;
màye takozi te miri.
8 Mi se toto ni mio'ba Yisaraele ro;
ago opa'bana yi tu rriti rosi ono.
Tana e'di nya'do gwo 'diatra ronye wari amaro ya,
oso aba'ba se kabe ori toto ŋgäkyi raa alo 'do ronye ni ya?
9 Tana e'di nya'do gwo oso 'dise wiriwiri ro,
oso kyila'ba se mbaraako ni ko 'di opane 'do ronye niya?
Caoko endaro, OPI mi orivoya tro ama yibe!
Ama orivoya lidri miro;
nye'be ama ko.’ ”
10 OPI ka ata ta lidri kwoi rota nonye ekye: “Ànya leyi oyine lozo ni maresi, ago ritayi andivo ànyaro kote. Ta'dota ma OPI male ànya kote. Ŋgakozi se ànya koyeyibe koziro 'do mayina tana ndi ago mezana ànya 'da ta takozi ànyaro rota.”
11 OPI atate märi ekye: “Nyämätu ko takado ri a'done lidri kwoi ri. 12 Ondro ka'do ànya kakpayi gica, märi liyi ànyaro ta ŋgaopa rota erine i'do; ago ondro ka'do ànya kozoyi ŋgapäṛi ozaro ago ŋgapäṛi inya ro gica märi, märi tadrina olene i'do. Mago, mutufuna ànya ṛo kyila ya ago mä'bu si ndi adravo kozipara be.”
13 'Dooko matate makye: “OPI Mbarapara, minite anjioko nebii kayi taiti lidri ri ekye mi'ba tao'ba te kyila ndi mä'bu be unina ko a'done, oko mi'bana toto taliatokpe ayani a'done wari ono ya.”
14 Oko OPI logotate ekye: “Nebii kayi ugu koweoga ävuru maro si; tana mazo ànya koni, mozo ota aza kpa ko ago mata ta aza alodina kpa ko ànyari. Rulofo se ànya kayibe tana atana iyi orivoya kowe yi, taäŋgu takaciako yi ago ŋgase takado ako ànya kayibe tana usuna iyi owo. 15 Ma, OPI, ma taiti miri ta nebii se mazo ànya koni oko kayi ta ata ävuru maro si ekye, kyila ndi mä'bu be unina ko a'done wari ono ya iyi, mutufuna ànya 'da kyila ya ago mä'bu si. 16 Lidri se ànya katayi tase kwoi be rigye iyi utufuna ànya kpa kyila si ago mä'bu si. Olovona avo ànyaro 'da litiŋwai Yerusalema ro drisi, ago 'diaza a'dona i'do ànya osene. Ànya ndi tro 'ditoko ànyaro, ŋgwàagoro ànyaro, ndi ndiriŋwa ànyaro yibe. Ma'bana takozi ànyaro 'da ànya dri.”
17 OPI ta mate taitine lidri ri ekye:
“Mi'ba miendre maro kidi vuru kitu zwi ago ŋgäkyi raa,
mi'ba kedre ko liyiako alona,
tana ä'di lidri maro te ägyu laza 'desi be;
u'di kozipara si.
18 Ondro moyibe tesi lowo ya, mandre avo lidri se utufube kyila ya iyi rote;
ondro macibe 'ba'desii ya, mandre lidri ka rueza ni mä'bu ri.
Kohanii ndi nebii be kayi ugu aba losi ànyaro oyena wari yasi,
caoko ànya niyi tase ànya kayibe oyena ana kote.”
Lidri ka Rulo'ba OPI ri
19 OPI, inye'do miga Yuda tezo kpeye ya?
Inye'do ya miro osoro lidri Zaiona ro lomvo ya?
Tana e'di miga ama gwo laza be 'ba ede ama kote niya?
Mà voondre taliatokpe ta, caoko takado
aza a'do kote;
mà mio'ba ŋgaede ta, caoko turi go ikyi ṛoni vona ro.
20 OPI, mä̀nite màye takozi te;
ago zutui amaro yeyi takozi te,
Endaro maye takozi te miri.
21 Ta mi modo rota, miga ama kozo;
nyezi driupi ko Yerusalema gyiti liŋgyiekye miro dri,
Nyepere tao'baro miro se mi'babe ama be ono ko.
22 Inye'do lui awi tu'dei ro aza gibe 'bu o'bane u'dine ya?
Kode inye'do vokuru andivona unina ko 'bu o'bane logyine ya?
Inye'do mi OPI ko ni Lu amaro owo ya?
Mà'ba mi amaro midri,
tana mi ni se kabe ŋgase cini kwoi oyena owo.
© The Holy Bible in Moru © The Bible Society in the Sudan, 2000