aza 3
ŋofḏana eḏizerri ŋir kwaḏan
1 na ŋu ŋirmiḏiḏu, lieŋgeri, ericernyji ki yiriny mindaŋ ma ŋiɽaŋal ŋeḏi Kweleny ililaḏa kereny tuc tuc eḏofḏazi kaka ŋa ŋimerrini daŋgal-na, 2 mindaŋ menyi kilaw ki rii-na reḏi lizi liki lir ludur; kaka iti eḏir gwu tatap ṯəmna mac. 3 lakin na Kweleny eni kwirlalu; kwɔŋazi firli teter, kwɔŋazi aŋraci ŋikyaŋi nana. 4 na nyiŋa limɔŋazi elŋece rac eḏi Kweleny-na eḏaruŋw, ŋeṯizerri ŋaŋa, na ŋazi errizeza tɔk ŋa ŋellicer ŋazi ŋi amra. 5 eḏi ŋazi Kweleny mulḏaḏa rugwori ki ṯamɽa-na ṯeḏi Allah, na ki ṯindinyana nana ṯeḏi Kwruztu.
6 nyiŋa lecaŋazi ma ŋwa, lieŋgeri, yiriny yi yeḏi Kweleny kweri kweni Yecu Kwruztu, eḏi ruci aŋgalu-na kwere kwir kwruztyan kwir kwumozɔ, kwumɔ dapi ŋiɽaŋal ŋi la ŋimezafi nani nyi gwu. 7 kaka ilŋiiḏi ŋazi gwu eḏi ma ami aɽani nyuŋwuzi ŋwu; nyiŋa liti lir limozɔ mac ki lomur linani nyi li daŋgal-na, 8 nenyere yaḏa kwere eḏneya domony mac, lakin eṯinyakiki ŋɔḏɽor ŋir ŋwunda ŋwunda yuluŋa yaŋwunu tatap, mindaŋ eḏizere inḏini ṯofi lere mac daŋgal-na ŋiɽaŋal ŋi ŋeri. 9 ŋiti ŋiri mac kaka iti ofḏanizar nyji gwu mac, lakin eḏizinḏeḏa ŋaŋwuzi ŋeḏre ŋeri ŋizaw eḏi zi gwu izazi mindaŋ eḏizerri ṯa ŋwu. 10 lakin nani nyi gwu kinna ŋaŋa li, na ŋazi ellici amra wu: muŋw ere aki kwere ŋɔḏɽor mac, eḏuŋwere eḏne tɔk mac. 11 liniŋnacanyji lɔkwɔ lalu liri limozɔ, lir lizɔmbɔṯ, liti lakiki ŋɔḏɽor ŋere mac. 12 ner orɔ ṯa kla lellicenyji amra, na lukwazenyji tɔk, eḏi Kweleny-na kweni Yecu Kwruztu, eḏaki ŋɔḏɽor ŋeŋen titir, na eḏi ŋi iiḏini rɔgwɽɔ reŋen. 13 lieŋgeri, eṯi muli mac eḏizerri ŋizaw.
14 muŋw derne kwere eḏi inyizi ŋiɽaŋali ŋeri nana ŋeḏi juwab ŋgwu, icacari kworu ŋgwa, na eṯere eḏi karḏa nanuŋw gwu mac mindaŋ a ṯurony miḏa. 15 eṯi ruza ŋunduŋwu ṯuwən ṯalu mac, lakin eṯi ireci kaka aŋgalu kwete.
16 na eḏi Kweleny kweḏi ŋiɽena ŋundu inḏeḏa ŋaŋwuzi ŋiɽena ki ŋwomur tatap, ki ŋiɽaŋal-na ndendeṯ. eḏi Kweleny nani ŋaŋa li tatap.
17 nyi, kweni buuluz, kwulucaŋazi ṯagna kḏu ṯii ṯi ṯinyi. yinderṯa yir alama ki juwab-na kwinyi tatap; yinderṯa kyu eṯi nyi ma lɔ. 18 eḏi ṯimeca ṯeḏi ŋimɽi ŋeḏi Kweleny kweri kweni Yecu Kwruztu nani ŋaŋa li tatap.