aza 5
buṯruz kworace lijowiṯi
1 ṯaŋwu, nenyi oraci lijowiṯi linani daŋgal-na, eni nyi gwu kwijowiṯ kwete kwir ŋali tɔk, kwir kwete kwiza ṯirerina ṯeḏi Kwruztu, na kwinḏi tɔk eḏafi ŋoru ki ŋiniṯ-na ŋinḏi eḏi ruwene lu. 2 aŋricari yaŋali yeḏi Allah yinḏeḏer ŋazi eḏizaŋraci kaka nyaɽa, yiti yaŋracaŋa zi eḏəginici rɔgwɽɔ ralu kwɔmne kwere kwiti kwofḏana mac, lakin rugwor ri-na reṯamina, 3 na liti linaŋna eḏorɔ leleny tɔk mac leḏi kla laŋracaŋa zi, lakin kaka kla leṯi zi gwu yaŋal izazi eḏi kwakiḏaḏa, ŋamaŋ. 4 mindaŋ ma Kweleny kweḏi nyaɽa ruwene lu ta, a afi taŋgiŋi teḏi ŋiniṯ, titi teḏi ŋuma eḏernine mac.
5 kaka ṯaŋwu, ŋaŋa lir lɔkwɽeny, kitizari ŋiɽaŋali yey ŋeḏi kla leni lijowiṯ; eṯi kəkini-na teter ṯejilina ṯi ki rɔgwɽɔ eḏi meciḏizina, kaka
eṯi gwu Allah ṯinyini lizi leṯellini,
lakin eṯuŋw zi inḏeḏa kla leṯejilini ki rɔgwɽɔ ṯimeca ṯeḏi ŋimɽi.
6 ŋwu ṯaŋwu, eṯejilini ki rɔgwɽɔ ki ṯii-na ṯeḏi Allah ṯiṯemḏi ŋuma ŋi, mindaŋ ma lamin ila lofḏana, wɔŋazi dimeḏa la teṯ. 7 kitizari ŋunduŋwu kwɔmne kwalu ndendeṯ kweṯi ŋazi urreḏa, kaka eṯuŋw gwu karni ŋaŋwuzi. 8 eṯaŋrani ki rɔgwɽɔ; a nanalu yey yelu. ṯuwən ṯalu teni ibliiz ṯeṯi ireri la jilaŋ jilaŋ kaka zundaŋ kwetari, naŋnaŋw gwu kwizi lu kwere eḏi ŋiraŋ-na ŋurut ŋuruṯ. 9 niḏri nana ibliiz yi teter; enjer ŋwara lu teter ki təmna-na ṯalu, lilŋiica liaŋgalu ŋwuzi lalu, lir likwruztyan ṯurmun nana tatap letinḏa ṯurfa bɽe-bɽet taŋwu. 10 kwaḏan, ma rerini kwɔkwɔ, a Allah ŋundu, weḏi ṯimeca tatap teḏi ŋimɽi, wumɔ ŋazi ornuṯi eḏenḏi ki ŋinit-na ŋuŋun ŋetinanniḏa dɔk eḏi Kwruztu-na, wɔŋazi daɽmaci tuc, wɔŋazi enjelu kider, wɔŋazi firlazi la teter. 11 eḏi ŋinit-ŋa ŋuma ŋi ŋeḏi ŋeleny orɔ ŋuŋun dɔk dɔk. emba.
12 nyi kwumɔ ŋazi luca juwaba ŋgwu kwubla ṯii ṯi ṯeḏi zilwaanuz, kwir eŋgeri kwirlalu ki yey-na yinyi, eḏi gi oraci ŋaŋwuzi, na eḏi gwu unḏi ṯimeca teḏi ŋimɽi ki teḏi Allah; eti gwu enji ŋwara lu teter. 13 ŋgwa kwunani baabil, kwica Allah-na tɔk, kaka ŋaŋwuzi, kwagnaŋazi; marguz, kwir tor tinyi, kwagnaŋazi tɔk. 14 agnizar-na wuɽe-wuɽeny ṯagna ṯi ṯeḏi ŋimɽi.
eḏi ŋiɽena nani daŋgal-na nani gwu kla tatap linani eḏi Kwruztu-na.