aza 5
kilya keḏi Kweleny induŋw gwu eḏaɽa, na ṯaŋrina nana
1 ŋinyi ŋiti ŋir mac ŋeḏi ŋi loca ŋaŋwuzi ŋeḏi ŋwamin ŋwomur ŋi, lieŋgeri. 2 kaka ilŋiiḏi ŋazi gwu eḏaruŋw, lamin leḏi Kweleny linḏi eḏila kaka kwoɽam kilikelu. 3 ma lizi aruŋw, ŋiɽaŋal ŋizaw tatap, ŋami nanuŋw tɔk ta, ezi ŋikiraḏalu ṯermizelu, kaka ṯurfa ṯeḏi ŋijma ŋeṯacazi kwayu kwinḏi eḏelŋe, ta er ere inḏa ezir were mac weḏi gwu afraḏa. 4 lakin a liti linani kirim-na mac, lieŋgeri, eḏi lamin kla ṯermezi ŋaŋwuzi lu kaka kwoɽam. 5 kaka ur ŋa gwu tatap nyor nyeḏi fori, na nyor nyeḏi kaŋwun-na. a kwiti kwirir leḏi kilikeluŋw mac, ya leḏi kirim. 6 ŋwu ṯaŋwu, er ere inḏiri ŋwaru mac kaka eṯir gwu inḏiri liḏaḏu, lakin er nani likiɽṯu, laŋrica rɔgwɽɔ teter. 7 kla leṯinḏiri, eṯir inḏiri kilikelu, na leṯi ii kiɽcaŋi eḏurleli, eṯir ii kilikelu. 8 lakin, urir gwu nyiŋa leḏi kaŋwun-na er aŋrani nana teter, er kenne yeḏreŋi yir ṯəmna, na yir ṯamɽa tɔk, na yeḏi ŋwoɽa yir ṯəkiza kizen eḏafi ŋigileḏa. 9 kaka iti ellinyji gwu Allah eḏi kaṯazi ŋirŋaza mac, lakin eḏafi ŋigileḏa Yecu Kwruztu ŋgi, kwir Kweleny kweri. 10 kwunderṯa kwumenyji eyzi, mindaŋ nanir gwu likiɽṯu ya linḏiru ŋwaru ŋweni ŋiɽany, er miiḏi tatap ki duŋw ŋundu gi. 11 ṯaŋwu, eṯi zi firlazi la wuɽe-wuɽeny, na eṯi zi kikindezi-na tɔk, kaka ṯa ŋa ŋeṯizerri.
ŋiɽaŋal ŋere ŋere ŋofḏana eḏizerri
12 lakin nyiŋa liturecaŋazi lu, lieŋgeri, eḏi zi iɽi-na kla leṯakiki ŋɔḏɽor daŋgal-na, leṯi ŋazi ṯamḏu la eḏi Kweleny-na, na leṯi ŋazi kwurmɔṯazi, 13 na eḏi zi iɽi-na beṯe-beṯen ṯamɽa ṯi ŋiɽaŋal ŋi ŋeḏi ŋɔḏɽor ŋeŋen ŋeṯirzerri. eṯamiḏina wuɽe-wuɽeny. 14 nyiŋa loracaŋazi, lieŋgeri, eṯi zi kwurmɔṯazi kla lir lumoza; eṯi zi firlazi la kla ləmreṯu ŋuma ki rugwor-na; eṯi zi meci kla lajila rugwor-na; eṯi zi indinyana nana ŋeḏi lizi tatap. 15 izari eḏi kwizi ere kwere daŋgal-na mac eḏi zi kwumaci-na ŋa ŋiki ŋimɔŋw zi errici ŋiki, lakin eṯi zi naŋni eḏi zi erreḏizina ŋizaw, na liḏaḏu tatap. 16 eṯi nyeŋlena ŋwamin tatap; 17 eṯari ki yiriny; 18 eṯeca zukran kwɔmne gi tatap, kaka urir gwu ŋu ŋeḏi ṯugwor ṯeḏi Allah eḏi Kwruztu-na kweni Yecu, ŋeni ŋaŋa. 19 eṯere iɽinyaḏa igəŋi weḏi Ṯigɽim tirlinelu ter mac. 20 eṯere ruzi ŋiɽaŋal luŋw mac ŋimezi Allah inḏeḏa kwere eḏizandaci, 21 lakin eṯi ṯeci ŋiɽaŋali tatap; eṯi zi miḏa teter ŋa ŋizaw; 22 ruceri ŋikyaŋi-na tuk ŋir-na ter ter.
23 eḏi Allah weḏi ŋiɽena ŋundu irli ŋaŋwuzi lu ter minmin ṯofḏana ṯi ṯuŋwun; na eḏuŋw karni rigɽima ralu, na rugwori, na yaŋna tɔk minmin, liti leḏi loma-na lere mac ki lomur linḏi li Kweleny kweri kweni Yecu Kwruztu eḏila. 24 ŋgwa kwornuṯiŋazi kweni kwirlalu, ŋwuzerri tɔk.
25 lieŋgeri, ericernyji ki yiriny.
26 aginari lieŋgeriŋwuzi tatap ṯagna ṯi tirlinelu ter. 27 nyi kwornacaŋazi Kweleny ŋgi eḏortici liaŋgaluŋwuzi tatap juwaba ŋgwu.
28 eḏi ṯimeca ṯeḏi ŋimɽi ŋeḏi Kweleny kweri kweni Yecu Kwruztu nani daŋgal-na.